NUMERI 21
21
Kamanang taharep oloh Kanaan
1 #
Num. 33:40
Atad iete ije lewu intu hila salatan lewu Kanaan. Katika raja lewu te mahining je oloh Israel dumah mahalau jalan Atarim, ie palus haguet manyarang ewen tuntang mawi pire-pire biti bara ewen induan jadi tawanan. 2Palus oloh Israel hajanji dengan Tuhan kalotoh, “Jaka Ikau manenga kamanang hai akan ikei taharep bangsa te, ewen tuntang kare lewun ewen kareh impalomos ikei sampai lepah.” 3Tuhan manarima palakun oloh Israel mampatei oloh Kanaan te dengan kare lewun ewen, tinai eka te inggare ewen Horma.#21:3: Horma: Riman aran toh huang basa Ibrani iete “kabinasa”.
Handipe tambaga
4 #
Deu. 2:1
Limbah te oloh Israel malihi Bukit Hor, ewen mahoroi jalan je manintu Telok Akaba, handak mangaliling tanah Edom, tapi intu benteng jalan bangsa te lepah kasabare. 5#1 Kor. 10:9 Ewen bakotok taharep Hatalla dengan Moses. Ewen hamauh, “Mbuhen ikau mimbit ikei balua bara Misir? En handak mampatei ikei intu padang toh? Hong hetoh jaton taloh kinan, tuntang danum kea mahin jaton. Ikei peda dengan panginan je batawah toh!” 6Tuhan mampadumah kare handipe tada intu bentok bangsa te. Are oloh Israel matei inotok kare handipe te. 7Palus bangsa te dumah manaharep Moses, tuntang hamauh, “Ikei jari badosa awi bakotok dengan Tuhan tuntang dengam. Keleh balakudoa intu Tuhan mangat kare handipe toh ingejau bara ikei.” Palus Moses balakudoa akan bangsa te. 8Tuhan balalu manyoho Moses manampa ije handipe bara tambaga tuntang mantajoke intu hunjun ije tihang. Genep biti je inotok handipe, kareh keleh amon nampayah handipe bara tambaga te. 9#2 Ra. 18:4; Yoh. 3:14 Palus Moses manampa handipe bara tambaga tuntang mantajoke intu hunjun ije tihang. Genep biti je inotok handipe, tau keleh amon manampayah handipe tambaga te.
Bara Bukit Hor akan petak lampar Moab
10Oloh Israel haguet tinai, palus mampendeng kemah intu lewu Obot. 11Limbah malihi eka te, ewen mampendeng kemah intu Aye-Abarim hong padang pasir hila timor tanah Moab. 12Limbah te ewen mampendeng kemah intu petak rampar Sered. 13Bara hete ewen haguet tinai tuntang mampendeng kemah intu dipah Sungei Arnon, intu padang pasir je hamparang manintu tanah oloh Amori. 14Jete bukue huang ‘Buku Parang ain Tuhan’ tarasurat, “… kampong Waheb, intu tanah Supa tuntang kare petak lampare; Sungei Arnon 15tuntang petak lampar je hambirang sampai akan desa Ar tuntang manintu helat tanah oloh Moab.”
16Bara hete ewen haguet akan eka je inyewut Beer, rimae kare kalin danum. Intu hete Tuhan puji hamauh dengan Moses, “Soho ungkup hapumpong; Aku kareh manenga danum akan ewen.” 17Metoh te bangsa Israel manyanyi auh nyanyi toh,
“O, kare kalin danum, kambuar danum aim,
ikei kareh manyambute hapan auh nyanyi.
18Kalin danum je ingali awi kare oloh hai
tuntang awi kare pamimpin bangsa
ingali hapan sukah parentahe
tuntang hapan sukah tanda kuasan ewen.”
Bara padang pasir ewen bindah akan Matana; 19Bara hete akan Nahaliel palus akan Bamot; 20limbah te akan petak rampar hong tanah oloh Moab, intu penda tantan Bukit Pisga je manaharep padang pasir.
Kamanang taharep raja Sihon tuntang raja Og
(Deu. 2:26–3:11)
21Palus bangsa Israel manyoho kare utusan akan Sihon, raja Amori, mangat manyampai peteh toh, 22“Soho ikei mahalau lewun Tuangku. Ikei tuntang meto ain ikei dia handak mambelok bara jalan tuntang dia handak tame akan kare tana atawa kare kabon anggor atawa mihop danum bara kare kalin danum. Ikei dia handak mambelok bara jalan hai sampai ikei balua bara tanah Tuangku.” 23Tapi Raja Sihon dia manyoho kare oloh Israel mahalau lewue. Ie mamumpong tantarae tuntang haguet akan Yahas intu padang pasir tuntang manyarang oloh Israel intu hete. 24Tapi intu kalahi te are tentara Amori impatei awi oloh Israel. Palus oloh Israel manduduk tanah te bara Sungei Arnon sampai Sungei Yabok, iete helat tanah oloh Amon, awi helat te aton pertahanan je paham dehen. 25Tumon te oloh Israel marabut uras lewun oloh Amori, tatamput Hesbon tuntang uras lewu korik hakalilinge, palus ewen manetep intu hete. 26Hesbon jete lewu hai ain Raja Sihon. Ie puji parang malawan raja Moab tuntang marabut tanahe sampai Sungei Arnon. 27Jete bukue oloh tukang sansana mawi sansana kalotoh,
“Keleh dumah akan Hesbon,
akan lewun raja Sihon.
Ikei handak mite lewu toh
imangun tuntang ingambuah haluli.
28 #
Yer. 48:45-46
Puji sinde bara lewu toh
tentara ain Sihon miar kilau apui.
Je mampahancor lewu Ar intu Moab,
tuntang marentah kare bukit mampan Arnon.
29O bangsa Moab, ikau calaka!
Je manara Kamos, ikau binasa!
Ikau inalua dewa aim jadi oloh babuhau,
kare oloh bawi aim jadi indu tawanan Raja Amori.
30Tapi toh keleh turonan ewen binasa,
intu hapus jalan bara Hesbon akan Dibon,
bara Nasim akan Nopah tokep Medeba.”
31Tumon te bangsa oloh Israel manetep intu tanah oloh Amori. 32Limbah te Moses manyoho oloh haguet manggau jalan je pangkahalape uka manyarang lewu Yaeser. Palus oloh Israel marabut lewu te dengan kare lewu korik tokepe hayak maharak oloh Amori je melai intu hete. 33Limbah te oloh Israel mambelok tuntang mahalau jalan je manintu Basan. Raja Og bara Basan miar dengan tantarae mangat manyarang oloh Israel intu lewu Edrei. 34Tuhan hamauh dengan Moses, “Ela mikeh dengae. Aku kareh manenga kamanang akam. Ikau kareh mampakalah ie, hapus rayate tuntang lewue. Keleh mawi ie kilau je jari iawi keton dengan Raja Sihon je marentah intu Hesbon.” 35Palus oloh Israel mampakalah tuntang mampatei Raja Og, kare anake, tuntang hapus rayate; jaton ije je balihi. Limbah te ewen manduduk lewu te.
Tans Gekies:
NUMERI 21: NIJ
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan