Matiu 2
2
Mme afiọk ñkpọ awo ekese Mesaya
1Ke ini Yisọs amaakemana ke Betrehem ke Yudia ke ini ukara Adidem Herọd, mme ikpọawo ifiọk ke usakka utịn emaedi Yerusedem 2edibịp ete, “Mmọ anye a-amanake nte adidem mme Yuu? Ñnyịn imaikịt ntantaafiọñ amọ ke usakka utịn ndin idi adikpono anye.”
3Ke ini Adidem Herọd akoppo ñkpọ ami, amaafịna anye ye afịd Yerusedem. 4Ke ini anye amaakekood afịd ikpọ aku ye mme andikpeeb ibed ibon keed, anye abịp ammọ abaña itie akenaaha Krais amana. 5Ammọ emaebọọrọ ete, “Ke Betrehem ke Yudia, sia ntom ke brọfed akewet:
6“ ‘Ndin afo, Betrehem, ke isọñ Yuda
usịppe ukan ke usʌñ ndomokeed, ke atu mme andikara Yuda,
sia ke afo ke andikara adiito,
a-adiido andikpeme ikọd mmi Isred.’ ”
7Ndin Herọd akood mme ikpọawo ifiọk ado ke ndedịbe anyʌñ adiọọñọ ato ammọ ukem ini a-ntantaafiọñ akewuọọhọ ada. 8Ndin anye anọ ammọ eka Betrehem ate, “Ikaiya ikitʌm iyem ayịn ado. Imaikịt anye, inam nọ ndiọọñọ nọ ami ñko ndiinyʌñ ñkekpono anye.”
9Ammọ emaekekop se adidem aketañ ima, ammọ emaeka iso ke isañ ammọ, ndin kpa ntantaafiọñ a-ammọ ekekịtte ke usakka utịn adat ammọ usʌñ tutu aketre ke itie ayịn ado akebaaha. 10Ammọ emaekekịt ntantaafiọñ ado, emaenekke enem esịd. 11Emaekesịm ufọk a-ayịn akebaaha, ammọ emaekịt ayịn ye Mmeri eka amọ, etuak iwuod enọ, enyʌñ ekpono anye. Ndin ammọ etat ekpad ammọ enyʌñ enọ anye mme nsọñudua ñkpọ: nsọñudua itiad kood, insensi ye anemutebe adan. 12Ndin sia emaekekpan ammọ ke ndab ete ammọ ekuutịmme ekekịt Herọd aba, ammọ emaesaña usʌñ mfen enyọñ abio ammọ.
Ufeghe ñka Iyịpt
13Ammọ emaekenyọñọ, enyere Abọọñ awọt Yosef idem ke ndab ate, “Dakka da ben ayịn ye eka feghe ka Iyịpt. Tie do tutu ami udọkkọ idaha uduukpọñ, sia Herọd ayaayem ayịn ado adiwot.”
14Ndin anye adakka ada, aben ayịn ye eka ke akonayo aka Iyịpt. 15Do ke ammọ ekeba tutu Herọd akpa. Aketịppe ntom nọ se Abọọñ aketañ ato brọfed amọ asu: “Mmaakood ayịn mmi nsio ke Iyịpt.”
16Ke ini Herọd adiọọñọke ate ke mme ikpọawo ifiọk ado emaebiaaña imọ, anye amaayat esịd ñkpa-ñkpa anyʌñ anọ adudu ate ewot afịd nditọ ideen ke Betrehem ye mme ñkanñkʌk a-mmikisọññọ ikan isua iba akeene se anye akekop ato mme ntaifiọk ado abaña ini a-ntantaafiọñ akewuọọhọ ada. 17Ke ntom se brọfed Yerimaya aketañ amaasu:
18“Emaekop uyo ke Rama,
ntuaaña ye akpọsọñ mfʌghọ,
Rased atua anọ nditọ amọ
inyʌññọ ikop ndọñesịd,
sia ammọ ibaññake aba ke uwem.”
Utịmme nnyọñ Nasared
19Ke Herọd amaakekpa, enyere Abọọñ amawọt Yosef idem ke ndab ke Iyịpt 20anyʌñ abo anye ate, “Dakka da, ben ayịn ye eka nyọñ Isred, sia mbio e-ekeyemme adiwot anye ekpañña.”
21Do ndin ke Yosef akedakka ada, aben ayịn ye eka anyọñ Isred. 22Ado anye amaakekop nte ebo ke Asedaus adat itie ete amọ Herọd ke Yudia, ndịk amaanam anye adika do. Ke emaekekpan anye ke ndab ete anye akuuka Yudia, anye adikappa aka efaak Kadidi 23akedʌñ do ke abio e-ekekoodo Nasared. Ke ami, se mme brọfed eketañ amaasu ete, “Eyaekood anye awo Nasared.”
Tans Gekies:
Matiu 2: NAAM
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.