Ijosuwa 8
8
Anisirẹrị ê vu anẹkụra Eyayị ẹtẹ
1Ẹnẹyịmavara ộ hị́ Ijosuwa, dị ọ̀ ka asị o hí angwa ọ kụ́ avaba isoja Anisirẹrị nọ ịrẹkụ Eyayị, ộ kà ọnị vaa za ohinọyị Eyayị ọnịrị aza anị chire wa ụvọ. Avọọ ọnị mẹ rẹ vaa dọ ẹtẹ ẹnịnị yị wa nị. 2Dị Ẹnẹyịmavara kà ẹ̀ wụ̀ avaba aza ene hi Eyayị ọnịrị ohinọyị ẹnịnị anka ẹ mẹ vịdị mẹ̀ Ijeriko avọọ. Ama ẹ̀ kụ́ ogu ọnịrị ịsụpa ẹnịnị mẹ̀ ẹ́ẹnịnị. Dị ọ kà isoja Anisirẹrị ẹ̀ na tẹ̀ zi wa ịrẹma ẹkụra nị. 3Ịzẹyịza, dị Ijosuwa kụ́ isoja ẹkarị-ẹkarị ịrịka akawụrakata (30,000) jịnẹ ịrahụ ọnọọ nị Avọọ Ijosuwa ọnịrị isoja ẹnẹẹ mẹ̀ zị ụsẹ na ngụ Eyayị nị. 4Dị ọ kà yị wa ka asị a nyị ọza ene noze tara ẹkụra ọnọọ, ọzọza e tenyi ẹngụ, dị ee zi wa. 5Dị Ijosuwa ka ọnịrị aza ana vọ vaa ngụ tu wa. Ịjị Anayi ẹ jịnẹ tụ́ ẹhẹ tu ẹnị anka ẹ mẹ vịdị mẹ̀, dị ẹnị zwe varẹma. 6Ẹnịnị heyika ẹnị mẹ vịdị mẹ̀ ẹnị ịhị ọnọọ yọ nị. Ẹnịnị ẹ raà dụ ẹnị hụrẹ ẹngụ ẹkụra, dị aza tẹ tụ̀ hi ẹhẹ na rị ẹkụra ọnọọ ịrẹma ẹnịnị. Ẹnẹyịmavara Ohomorihi Anisirẹrị vaa sị ẹkụra ọnọọ chire ẹnịnị ụvọ. 7Ẹnịnị vaa kụ́ hụrẹ ịzị ẹẹ tẹ̀ tụ́, dị ẹ dọ ẹkụra ọnọọ agụvị ka Ẹnẹyịmavara vaa sị yị wa. 8Dị Ijosuwa mẹ ọda yị ẹnịnị ka ẹ sị ịra rị ẹkụra ọnọọ saka-saka ịjị ẹ sị ọ dọ ọ. Ẹnịnị saasa ịsa ọnị Ẹnẹyịmavara kà yị ẹnị. 9Ịzẹyịza dị ẹ na tẹ̀ zi wa ịrahụ ọnọọ nị. Dị ẹ ya ịnị akakana Ịbẹtẹrị ọnịrị akaha Eyayị eyi ịzị ọyị zị na ngụ ẹtẹ nị. Ama dị Ijosuwa ya beri isoja ana vọ ịzị e hi nị. 10Ẹnẹnẹ eyinẹhẹ viri-viri, dị Ijosuwa hị́ isoja ẹnẹẹ gụ nị. Dị ọnịrị ọdọvịdị ẹnịnị kụ́ wa nọ Eyayị nị. 11Ịjị ẹnịnị aa gụrị ẹkụra na, dị ẹ jẹẹ eyi ẹbẹẹba Eyayị ịnị osuusu ana jị ẹnịrị ẹkụra ịnẹ. 12Isoja ọnị Ijosuwa vịdị kụ̀ na te zi wa vị ịrịka akahị oze ẹẹta. Dị ẹ tẹ hi ịnị akakana Eyayị ọnịrị Ịbẹtẹrị nị. 13Dị isoja ọzọza tenyi ẹngụ ẹ zị ịzị ọzọza ya nị. Dị Ijosuwa na ịnị na ya nị, 14Ịjị ohinọyị Eyayị maanị re, dị kụ́ aza anị eyiha-eyiha jịnẹ tu wa ẹnẹnẹ viri-viri. Dị ẹnịrị isoja Anisirẹrị na gẹ ịrẹkụ ịzị e va eyi ka ẹkụra ana hị́ Araba Ama ọ yị rẹ vaa yẹ ka â nyị isoja Anisirẹrị ana tẹ hi ịnị avị ịrẹma ẹkụra. 15Dị Ijosuwa ọnịrị aza mẹ̀ ọbọ ka ọnịvị ẹnịnị e re huna ẹnịnị. Dị ẹ sị ịrẹsụ ka ụnọmị e zwe na nị. 16Ịjị ohinọyị Eyayị vavọọ re wa, dị ọ hị́ avaba aza anị gụ dị ẹ kụ́ chire Ijosuwa ọnịrị isoja anị. 17Dị ẹkụra ẹnịnị tu osusu, dị ẹ navọ oze ovwoovu ọyị na và hí ẹtẹ nị. 18Ịnị ụmẹ ọnọọ Ẹnẹyịmavara kà yị Ijosuwa ka ọ tana ọha anị hi ẹkụra Eyayị. Dị ọ ka ọnị ọ raa sị ẹkụra ọnọọ chire e ụvọ. Ịzẹyịza dị Ijosuwa vavọọ mẹ̀ ẹ nị. 19Obobooro ọnọọ, dị aza anị ana tẹ jịnẹ hị́ ẹhẹ, dị e zwe na ngụ ẹkụra nị. Ịjị e raa dọ ọ, dị ẹ jị ịra tụ́ ẹkụra ọnọọ. 20Ịjị anọrụ Eyayị kana eyi varẹma, dị e re areyi kungu ẹbẹẹba ẹkụra ẹnịnị maa rị ịra nị. 21Ịjị Ijosuwa ọnịrị aza re ka aza ẹnịnị ẹ raa jị ịra tụ ẹkụra ọnọọ dị vara eyi tu aza ana dụ wa nị. Aneyayị nịnị mẹ kana eyi ịrẹma dị e re areyi kungu ẹbẹẹba ẹkụra ẹnịnị maa rị ịra nị. Dị ẹnịnị jẹẹ ta ha dị ẹ yẹ ka ụvọ o ku ẹnị nị. 22Ụmẹ ọnọọ dị Anisirẹrị ana ngụ ẹkụra ọnọọ jịnẹ tu ẹhẹ, dị e zi oze akaha ọnịvị ẹnịnị aa wụ̀ wa ha nị. Dị ẹ va wa tụ́ ịnị akakana, dị e wụ́ avaba ẹnịnị ha saka-saka nị. 23Dị ẹ za ohinọyị Aneyayị ireyi-ireyi va yị Ijosuwa nị. 24Ịjị Anisirẹrị nịnị raa wụ́ aza ene hị́ ẹhẹ ta, dị ẹ varẹma ngụ ẹkụra ne vu aza na vọ hi ịzọọ ẹtẹ nị. 25Avaba Aneyayị ịrịka ẹnị Akahị oze ẹwụrẹva (12,000) e vú ẹtẹ ịhị ọnọọ nị. 26Ijosuwa vị ana vavọọ sị ụvọ za ọha anị va eyi ka Eyayị booro dị avaba ọnịvị nịnị vú ẹtẹ ta nị. 27Dị Anisirẹrị kụ ịsụpa ọnịrị ogu ẹnịnị agụvị ka Ẹnẹyịmavara ọ̀ ka yị Ijosuwa ka ẹ kụ́ ọ. 28Avọọ Ijosuwa mẹ rị Eyayị ịra, dị ẹkụra ọnọọ jị eburu, dị ọ tụ́ osusu pooro ve tu ajịnị nị. 29Dị Ijosuwa zu ohinọyị Aneyayị gẹ ọchị pooro na ngụ oruva nị. Ịjị a hụrẹ hụụnị ịrẹsụ ọchị, dị ẹ sị ịrẹta-ịrẹta jị oku anị aba oze tu oze ovwoovu ọbanyị ẹkụra ọnọọ va ngụ ajịnị nị.
 kà iwe ọda ịrẹsụ ataba Ẹba
30 #
Ọda 27.2-8
Dị Ijosuwa hi ụta yị Ẹnẹyịmavara Ohomorihi Anisirẹrị ịrẹsụ ataba Ẹba nị. 31#Kụra 20.25Ô mẹ̀ anka Imosiisi ọnụtụ Ẹnẹyịmavara mẹ vịdị chẹrẹ ẹ tịtẹ ịnị iwe ọda, Ẹnẹyịmavara kà ọ kụ ịrẹta ọnị ọza ẹ yị ha hi ụta anị. Dị ẹ mẹ̀ ịsọvọ ọyị rịra ọnịrị ịsọvọ ẹngwọọrọ ịrẹsụ ụta ọnọọ. 32Dị Ijosuwa chẹrẹ ọda Imosiisi ọnọọ tu ịnị ịrẹta ụta ọnọọ eyi avaba Anisirẹrị nị 33#Ọda 11.29; 27.11-14Ịjọnọọ, dị avaba Isirẹrị beri ọzọga ẹnịrị azọkụ, ọdọvịdị nịnị ne beri ohirẹsụ nịnị jẹẹ va eyi ka apoti oto ana ya ọvịdị ohirẹsụ irehi Ohomorihi ana sị apoti Ẹnẹyịmavara. Achẹva ẹnịnị ya ọvịdị ataba Igerizimi, dị achẹva ọsa ya ọvịdị ataba Ẹba anka Imosiisi ozi ahụ Ẹnẹyịmavara mẹ mẹ̀ ọda ka ẹnịnị ẹ mẹ̀ aduwa yị aza ịpaapa. 34Ijosuwa ộ za avaba ize ọnịrị ozirenu ana ya ịnị iwe ọda ịrịka zụ wa. 35Avaba ọda Imosiisi vị ọnị Ijosuwa za ịrịka eyi avaba ịragụ Anisirẹrị nịnị, anẹẹ, ezi, beri azọga ana ra ịnị akakana ẹnịnị.
Tans Gekies:
Ijosuwa 8: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.