Ijosuwa 24
24
Avaba Anisirẹrị ê tenyi oto wo yi Ẹnẹyịmavara
1Ijosuwa ọ hị́ avaba ịrẹsụ-ịrẹsụ Anisirẹrị gụ dị ẹ gẹ Ịsẹkẹmị nị. Dị ọ hị́ aza ọkọọka Anisirẹrị nịnị, ọ hị́ azọkụ, ọnịrị ọmọkarẹyị ne beri ọdọvịdị nịnị ka ẹ hịrẹ va jẹẹ gụrị ajẹngụ Ẹnẹyịmavara. 2#Oyn 11.27Dị Ijosuwa ka ọzọza batọ dị ọ wụ enube hụụnị ụvọ Ẹnẹyịmavara ana vị Ohomorihi Anisirẹrị. Dị ọ ka, ịnị ịyẹẹyẹ ohiku ẹnịnị vị ana ra akẹnẹ Okuha Iyuhwireti, dị ẹ yaa mẹ̀ ori ene hi ịzọọ. Avọọ ẹnịnị mẹ mẹẹ pooro ve tu Ịtẹra ọnịrị ezi anị ẹẹva Abụrahamị ọnịrị Ịnahọ̀. 3#Oyn 12.1-9; Oyn 21.1-3Ama dị Ẹnẹyịmavara sị Abụrahamị hụrẹ akẹnẹ Okuha Iyuhwireti, dị ọ zụ ọ oze va ngụ ẹtẹ Ikanaani nị. Dị Ẹnẹyịmavara mẹ ize yị ọ nị. Dị ọ ma Ayiziiki ana vị ozi ịpaapa ịnị evere anị. 4#Oyn 25.24-26; Oyn 36.8; Ọda 2.5; Oyn 46.1-7Dị Ẹnẹyịmavara sị ezi ẹẹva yị Ayiziiki ana a hị́ Ijekọvụ ọnịrị Iisọ. Dị ọ sị ẹtẹ ịrẹsụ ataba Ịsẹyị yị Iisọ ka ọ vị anị nị. Ama Ijekọvụ ọnịrị ezi anị vana na ra ẹtẹ Ijipiti. 5#Kụra 3.1—12.42Ịrẹma anị Ẹnẹyịmavara vaa tụ́ Imosiisi ọnịrị Eerọnị ka ẹ kụ́ Anisirẹrị nịnị hụrẹ ịzọọ. Dị ọ kụ́ akanya tu wa odivi-odivi tu Anijipiti. Dị ọ vaa kụ aza anị jịnẹ hụụnị Ijipiti. 6#Kụra 14.1-31Ịjị Ẹnẹyịmavara kụ́ ohiku ẹnịnị jịnẹ hụrẹ Ijipiti va ngụ okuha ovivi nị. Dị ọkụrẹkụ Anijipiti nịnị kụ Umaata ọnịrị ịkẹkẹ umaata, dị ẹ dụ wa va ngụ okuha ovivi. 7Ịzọọ Anisirẹrị ya dị ẹ na owu na za Ẹnẹyịmavara, dị ọ sị etohozi jị ẹnịrị Anijipiti ịnẹ nị. Dị ọ ka enyi jẹẹ yị Anisirẹrị dị ẹ jịnẹ ịnị ẹtẹ ọyịwụ ama dị ẹnyị ọnọọ varẹma mụnẹ wa dị e su ẹyị awụ nịnị nị. Anisirẹrị nịnị ẹ̀ẹ ya ịnị ụnọmị ku pooro nị. 8#Ịrị 21.21-35Ịjọnọọ Ẹnẹyịmavara kụ wa na ngụ ẹtẹ Anamọrị ana ya eyi ịzị ọyị zị hụrẹ vẹ akẹnẹ Okuha Ịjọdanị. Aza ẹnẹẹ mẹ̀ kụ́ ịrẹkụ tu wa, dị Ẹnẹyịmavara sị nyị ẹbẹẹba ẹnịnị, dị ẹ dụ wa hụrẹ ịzọọ, dị ẹtẹ ọnọọ kụkụ vị ẹnịnị nị. 9#Ịrị 22.1—24.25Ịbarakị ozi Izipọ ana vị ohinọyị Animowabi me si ka ọnị ọ kụ ịrẹkụ tu wa, dị ọ hị́ Ịbaraamị ozi Ịbẹyọ ka ọ chi hi wa nị. 10Ama Ẹnẹyịmavara ẹ yị tu Ịbaraamị ohi, dị ọ dọ Anisirẹrị ha hụụnị ụvọ ẹnịnị nị. 11#Ijos 3.14-17; Ijos 6.1-21Ụmẹ ọnọọ ẹnịnị jịnẹ okuha Ijodani na ngụ Ijeriko ịzọọ Anijeriko, Anamọrị, Aniperizi, Anikenaani, Anihiti, Anigirigasi Anihivi ọnịrị Anijebusi gẹ ịrẹkụ tu wa nị. Ama dị Ẹnẹyịmavara za ẹnịnị chire wa ụvọ nị. 12#Kụra 23.28; Ọda 7.20Ọnịvị ẹnịnị vị ene zwe yị wa, ẹ yị vị agụvị ọkịta ọnịrị ọpa ne beri ụ̀hwọ̀ ẹnịnị, Ẹnẹyịmavara o tu ọnịvị ẹnịnị angwahi dị e yee zwe nị anka ohinọyị Anamọrị ẹyịva ana ra eyi ịzị ọyị zị hụrẹ vẹ akẹnẹ Okuha Ịjọdanị. 13#Ọda 6.10,11Dị Ẹnẹyịmavara ọ mẹ ẹngwọọrọ yị wa, ọ sị ẹkụra ọnị ẹnịnị ẹ yị da ka ẹ ra a. Dị ẹ yaa rị ịsa ịsọyịrị ọnị ẹnịnị ẹ yị kụ́ ịrịkụ anị nị. 14Dị Ijosuwa ka yị wa ka ẹnịnị e hí angwahi Ẹnẹyịmavara dị ẹ sị ịzẹyịza saasa a ịnị ụmẹ tụra ụmẹ. Dị asị ẹnịnị kụkụ mẹ ori ọnị ohiku ẹnịnị vịdị mẹ̀ akẹnẹ Okuha Ịjọdanị ọnịrị Ijipiti. 15Ama ẹnịnị e yi si ka ẹnị ẹ hẹkẹ Ẹnẹyịmavara, Ẹ nyị ịhị ọnọọ ịsa ọnị ẹnịnị e vaa kụ́ yị. Avị ori ohiku ẹnịnị, avị ori Anamọrị ịzị ẹ yaa aanị. Dị Ijosuwa ka ọnịrị ovwoovu anị vị ana vaa hẹkẹ Ẹnẹyịmavara. 16Dị aza tụ ọ ohi ka ọchoboche! Ẹnị ẹ yị vaa para Ẹnẹyịmavara hu naa hẹkẹ ori. 17Ẹnẹyịmavara ana vị Ohomorihi ẹnịnị aanị, ọ kụ́ ẹnịrị ohiku ẹnịnị hụrẹ Ijipiti ịzị vịdị za ẹnị ọrịhị tụ. Ẹ yị ẹnịnị ọ mẹ ịvọpa irenyi-irenyi ọnị ọ dọ ẹnị ha nị. Ọnị ọnọọ ọnyọọnya, ọ ya pe ẹnị avaba aha tụra aha, dị ọ dọ ẹnị hụrẹ ụvọ anẹkụra ana vọ nị. 18Ịrẹkụ mẹẹ chị yị ẹnịrị Anamọrị ọnịrị Anẹkụra ana vọ, Ẹnẹyịmavara ọ dụ wa jịnẹ kwooze yị ẹnị nị. Dị ẹ Ẹnẹyịmavara ọ vị Ohomorihi ẹnịnị ọnị ẹnị vaa saasa dị ẹnị aa hẹkẹ ẹ. 19Ijosuwa ộ ka yị aza ẹnẹ ka ẹnịnị ẹ yị zụ hẹkẹ Ẹnẹyịmavara, Ohomorihi ọnịnị ọ vị nị; dị ọ kụ̀ ụhị nị. Ọ yi vaa vagu wu ịnị akamawụ ọnịrị ebira odivi awụ nịnị. 20Ẹnịnị èe yi Ẹnẹyịmavara, dị ẹ naa hẹkẹ ori ọzọga nịnị nị, ọnị vaa vara eyi ịrazị tu wa, dị ọnị sị ụya rị wa, dị ọnị wụ̀ wa, ịrẹma ọyịza ọnị ọnị vịdị mẹ̀ yị wa. 21Dị aza tụ́ Ijosuwa ohi ka eyiye, ẹnị vaa hẹkẹ Ẹnẹyịmavara. 22Dị Ijosuwa ka, ẹnịnị ẹ vị onivenu ẹngụ ẹnịnị ka ịzẹyịza ẹ nyị ka ẹnị aa hẹkẹ ẹ nị. Dị avaba ẹnịnị ka ẹnị vị onivenu. 23A vị avọọ yọ, ẹnị ẹ kụ́ ori ọzọga ẹnẹẹ kwooze, di e hị́ eku ka ẹnị vaa wụ́ chire Ẹnẹyịmavara, Ohomorihi Anisirẹrị. 24Dị aza kà a yị Ijosuwa ka ẹnị vaa hẹkẹ Ẹnẹyịmavara Ohomorihi ẹnịnị. Ẹnị vaa saasa ọda anị. 25Agụvị avọọ ẹnịrị Ijosuwa hị́ eku yị ẹngụ ịhị ọnọọ nị. Ịsẹkẹmị ịzọọ ọ ya sị ọda yị wa ẹnẹ ẹ vaa saasa mẹ̀ ẹhẹ ẹnịnị nị. 26Ịzẹyịza, dị Ijosuwa chẹrẹ ọda ẹnẹnị tụ́ ịnị iwe ọda Ohomorihi nị. Dị ọ sị ịrẹta ọbanyị ọnya aanị jẹẹ iruvo ọchị oki ịnị irehi Ẹnẹyịmavara. 27Dị Ijosuwa kà a yị wa ka, ịrẹta ọnọọ ọ vị onivenu ọnịrị wa nị. Ịrẹta ọnọọ ộ wụ́ avaba ịrẹyị ọnị Ẹnẹyịmavara kà yị ẹnị. Agụvị avọọ ọ vaa vị ivenu yị wa, dị ọ mẹ wa ka asị ẹ mẹ̀ akamawụ hi Ohomorihi.
Ê ne Ijosuwa, Ijosẹẹhụ, ọnịrị Eriyaza tụ ẹtẹ ọnị Ohomorihi wo oto anị
28Ịjị Ijosuwa raà kà ịrẹyị anị ta, dị ọ kà yị ọzọza ka ẹ varẹma ẹẹ nọ eehi ẹnịnị nị. 29Ịrẹma ịsa ẹnẹnị, Ijosuwa ozi Inuni ana vị ozi ahụ Ẹnẹyịmavara su nị ịrayị ẹchẹhị tụra ẹẹwụ ọ vị, di o vee su nị. 30#Ijos 19.49,50Ê ne e ịnị ẹtẹ anị ana ya Itiminati-Ịsẹra ịnị ẹkụra ana ya ịrẹsụ ataba Ehwireemi eyi ẹbẹẹba ataba Igaasi. 31Anisirẹrị nịnị ệ hẹkẹ Ẹnẹyịmavara ịnị avaba ụmẹ ọnị Ijosuwa yara, ịrẹma anị ẹnịnị ệ vavọọ hẹkẹ Ẹnẹyịmavara ẹyị ọdọvịdị nịnị ene re ịsa ọnị Ẹnẹyịmavara mẹ̀ yị Anisirẹrị. 32#Oyn 33.19; 50.24,25; Kụra 13.19; Ịjọ 4.5; Ụkọ 7.16Oku Ijosẹẹhụ ọnị Anisirẹrị nịnị sị hụrẹ, Ijipiti vi ene e ne tụ́ Ịsẹkẹmị ịnị ẹtẹ ọnị Ijekọvụ raà hị́ hụrị ụvọ ezi Ihamọ ana vị ada Ịsẹkẹmị. Ijekọvụ vị ana hị́ ẹtẹ ọnọọ isiriva ẹchẹhị. Ezi Ijosẹẹhụ ộ kụ́ ogu ẹtẹ ọnọọ nị. 33Eriyaza ozi Eerọnị ô su, di e ne e tụ́ Igibiya, ẹkụra ana ya ịrẹsụ ataba ẹkụra Ehwireemi. Ozi Ijosẹẹhụ ana aā hị́ Ihwinehasi a sị ẹtẹ ọnọọ yị nị.
Tans Gekies:
Ijosuwa 24: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.