Ijosuwa 2
2
Ijosuwa ộ tụ aza ne re ẹtẹ Ijeriko
1 #
Ihib 11.31; Ije 2.25 Ijosuwa ọ̀ tụ aza ẹnị ẹẹva hụụnị Anisirẹrị ene hi Akasiya ka e were-were ne re ẹtẹ ana ya akẹnẹ irehu Ijodani va ka yị ọnị nị. Dị ọ ka, ẹ zama ẹtẹ ọnọọ re jesi kara Ijeriko. Ịzẹyịza, dị ẹ kwẹẹtẹ dị ẹ na ngụ irehi ọsẹrẹka ọnya aanị ana aa hị́ Ịrahabị zi ẹ ya ịrahụ ọnọọ nị. 2Dị Anijeriko ọnya aanị ene re wa, na ka yị ohinọyị ẹkụra nị. Dị ọ ka â nyị Anisirẹrị ana a tụ́ ka e ve re ẹtẹ ana ngụ ẹkụra ịrahụ ọnọọ. 3Dị ohinọyị Ijeriko vaa tu aza ne tu Ịrahabị ka ọ kụ́ anọrụ ana vẹ ịdị awụ tụ́ ẹhẹ. Aza ẹnẹẹ vị ana tụ́ ve re ẹtẹ agụvị dị aza ẹnịnị ẹ yẹ́ a mẹ vọrọ ka ẹ kụ́ ịrẹkụ ve tu ẹnị. 4Dị Ịrahabị ana kụ́ anọrụ ẹẹva ẹnẹẹ tẹ aanị tụ́ wa ohi ka ẹnịnị ẹ̀ẹ ve ịda anị ama ọnị ẹ yị yẹ ịzị ẹ hụrẹ vẹ. 5Ẹtẹ me hozi kẹnẹ, dị a vee gu oze ọbanyị ẹkụra ẹ jịnẹ tụ́ ẹhẹ nị. Ọnị ọ yị yẹ ịzị ẹ zị. E jintu du wa ẹyịyara a zụ saasa wa oze. 6Ama Ịrahabị òo raa kụ́ wa tẹ iruvo ọchị akụ ene hi ịrẹsụ utu anị. 7Dị ọnụtụ ohinọyị ẹnẹẹ kụ chire wa ee si wa na nị, obobooro ọnị ẹ jịnẹ tụ́ ẹhẹ ée gu oze ọbanyị ẹkụra nị. Dị ẹnịnị vavọọ sị wa oze na ngụ aba gẹrẹ-gẹrẹ ana zị jịnẹ irehu Ijodani nị. 8Ịrahụ ịhị ọnọọ, dị aza ene ve re ẹtẹ aanị vaa sụ́, dị Ịrahabị hịrẹ ne tu wa ịrẹsụ utu, dị ẹ ka ịrẹyị nị. 9Dị ọ ka yị wa ka ọnị ọ yẹ ka Ẹnẹyịmavara ọ̀ raa sị ẹtẹ ọnọọ yị wa. Avaba ẹnịnị vị ene hí angwa, dị ivoovo sị ẹnị za. 10#Kụra 14.21; Ịrị 21.21-35Dị ọ rẹ ka ẹnị ẹ wụ́ Ẹnẹyịmavara mẹmẹ ka ẹtẹ ọ wụ́ yị wa dị ẹ jịnẹ ịnị akakana irehu ovivi ẹ mẹ hụrẹ Ijipiti aa vẹ. Avọọ ẹnị mẹ rẹ wụ́ ịrẹyị ene tu Isihoni ọnịrị ogu ana vị ohinọyị Anamọnị eyi ịzị ọyị zị hụrẹ vẹ, akẹnẹ irehu Ijodani. Avaba aza ẹnịnị vị ene vú ẹtẹ bemi-bemi. 11Dị ọ ka ẹnị mẹ maanị wụ́ ịvọpa ọnọọ kẹnẹ ayị ẹnịnị sụ́ ẹnyị hi ẹtẹ nị. Ẹ yị nyị ọza ọnị ayị anị vị ọyị nọ ịrẹkụ. Ẹnẹyịmavara ana vị Ohomorihi ẹnịnị ọ vị Ohomorihi ene hu keekere, Ọnị ọ nyị ẹba nyị ụvẹtẹ nị. 12Dị Ịrahabị ka ẹnịnị ẹ sị Ẹnẹyịmavara hị́ eku ka ẹnị vaa nyị ayamva yị ovwoovu anị agụvị ka ọnị ọ gụ́ wa ụvọ. Dị ọ ka ẹ̀ mẹ̀ ịsa ana vaa vị ivenu ka 13ẹnịnị ẹ yị vaa wụ́ ada ọnịrị ọnyị anị, ne beri ẹyịnyara ẹnịnị aza ẹnịnị. 14Dị Anọrụ ẹnẹẹ tụ́ ozu hị́ eku ka ẹnị ẹ yị vaa wụ́ wa ịnị ụmẹ ọnị Ẹnẹyịmavara ọ sị ẹtẹ ọnọọ yi ẹnị. Ama asị Ịrahabị kụ uruvo ẹnịnị hi ẹhẹ. 15Irehi Ịrahabị vị ana aa da ka ọvọ ẹkụra. Dị ọ sị ọvọ yi wa ọnị e si chi hi ẹtẹ zị oze ịnị ozokete ịrẹma ọvọ ọnọọ nị. 16Dị Ịrahabị ka yị wa ka ẹ na tẹ̀ ịrẹsụ otutu agụvị asị ẹnịrị aza ene si wa gẹ. Ẹnịnị ẹ tẹ da ịzọọ ẹkụhị ẹẹta, dị aza ẹnẹẹ ẹ va ịrẹsụ vẹ dị ẹnịnị ẹ vaa zị oze ẹnịnị. 17Dị Anọrụ ẹnẹẹ vaa na, dị ẹ ka yọ ka ẹnị ẹ yị vaa jịnẹ ịrẹyị ọnị ọ mẹ̀ ẹnị hị́ eku anị. 18Dị ẹ ka ịjị ẹnị ẹ ngụ ẹkụra ọnọọ, Ịrahabị ọ sị uyi ovivi gẹ ozokete ọnị ẹ zị chi hi ẹtẹ. Dị ọnịrị Ada anị ọnyị anị, ẹyịnyara anị ọnịrị aza ẹnịnị ẹ gụ hị́ ịnị irehi anị. 19Ama ẹnẹ yị vaa nyị ụvọ tu ịnị usu ọza tura ọza ana aa jịnẹ hụụnị ịnị irehi ọnọọ tụ́ ẹhẹ ịnị ụpatẹsị nị. 20Dị ẹ rẹ ka ẹnị ẹ yị vaa rị ịvị anị ọ̀ọ sị irenu anị kwoku. 21Dị Ịrahabị ka ooho, dị ọ ku wa nyaatụ, dị anọrụ ẹnẹẹ hụrẹ ịzọọ aa na nị. Dị Ịrahabị kuru achị ovivi gẹ ozokete anị nị, 22Ịzẹyịza, dị ẹnịnị na tẹ̀ ịrẹsụ otutu ẹkụhị ẹẹta ịjị aza ana aa tụ ne sị wa ẹ yị re wa, dị ẹ vavẹ va ngụ ẹkụra ọnọọ nị. 23Ịjị ẹnịnị re ka ẹ si hu, dị ẹ tụ̀ hụrẹ ịrẹsụ otutu ọnọọ, dị jịnẹ irehu Ijodani ne tu Ijosuwa hị́. Dị ẹ ka a zụ ọ avaba ịsa ọnị e re nị. 24Dị Ijosuwa ka ịzẹyịza, Ẹnẹyịmavara ọ raa sị ẹtẹ ọnọọ yị ẹnị nị. Agụvị avọọ angwa ẹnịnị e hi aza ẹnẹ ya ịzọọ nị.
Tans Gekies:
Ijosuwa 2: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.