Ọdọvịdị 6
6
Animidiya ệ mẹ ẹvaya yị Anisirẹrị nịnị
1Anisirẹrị nịnị ệ mẹ̀ ebira odivi hi Ẹnẹyịmavara, dị ọ hụrẹ wa ụvọ yị Animidiya ịrayị ịhịmba nị. 2Agụvị ka Animidiya nịnị aa chamayị yị wa di e zwe na tẹ̀ ịnị ataba ọnịrị ụtẹha nịnị nị. 3Ụmẹ ọnị Anisirẹrị nịnị ẹ̀ẹ sị chire ịsa tụ ịnị aarẹ, dị Animidiya beri Anamarẹkị ẹnịrị anẹkụra nịnị ene hi eyi ịzị ọyịị̄ vẹ rẹ kụ ịrẹkụ tu wa. 4Dị ẹ jị ajẹngụ ẹnịnị tụ ịnị ẹtẹ ẹnịnị, di e du ịsa ịnị aarẹ ẹnịnị ha hụrẹ eyi ụvẹtẹ va ngụ ojesikara Igaza, dị ẹ kụ avaba atẹmẹ, imaaru, ịkẹrịkẹtẹ Anisirẹrị nịnị, dị ẹ tụ wa avosusu. 5Ẹnịnị àa vẹ dị ẹ kụ ịsụpa ọnịrị ajẹngụ ẹnịnị, dị ẹ rụrụ anka akụvarịva avọọ. Ọza ẹ yị zụ za wa ịrịka ẹ mẹ rụrụ ẹnẹmẹhị, di e du ẹtẹ nị. 6Agụvị ka Animidiya ệ tụ Anisirẹrị nịnị avosusu, di e nowu na za Ẹnẹyịmavara kà ẹ mẹ ọgụ yị ẹnị nị. 7E mee nowu na za Ẹnẹyịmavara Ohomorihi ẹnịnị agụvị Aninimidiyani nịnị, 8dị ọ tụ́ ọnịsẹ ana ka enube yị wa nị. Ẹnẹyịmavara kà ọnị ọ sị wa hụụnị udi ọrịhị ana a za wa Ijipiti nị. 9Ọ kà ọnị ọ dọ wa hụrị ụvọ Anijipiti nịnị ọnịrị aza ene beri wa kụ́ ịrẹkụ ịnị ẹtẹ ọnọnị nị. Ọnị ộ dụ wa jịnẹ Anisirẹrị maa ngụ ịzọọ, dị ọnị sị ẹtẹ ẹnịnị yị wa nị. 10Ẹnẹyịmavara kà ọnị ọ vị Ohomorihi ẹnịnị nị. Asị ẹ hẹkẹ ori Anamọrị ana nyị ẹtẹ ịzị ẹ ra. Ama Anisirẹrị nịnị ẹ yị wụ́ anị.
Ẹnẹyịmavara ộ nyị Igidiyọnị
11Ẹkụhị ọnya, dị anggẹẹrị Ẹnẹyịmavara na yaatụ iruvo ọchị ooki ana ya ohwira. Ijowasi ana vị Anabiyeza ộ nyị ọchị ọnọọ nị. Ozi anị Igidiyọnị ô were-were ee tụ́ ihwiti ịnị ụkọ, agụvị asị Animidiya re e. 12Ịzọọ anggẹẹrị ya sị ẹngụ zụ ọ, dị ọ pe Igidiyọnị ka ịrẹyị nị, ọ kà Ẹnẹyịmavara ya pe e wu, ọkụrẹkụ ọbanyị.
13Dị Igidiyọnị kà, Aarịhịnị àa zẹ ka ọnị họ̀ use ịrẹyị, Nda, Ẹnẹyịmavara ọ̀ọ ya pe ẹnị, sị ẹ vẹ dị avaba odivi ẹnẹnị ee tụ́ ẹnị? Ịzị ohyozirenu ọnị ohiku ẹnịnị pa ịta ka Ẹnẹyịmavara ộ mẹ̀ ọnị ọ kụ wa hụrẹ Ijipiti ya? Ẹnẹyịmavara ọ raà va ịrẹma ẹnịnị, dị ọ hụrẹ ẹnị ụvọ yị Animidiya. 14Dị Ẹnẹyịmavara ọnị ụvọta kà Igidiyọnị vaa nyị ụkata, agụvị avọọ ọnị aa gụ ọ ụvọ, dị ọnị sị ụkata yọ ka ọ sị dọ Anisirẹrị nịnị ha hụụnị ụvọ Animidiya. 15Igidiyọnị tụ ọ ohi, dị ọ kà, “Ọga, Mmẹ mẹ zụ dọ Anisirẹrị nịnị ha? Ịrẹsụ amị ọ vị ọkụmị hu ịnị ẹtẹ Ịmanasẹ, ẹma rẹ va nẹtẹ hu kere-kere ịnị ovwoovu amị nị.” 16Dị Ẹnẹyịmavara kà a yị Igidiyọnị ka ọ zụ mẹ̀ ẹ agụvị ka ọnị vaa gụ ọ ụvọ. O vee huna Animidiya nịnị anka ọza rere ee tu ọza ịnya avọọ nị. 17Igidiyọnị ô va ohi ka, Ẹnẹyịmavara ọ̀ọ nyị ọnị iyi, ọ sị apọtẹrẹwa zụ ọnị ka ọnị ọ vị Ẹnẹyịmavara nị. 18Dị ọ ka Ẹnẹyịmavara ọ jẹẹ zi ọnị, dị ọnị ọ sị ịsa ịsọvọ va yọ nị. 19Ịzẹyịza, dị Igidiyọnị ngụ eehi, dị ọ wụ ozi ẹvụ, dị ọ sị ayị ikirogirami ẹẹwụ mẹ ụbụrẹẹdị ẹnẹ ẹ yị nyị owu nị. Ịjị uye sị vị, dị ọ kụ ọ hi ini uji, dị ọ va ẹpẹ hi ini ụnọkọ, dị ọ kụ avaba ịsa ẹnẹẹ na yị anggẹẹrị Ẹnẹyịmavara iruvo ọchị ooki nị. 20Dị anggẹẹrị Ohomorihi kà yọ ka ọ sị uye ọnịrị ụbụrẹẹdị tụ ịrẹsụ ịrẹta, dị ọ vaa ẹpẹ kụ ọ. Di Igidiyọnị mẹ̀ ẹ anka anggẹẹrị ọnọọ mẹ kà a nị. 21Anggẹẹrị Ẹnẹyịmavara ộ sị ịrẹsụ okutẹ ọnị ọ sị rị ụvọ kanyị uye ọnịrị ụbụrẹẹdị, dị ịra kwẹẹtẹ hụụnị ịda, dị ọ rị ịsa ẹnẹẹ nị. Obobooro ọnọọ dị anggẹẹrị ọnọọ vu nị. 22Ịjị Igidiyọnị vavọọ re e, eyi anị ve hweyi ka oni ô ree re Anggẹẹrị Ẹnẹyịmavara nị. Dị Igidiyọnị, da ịpẹ yị Ẹnẹyịmavara Ohomorihi ka ọnị ọ sị anggẹẹrị anị re. 23Ama dị Ẹnẹyịmavara tụ ọ ohi ka ọ sị ayị nẹtẹ, asị o hí angwa ka o yi vee su. 24Dị Igidiyọnị hì ụta tụ ịzọọ yị Ẹnẹyịmavara, dị ọ hị́ ọ Ẹnẹyịmavara Ẹngwọọrọ.
Igidiyọnị gara ụta ori Ịbaarị ha
25Ịrahụ ịhị ọnọọ, Ẹnẹyịmavara kà yị Igidiyọnị ka ọ̀ sị ụnọ ịrayị ịhịmba ana vị ọgwọhụva ịnị ụnọ ada anị ene zoza. O wu ụta Ịbaarị ana vị ori ada anị, dị ọ dà ọchị ana a sị mẹ uyi ori ọnẹẹ ana a hị́ Asẹra ene hi jẹẹ akaha anị. 26Ọ kà Igidiyọnị o re hi ụta a mẹ vọrọ yị ọnị tụ ịrẹsụ ataba, dị ọ kụ ọkụ ọchị uyi Asẹra ene e che hi ẹtẹ, dị ọ kụ ọ rị avaba ụnọ ịsọvọ ọnọọ ịra. 27Igidiyọnị ộ kụ ezi ahụ anị ịhịmba, dị ọ mẹ̀ ịsa ọnị Ẹnẹyịmavara kà yọ nị. Agụvị ka Igidiyọnị ô hí angwahi ịsị anovwoovu anị ọnịrị anẹkụra anị vaa mẹ̀, dị ọ mẹ avaba ịsa ẹnẹnị ịrahụ nị. 28Ịjị anẹkụra ọnọọ ha ẹnẹnẹ viri-viri eyinẹhẹ anị, di e re ka â sị ụta Ịbaarị ọnịrị uyi Asẹra wu, dị a rị ụnọ ịra ịrẹsụ ụta ọwọọwa ene hi tụ ịzọọ nị. 29Ẹnịnị ệ họ̀ ẹngụ use ka ẹnẹ vavọọ mẹ̀? Dị ẹ tangwa kụ́ ahụ anị ne tu ka Igidiyọnị ozi Ijowasi ộ vavọọ mẹ nị. 30Dị Anẹkụra nịnị ka yị Ijowasi ka ọ sị ozi tụ ẹhẹ, dị ẹnị ẹ wụ̀ ọ. Oni o wu ụta Ịbaarị, dị ọ dà ọchị ana a sị mẹ uyi Asẹra tụ̀ akahị Ịbaarị nị. 31Ama dị Ijowasi tụ́ aza ana zyaazị hi ọ ohi, dị ọ ka ẹnịnị wáá vụ ịrẹvụ yị Ịbaarị nị? Ẹ wáá họ̀ oponu ịrẹyị anị nị? Ọza tụra ọza anaa jẹẹ yị ibaari vị ana a vaa wụ̀ dị eyi ọ vaa nị. Ịbaarị ọ̀ọ vị ori, ọ vụ ịrẹvụ yị ẹngụ anị. Ọnị ọ nyị ụta ana wu nị. 32Hụrị ụmẹ ọnọọ a kụkụ aa hị́ Igidiyọnị Ijerubaari agụvị ka ọ kà a ka Ịbaarị ọ vụ ịrẹvụ ẹngụ agụvị ụta anị ọnị ọnị wụ.
Igidiyọnị ô huna Animidiya
33Ụmẹ ọnọọ avaba Animidiya, ọnịrị Anamarẹkị ne beri Aza ene hi akẹnẹ Ijodani jịnẹ enyi na jị udi tụ inozi Ijezirẹẹrị nị. 34Ụhwẹ Ẹnẹyịmavara va ku Igidiyọnị dị ọ hu ọpanyị ịrẹkụ hị́ anọrụ Anabiyeza ka ẹ saasa ọnị nị. 35Dị ọ tụ́ aza ngụ avaba ẹtẹ Ịmanasẹ ka ẹ hị́ wa ka ẹ saasa a nọ ịrẹkụ nị. Avọọ ọ mẹ rẹ tụ́ hị́ Anaseri, ọnịrị Anizeburuni beri inahwitari nị. Dị avaba ẹnịnị saasa a nị. 36Dị Igidiyọnị ka yị Ẹnẹyịmavara kà ọ̀ọ ro o ka ọnị aa dọ Anisirẹrị ha zị oze ịnị ụvọ anị. 37Ọnị vaa sị òwù ochiche tụ́ ịrẹsụ ịda aha ụkọ nẹẹhẹ. Eyinẹhẹ anị eguhi òo chire ku o, dị ẹ yị tu eteesu, dị ọnị yẹ ka Ẹnẹyịmavara vaa sị ọnị dọ Anisirẹrị nịnị ha. 38Avọọ gẹdẹ-gẹdẹ Ẹnẹyịmavara mẹ mẹ̀ ẹ nị. Ịjị Igidiyọnị kwẹẹtẹ eyinẹhẹ anị, dị ọ kama enyi òwù ọnọọ ene hi ẹnya ọnyịnụvọ ọnya nị. 39Dị Igidiyọnị ka asị Ẹnẹyịmavara du ayị hi ọnị ka ọnị aa yịị họ̀ use ịrẹyị ọsa. Aarịhịnị, ọ jẹẹ ka ọnị ree tenyi zama eyi ọnọọ re. Ụpọhụva ọnọnị eteesu ana kara ọnị nyị ẹnyị ama dị ẹyị ọọ wụ. 40Ịrahụ ọnọọ, dị Ohomorihi vavọọ mẹ̀ ẹ gẹdẹ-gẹdẹ. Eyinẹhẹ dị ẹyị ọnọọ wụ́ kokoroko ama dị eteesu hunẹnẹ eguhi me chire nị.
Tans Gekies:
Ọdọvịdị 6: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.