Ọyịkụra 20
20
Ọda Ohomorihi ẹẹwụ
(Ọda 5.1-21)
1Ohomorihi ộ kà avaba ịrẹyị ọnị maa vaa kà aanị. Ọ kà, 2“Ẹma vị Ẹnẹyịmavara ana vi Ohomorihi awụ nị. Ẹma tụ̀ wụ hụrẹ Ijipiti ịzị ụ vịdị vị ọrịhị tụ́ nị. 3Wẹ yị nyayịnẹ mẹ ori ọnyọọnyị. Ẹmị ịnya kẹnẹ ụ vaa hẹkẹ nị. 4#Kụra 34.17; Ire 19.4; 26.1; Ọda 4.15-18; 27.15Wẹ yị nyayịnẹ na bẹ ịsa vene ịsa ọnyọọnyị dị waa hị́ ọ ori. Asị ụ na bẹ ịsa vene ịsa ọnyọọnyị ana yà ẹbẹẹba, àa vị ịsa ana yà iruvo ẹtẹ. Asị ụ rẹ na bẹ ịsa vene ịsa ọnyọọnyị ana yà ini enyi. 5#Kụra 34.6,7; Ịrị 14.18; Ọda 7.9,10Wẹ yị nyayịnẹ hẹkẹ wa. Ẹma vị Ẹnẹyịmavara ana vị Ohomorihi awụ nị. Me mē sì ka ọza ò sì ịrẹyị amị di ò re kuku ne sì ịrẹyị ori. Ọza ọ̀ọ nyị ịhyẹrẹ amị ịvị ọ mẹ avọọ nị. Maa sị ụya anịị rị ọ ne beri ozi anị ọnịrị aazị anị ne chire ẹmaazị anị. 6Ama ọza ene èe sì ịrẹyị amị, dị ọ jẹẹ pè ọda amị nị, emi re vee sì ịrẹyị ọza ọnọọ ọnịrị ezi ana vana a hụrẹ ịpa anịị vẹ pooro-pooro. 7#Ire 19.12Wẹ yị nyayịnẹ sị ịrẹha Ẹnẹyịmavara ana vị Ohomorihi awụ hị́ eku ireche, ẹmị Ẹnẹyịmavara vị ana aa sị ụyaa rị ọ. 8#Kụra 16.23-30; 31.12-14Waā za ido ẹkụhị ụhwọtụ. Yẹ ka ẹkụhị irenyi ọ vị yị Ohomorihi nị. 9#Kụra 23.12; 31.15; 34.21; 35.2; Ire 23.3Ịnị akakana ẹkụhị ịhịnọnyị mẹ avaba ụkọrọ ọnị ụ wàa mẹ. 10Ịhị ẹ tụ́ ọ ẹkụhị ịhịmba vị ẹnẹ ẹmị Ẹnẹyịmavara nyị ka ọ̀ vị ẹkụhị ụhwọtụ. Ịhị ọnọọ wẹ yị nyayịnẹ mẹ̀ ụkọrọ ọnyọọnyị Ẹwụ ụvọta ọ yị nyayịnẹ mẹ. Ozi ewu ana vị ọnọrụ àa vị ọnẹẹ ẹ yị nyayịnẹ mẹ̀ ụkọrọ ịhị ọnọọ. Ozi ahụ awụ ọnịrị ọzọga ene hi ịda awụ ẹ yị va nyayịnẹẹ mẹ̀ ụkọrọ ọnyọọnyị ịhị ọnọọ. 11#Oyn 2.1-3; Kụra 31.17Wáā yẹ ka ẹkụhị ịhịnọnyị ẹmị Ẹnẹyịmavara sị mẹ ẹbẹẹba ọnịrị eteesu nị. Dị mị rẹ mẹ òkū ọnịrị avaba ịsa ene hi ịnị anị nị. Ịhị ẹ tụ́ ọ ẹkụhị ịhịmba di mị tụ́ ụhwọ nị. Dị ẹmị Ẹnẹyịmavara mẹ ẹkụhị ụhwọtụ ẹkụhị ọbanyị, dị mị nyị ọ tụ́ irenyi yị ẹngụ amị nị. 12#Ọda 27.16; Imt 15.4; 19.19; Ịmk 7.10; 10.19; Irk 18.20; Ẹhw 6.2; Ẹhw 6.3Sị ụbanyị yị ọnyị awụ ọnịrị ada awụ agụvị di we zụ kú orubo ịnị ẹtẹ ẹnị ẹmị Ẹnẹyịmavara ana vi Ohomorihi awụ aa sịị yị wụ. 13#Oyn 9.6; Ire 24.17; Imt 5.21; 19.18; Ịmk 10.19; Irk 18.20; Iro 13.9; Ije 2.11Wẹ yị nyayịnẹ wụ̀ ọza. 14#Ire 20.10; Imt 5.27; 19.18; Ịmk 10.19; Irk 18.20; Iro 13.9; Ije 2.11Wẹ yị nyayịnẹ sẹ̀ ịrẹka. 15#Ire 19.11; Imt 19.18; Ịmk 10.19; Irk 18.20; Iro 13.9Wẹ yị nyayịnẹ yị oyi. 16#Kụra 23.1; Imt 19.18; Ịmk 10.19; Irk 18.20Wẹ yị nyayịnẹ dọ ivenu ireche kú ọza. 17#Iro 7.7; 13.9Asị ụ mẹ eyọhụrẹ hi irehi ọza. Asị ụ rẹ mẹ eyọhụrẹ hi ose ọza. Asị ụ mẹ eyọhụrẹ hi ozi ahụ ọnọrụ àa vị ọnẹẹ ọza. Asị ụ mẹ eyọhụrẹ hi imaaru àa vị ịkẹrịkẹtẹ anị. Asị ụ mẹ eyọhụrẹ hị́ ịsa tura ịsa ọnị ọza ọ̀ọ nyị.” 18#Ihib 12.18,19Aza ẹnẹẹ ê re apaana ihinẹba màa há, dị ịnyanya aa rị, dị ẹ wụ́ ọpanyị màa sụ́ ịrẹyị nị. Di e re re ka ataba aa dá areyi nị. Dị angwa ee hi wa, di ẹ yaa dá ẹgahị nị. Dị ẹ jẹẹ ẹ́nẹẹnẹ, 19dị ẹ ka Imosiisi ọnị ụvọta ọ̀ọ kà ịrẹyịị yị ẹnị ka ẹnị vaa wụ́ nị. Ẹ ka asị Imosiisi kà a ka Ohomorihi ọ̀ kà ịrẹyị yị ẹnị ka ẹnị ve wusu. 20Di Imosiisi ka, “Asị u rè hí angwa nịnị. Ohomorihi vị ana va zama wụ nịnị re. Ee sì ka wee hí angwa anị nịnị agụvị dị asị ụ na mẹ̀ ịvị nịnị.” 21Dị aza ẹnẹẹ jị jẹẹ ẹ́nẹẹnẹ di Imosiisi ọnị tere pè ịzị Ohomorihi yà ene hozi jijiji nị.
Ọda ụta
22Dị Ẹnẹyịmavara rẹ kà a yị Imosiisi dị ọ ka, “Ẹwụ nịnị ụvọta o si o re ka ẹbẹẹba mị yà kà ịrẹyịị wụ nịnị nị. 23Wẹ yị nyayịnẹ na sị igooru àa vị enyusẹ akàaka bẹ ori dị waa mẹẹ nịnị ne beri ẹmị ọnị ụ waa hẹkẹ nịnị. 24Tụ ụvụ dụ wa sị jị ụta mị nịnị. Ẹvụ ọnịrị imaaru ọnị ụ wàa sị va mẹ̀ ịsọvọ ana aā rị ịra, dụụ rị ọ ịra ịrẹsụ ụta ọnọọ nịnị. Wàa raa mẹ̀ ịsọvọ ene e duduū rị, ịrẹsụ ụta ọnọọ ụ rẹ vaa yàa mẹ̀ ẹ mị nịnị nị. Ịzị màa nyị ka wa yàa hẹkẹ mị nịnị, ịzọọ mị vaa yàa mẹ ka ò zee wu nịnị nị. 25#Ọda 27.5-7; Ijos 8.31Wàa ka waa sị ịrẹta jị ụta mị nịnị, asị ụ sị ịrẹta ana há jị ọ nịnị. Wàa sị ịsa nya ịrẹta ẹnẹẹ, vi u dụ wa ẹngụ avọọ nị. 26Wàa jị ụta mị nịnị, asị ụ mẹ̀ ọbana oze ana a zịị hịrẹ naa ngụ ịnị anị nịnị agụvị asị ahwaahụ anị tụ ẹhẹ vaa tụra ụta anị.”
Tans Gekies:
Ọyịkụra 20: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.
