Ọda 4
4
Anisirẹrị nịnị ẹ̀ bẹdọ saasa ịrẹyị Ẹnẹyịmavara
1Ụmẹ ọnọọ Imosiisi ộ hị́ Anisirẹrị, dị ọ̀ ka, Ẹwụ nịnị Anisirẹrị navọ wa saasa avaba ọda Ẹnẹyịmavara ọnị maa sị zụ wụ nịnị aanị, wàa dọ ọ, eyi awụ Ẹnẹyịmavara ana vị Ohomorihi ohiku awụ nịnị aa sị ẹtẹ ọnọnị yị wụ, dị ọ̀ vị awụ nịnị nị. 2#Ẹtẹ 22.18,19Asị ụ da tụ́ ịnị ọda ọnọọ, asị ụ da hụụnị anị, saasa avaba ọda anị ọnị mị ra ka yị wụ. 3#Ịrị 25.1-9Ẹwụnị ụvọta ò re ịsị ọnị Ẹnẹyịmavara mẹ̀ Ịbaarị-Ịpẹyọ. Avaba aza anaa mẹ̀ ori ịzọọ ô vú ẹtẹ nị. 4Ẹwụ nịnị ana sị ịzẹyịza saasa a kẹnẹ ọ̀ yara ve tù ịhị ọnọọ nị. 5Imosiisi ka, ọnị ọ̀ ra sị avaba ọda zụ wa anka Ẹnẹyịmavara Ohomorihi anị mẹ ka yị ọnị. Ẹnịnị ẹ̀ saasa a ịzị ẹ̀ yaa va dọ dị ọ vị ẹ̀nịnị aanị. 6Ẹnịnị mẹmẹ sị ịzẹyịza saasa a ọ̀ vaa sị zụ anẹkụra ana vọ ka ẹnịnị ẹ yẹ ịrẹyị nị. Anẹkụra ẹnẹnị ẹ̀ wụ́ ịrẹyị ọda, dị ẹ yaa ga wa ka ẹ̀ nyị ịrẹyọyẹ ẹnẹmẹhị. 7Nyị anẹkụra ọsa ana nyị ori ana gụrị wa anka Ẹnẹyịmavara Ohomorihi mẹ gụrị ẹnị. Ụmẹ tụra ụmẹ ọnị ẹnị ẹ̀ hị́ ọ kẹnẹ ọọ̄ wụ ẹnị nị. 8Nyị anẹkụra ẹnyẹnyị ana maanị nyị ọda ana vọrọ anka ọda ọnị ọnị aa sị zụ wa ajịnị. 9Ẹnịnị ẹ sị eyi pe ẹngụ ẹnịnị, dị asị a nyị ụmẹ ọnị ẹ sị hi ayị ịsị ẹ sị eyi ẹnịnị re. Ẹ pa ịta zụ ezi ọnịrị aazị ẹnịnị. 10Ẹ̀ẹ tamayị ịhị ọnị ẹ jẹẹ ọvịdị Ẹnẹyịmavara ịnị ataba Ịhọrẹbị avọọ? Ịhị ọnọọ vị ọnị Ẹnẹyịmavara kà yị Imosiisi ka ọ hị́ ịragụ vẹ ọvịdị anị, dị ẹẹ wụ́ ịrẹyị anị. Ẹ̀ẹ sị wụ, ẹ vaa nyị angwahi anị ịnị avaba ẹhẹ ẹnịnịị. Ẹnịnị ẹ na sị ịrẹyị ẹnẹẹ zụ ezi ẹnịnị, dị ẹẹ mẹ̀ ẹ. 11#Kụra 19.16-18; Ihib 12.18,19Anisirẹrị ẹ ka ẹ yị ezi ẹnịnị ẹnị mẹmẹ jẹẹ iruvo ataba ene eguhi chire ku, dị o hozi ruma-ruma anka areyi dị ịra aa za na ngụ ẹbẹẹba. 12Ka yị wa Ẹnẹyịmavara mẹ̀ pe ẹwụ nịnị ka ịrẹyị, hụụnị ịra, dị waa wụ ọngwẹ anị kẹnẹ, dị ẹ yị nyị ịsị ụ re nịnị. 13#Kụra 31.18; 34.28; Ọda 9.10Ẹnẹyịmavara ộ ka yị wụ nịnị ịsị waa mẹ dị wa sị ụvọ za oto ọnịrị ọ mẹ̀; Dị waa mẹ̀ ịsị ọda ẹẹwụ ana a chẹrẹ tụ́ ịnị ịrẹta ụvọta ẹẹva ka. 14#Kụra 21.1Imosiisi ka ộ ka yị ọnị ka ọnị ọ zụ wa avaba ọda agụvị dị ẹ saasa ịzị ẹnịnị aa va dọ dị ọ vị ẹnịnị.
Imosiisi ộ kà aza ọnọ ka asị ẹ hẹkẹ ori
15Ẹnẹyịmavara mẹ̀ beri ẹwụ nịnị ka ịrẹyị hụụnị ịra ịrẹsụ ataba Ịsịnayị ẹ yị nyị ịsọnyịsọnyị ọnị ụ rẹ. Ẹnịnị ee sị ọyịza yị ẹngụ ẹnịnị, ẹ sị eyi pe ẹngụ ẹnịnị. 16#Kụra 20.4; Ire 26.1; Ọda 5.8; 27.15Asị ẹnịnị mẹ̀ ebira odivi na ku ịsa ẹnyẹnyị jẹẹ dị ọ vị ori ẹnịnị, dị ọ hyakụ ve vene ọnọrụ a vị ọnẹẹ, 17#Iro 1.23a vị uye, a vị inomi, 18a vị ẹwụ, a vị ivovo. 19Asị ẹ zẹ ka ayị ẹnịnị o vene ẹnị dị ẹẹ hẹkẹ ọyị a vị ụhwẹ ọnịrị ụzọmị ene e yee re ịnị ihinẹba. Ẹnẹyịmavara ana vị Ohomorihi ẹnịnị vị ana navọ anẹhẹ ana vọ ka ẹẹ hẹkẹ ẹ. 20#Kụra 19.5; Ọda 7.6; 14.2; 26.18; Ịta 2.14; 1 Ipi 2.9Ama Ẹnẹyịmavara vị ana dọ ẹnịnị ha hụrị Ijipiti ana sị mẹ anka ịra avọọ. Ọ kụ wụ nịnị jịnẹ hụụ ịzọọ ka ẹnịnị ẹ vị aza anị anka ẹ mẹ ya ajịnị aanị. 21#Ịrị 20.12Imosiisi ka, agụvị ẹnịnị Ẹnẹyịmavara Ohomorihi ẹnịnị sị du ayị hi ọnị, dị ộ hị́ eku ka ọnị ẹ yị vaa jịnẹ irehu Ijodani na ngụ ẹtẹ ozoza ọnị ọnị aa sị yị wụ nịnị. 22Ọnị ẹ yị vaa jịnẹ irehu Ijodani naa ngụ akẹnẹ, ịzẹnị ọnị vee su tụ nị. Ama booro aanị, ẹ ya vaa jịnẹ enyi na dọ ẹtẹ ozoza ọnọọ. 23Avọọ, ọnị e su ịnị ẹtẹ ọnọnị, dị asị e hi ayị oto ọnị ẹnịrị Ẹnẹyịmavara Ohomorihi ẹnịnị mẹ. Ẹ saasa ọda, dị asị ẹ mẹ̀ ori ẹnyẹẹnyị, 24#Ihib 12.29agụvị ka Ẹnẹyịmavara Ohomorihi ẹnịnị sị mẹ anka ịra akịna avọọ. Ọọ kụ ụhị nị. 25Ịjị wàa na raà ma ezi, dị ụ kụ aazị dọ nị, di u si ku ịnị ẹtẹ ọnọọ nị, asị ụ na mẹ ori ẹnyẹẹnyị ene vee du u nịnị ẹngụ. Ebira odivi ọ vị eyi Ẹnẹyịmavara nị. O vee du ọ ayị nị. 26Imosiisi ka ọnị ọ sị ẹbẹẹba ọnịrị ẹtẹ mẹ ivenu yị wa ka ẹnịnị ẹ̀ẹ mẹ akamawụ hi ọnị, ịjjịjọo e ye vu ẹtẹ nị. Ẹnịnị ẹ̀ yị vaa ra gọdọ ịnị ẹtẹ ana ya akẹnẹ irehu Ijodani ọnị ẹ yaa vaa dọ, dị ẹ ra ini anị. Ẹnịnị vi ene vee vu ẹtẹ saka-saka. 27#Ọda 28.36Ẹnẹyịmavara vị ana vaa gara wa hi ịrẹsụ ẹhẹ, dị ahịka aza chee ẹnịnị kẹnẹ ọ ha nị. 28Ẹnị ene hi ẹhẹ vị ana vaa hẹkẹ ori nịnị ọnị ọzarẹyịrẹsụ sị ụvọ anị mẹ̀, ọchị ọnịrị ịrẹta. Ori ẹnịnị ẹ yị zụ re ẹtẹ, ẹ yị zụ wụ̀ ịrẹyị, ẹ yị zụ rị ịsa, dị ẹ hyakụ zụ wụ̀ agụ ịsa. 29#Ijer 29.13Ịnị ẹkụra ẹnẹẹ, ẹnịnị vee si Ẹnẹyịmavara Ohomorihi ẹnịnị, ẹ̀ ẹ sị avaba ayị ẹnịnị si ọ, e vee re e. 30Ụmẹ ọnị ụya aa rị wa, dị ẹngụkata ẹnẹnị ee tù wa nị, ịjọnọọ ẹ vaa varẹma ka Ẹnẹyịmavara na, dị ẹ wụ̀ chire e. 31Agụvị ka Ẹnẹyịmavara Ohomorihi ẹnịnị vị anayamva, ọ yị vaa yi wa tịtẹ, a vị ka o vu wa ẹtẹ. Ọ yị vee hi ayị oto oni o wo yi ohiku ẹnịnị, dị ọ hị́ eku tụra a ịrẹsụ. 32Ọ kà e họ̀ use ịsa ana mẹ̀ ịyẹẹyẹ, dị a va yẹ ka â ma wa, e họ̀ use nee tu ụmẹ ọnị Ohomorihi sị tụ́ ọza vẹ ẹhẹ. Ẹ sị avaba ẹhẹ họ̀ use ka áá nyị ịsa ọbanyị ana vịdị maanị mẹ da? Áá nyị ọza ana vịdị wụ̀ ẹngụ ịrẹyị ọnọnị da? 33Áá nyị aza ana wụ̀ ọngwẹ Ohomorihi hụụnị ịnị akakana ịra anka ẹwụ nịnị ana ra da? 34Áá nyị ori ana nyayịnẹ nọ ẹkụra ọsa na kụ aza, dị ọ mẹ wa aza anị anka Ẹnẹyịmavara Ohomorihi ẹnịnị mẹẹ mẹ wa ịnị ẹtẹ Ijipiti? Imosiisi kà a eyi ẹnịnị Ohomorihi sị kụ akanya ọnịrị ịrẹkụ tu Anijipiti nị. Ộ sị ụkata ọbanyị anị mẹ ịvọpa beri apọtẹrẹwa ọrụrụ-ọrụrụ ene chire aza angwa. 35#Ịmk 12.32Ẹnẹyịmavara ộ maanị sị ịsa ẹnịnị zụ wa agụvị dị ẹ yẹ ka ọnị ịnya kẹnẹ ọ vị Ohomorihi. Ẹ yị nyị Ohomorihi ọsa ịrẹma anị. 36Ọnị ọ mẹ ka ẹ wụ̀ ọngwẹ hụrẹ ẹbẹẹba dị zụ wa ịrẹyị, di e reè re ịra anị ịnị ẹhẹ ọnọnị, ịzị ọ ya pe wa kà ịrẹyị. 37Agụvị ka o sì ịrẹyị ohiku ẹnịnị, ọ sị nyị ezi ẹnịnị, dị ọ sị ụkata anị kụ wa jịnẹ hụrẹ Ijipiti nị. 38Dị ọ dụ anẹkụra nịnị ana banyị dị ẹ nyị ụkata hu wa jịnẹ hụụnị ẹtẹ ẹnịnị agụvị ọnị ọ sị ẹtẹ ọnọọ ọnị ẹ yịị ra aanị yị wa nị. 39Agụvị avọọ, ẹ tamayị ajịnị, asị ayị hi wa ka Ẹnẹyịmavara ọ vị Ohomorihi ana nyị ẹbẹẹba ọnịrị ẹtẹ nị. Ẹ yị nyị ọsa. 40Imosiisi ka ẹ saasa avaba ọda anị ọnị ọnị raà sị yị wa ajịnị agụvị o ze yị wa ẹnịrị ezi ịrẹma-ịrẹma ẹnịnị. Ẹ vaa ra ịnị ẹtẹ ọnị Ẹnẹyịmavara Ohomorihi ẹnịnị aa sị yị wa ka ọ vị ẹẹnịnị pooro zịna-zịna.
Ẹkụra aha ọyịtẹ̀ ene hi eyi ịzị ọyịị̄ zịị vẹ akẹnẹ Ijodani
41 #
Ijos 20.8,9 Imosiisi ộ sị ẹkụra ẹẹta ene hi eyi ịzị ọyịị̄ zịị vẹ akẹnẹ Ijodani tịtẹ 42ka ẹ vị aha ọyịtẹ̀ yị ọza ene nyeeyi wụ̀ ọza ẹnẹ ẹ yị vị ọnị ịvị anị. Ọ̀ọ zụ zwe na tẹ̀ ịnị ọnya ịnị ẹnịnị, ẹ yị nyị ọza ana nyayịnẹ ngụ ịzọọ na wụ̀ ọ. 43Ẹkụra ẹnẹ ẹ vị: Ibezeri ẹtẹ Irubẹnị ana ya ịnị ụnọmị ana ya ịrẹsụ ataba, Ịramọtị ịnị ẹtẹ Igiriyadi ana vị ẹtẹ Igadi ọnịrị Igoranị ịnị ẹtẹ Ịbasanị ana vị ẹtẹ Anịmanasẹ nịnị.
Ịrẹyị Ọhụva ọnị Imosiisi kà: Ộ kà a ịsị Ẹnẹyịmavara sì
Anisirẹrị ịnị ẹtẹ Ịbẹtị-Ipo
44Imosiisi ộ sị ọda Ohomorihi ọnịrị ịrẹyị anị zụ Anisirẹrị. 45Ẹsẹnị ẹ vị ọda Ohomorihi ọnị Imosiisi kà yị Anisirẹrị nịnị ẹ mẹ sị jịnẹ hụụnị ẹtẹ Ijipiti 46na ngụ ịnị upoporo ana gụrị Ịbẹtịpowa eyi ịzị ọyịị̄ zịị vẹ akẹnẹ Ijodani, ịnị Isihoni ohinọyị Anamọrị ana ya Ịhẹsịbọnị aa mẹ̀ ịjọva. Imosiisi ọnịrị Anisirẹrị nịnị ẹ nyị ẹbẹẹba ẹnịnị ẹ mẹ jịnẹ tụ ẹhẹ hụrị Ijipiti. 47Ẹnịnị ệ ra ịnị ẹtẹ anị, ọnịrị ịnị ẹtẹ Oogi, ohinọyị Ịbasanị. Oogi vị ohinọyị Anamọrị ọsa ana ra eyi ọnị ọyịị̄ zịị vẹ Íjodanị. 48Ẹtẹ ọnọnị ộ hụrẹ ẹkụra ana aā hị́ Aroyeri, ana ya ụtọ irehu Arinọnị. Dị ọ na huuu na ngụ eyi ẹbẹẹba Ataba Isiriyoni nị, ọnị ọ vị ka, Ataba Ihamọnị. 49Ẹtẹ ana ya eyi ọnị ọyịị̄ zịị vẹ okuha Ijodani huuu na ngụ eyi ụvẹtẹ oku anọ-anọ ọnịrị eyi ọnị ọyịị̄ zịị vẹ akẹtẹ Ataba Ipisiga vị ana rẹ ya ịnị ẹtẹ ọnọọ.
Tans Gekies:
Ọda 4: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.