Ọda 25
25
Upono ọyị sị sị ụya rị ọza ana mẹ̀ ebira odivi
1Imosiisi ộ kà a yị Anisirẹrị nịnị ka, A kà a ka aza ẹnị ẹẹva ệ kụ́ ẹngụ tụ ini ikootu, dị ọmọkarẹyị ka ọza ịnyara ộ rị ịvị, dị ọsa rị ịhị nị. 2Ọ̀ọ mẹ̀ ọkarẹyị ka è ne tu ọza ana rị ịvị upono, ọmọkarẹyị ọnọọ ọ̀ mẹ ọda ka ọ̀ vayị ku ẹtẹ, di è tu ọ eyi anị. Ọpa ọchị ana a vọrọ ka è tu ọ agụvị ebira odivi ọnị ọ mẹ kẹnẹ, e vee tu ọ nị. 3#2 Ịkọ 11.24Ama a sị ụ zẹẹ ka è tu ọza ọchị huna ẹbẹẹva. Èe nee tu ọza ọchịị huna ẹbẹẹva, vị ụ waa mẹ ụhịị nyị ọnọhụva awụ eyi ịnọyị-ịnọyị avọọ nị.
Ịrẹyị ụnọ ana aa sịị mẹ̀ ụkọrọ
(1 Itim 5.18)
4 #
1 Ịkọ 9.9; 1 Itim 5.18 Wàa sị ụnọọ mẹ̀ ụkọrọ ịnị aarẹ, asị ụ sị ịsa ku ọ irenu ka asị ọ rị ịsa.
Ịrẹyị ọyịnyara ọza ẹnẹ yị ma ozi di o su
5 #
Imt 22.24; Ịmk 12.19; Irk 20.28 Ẹyịnyara ọnọrụ-ọnọrụ ẹ̀ẹ ra vabẹ, dị ọnyara ẹ̀ẹẹ̀ yị ma ozi di o su nị, à sị osoku anị na vá anaha ọsa. Ọyịnyara ọza ene su aanị ọ̀ nyị ọ. 6Ozi ọnọrụ ịpaapa ẹnẹ ẹ̀ẹ ma, ọyịnyara anị ene su ọ vaa nyị nị. Ozi ọnọọ vaa rị ịrẹha ọza ene su aanị, agụvị a sị ịrẹha ọza ọnọọ vu hụụnị ẹtẹ Isirẹrị. 7#Iru 4.7,8Ama ọyịnyara ọva ọnẹẹ ọnọọ è yi si ka ọnị ọ̀ nyị ose ọyịnyara anị, ọnẹẹ ọnọọ ò ne tu ọdọvịdị ẹkụra nịnị enoze ọbanyị ẹkụra, dị ọ̀ kà a ka: Ọyịnyara ọva amị ka ịrẹha ọyịnyara ò vu hụụnị ẹtẹ Isirẹrị o. Ô yi ka ọnị ẹ yị mẹ ịsị a vọrọ ka ọnị ọ̀ mẹ o. 8Ọdọvịdị ẹkụra nịnị vaa tụ́ụ hị́ ọ, dị ẹ kà ịrẹyịị yọ ọ̀ọ kị ka ọnị ẹ yị nyị ọ, 9osoku ọyịnyara anị ọnọọ ò ne tu ọ eyi avaba ọdọvịdị ẹkụra nịnị, dị ọ tụ adava anị ọnya, dị ọ̀ jị atẹ ku ọ. Ọ̀ọ sị atẹ jị ku ọ, dị ọ kà a yọ ka, aanị á mẹẹ mẹ ọza ana ka ovwoovu ọyịnyara anị ò vu ịnị ẹkụra nị. 10A vaa yẹ ovwoovu ọza ọnọọ ịnị ẹtẹ Ísirẹrị, dị aa hị́ ọ ovwoovu ọza ana a tụ̀ adava hụrẹ ahụ.
Ọda ana za egidi
11Imosiisi ka: Aza ẹnị ẹẹva àa vụ̀ ịrẹvụ, di ose ọnyara vẹ ka ọnị ọ̀ gụ ọva anị ụvọ nị, ọnẹẹ ọ̀ọ sị ụvọ ngụ ọza ọnị ọnịrị ọva anị aa vụ̀ ịrẹvụ aha eenyisi, 12a sị ụ vayị anị nịnị. À dà a ụvọ kwooze.
Mẹ ịzẹyịza ịnị ohu ọyịsẹ̀
13 #
Ire 19.35,36 A sị ụ sị ịngọ irenyi-irenyi ẹẹva ngọ ịsa yị ọza, dị ụ waa nyị ọrata, dị ụ rẹ nyị ana hẹrẹ. 14A sị ụ sị ẹnya irenyi-irenyi ẹẹva mọ ịsa yị ọza, dị ụ wàa nyị ẹnya ọgana, dị ụ rẹ nyị ene weyi. 15Wa sị ịngọ obooro ngọ ịsa, dị ụ wa rẹẹ sị ẹnya ana a vọrọọ mọ ịsa, agụvị we zụ ku orubo ịnị ẹtẹ ẹnẹ Ẹnẹyịmavara Ohomorihi awụ aa sịị yị wụ aanị. 16Ẹnẹyịmavara Ohomorihi awụ nịnị e yi sì ịrẹyị ọza anaā mẹ ọzaa rị.
Ọda ka à wụ Anamarẹkị nịnị
17 #
Kụra 17.8-14; 1 Ịsa 15.2-9 À sị ayị hi wu nịnị ịsị Anamarẹkị mẹ̀ wụ nịnị ụ mẹ̀ hụrẹ Ijipiti aa vẹ nịnị. 18Ẹnịnị e yi hí angwa Ẹnẹyịmavara, ẹnịnị ệ zị oze ịrẹma kwẹẹtẹ tu wu nịnị. Ịjọnọọ ọ́ sị ngụ wụ nịnị ẹngụ, dị ẹnịnị wụ̀ avaba aza ana jị tụ ịrẹma ịnị awụ nịnị nị. 19Agụvị avọọ, ịjị Ẹnẹyịmavara ọ̀ọ raà sị ẹtẹ oni o wo oto anị yị wụ nịnị, dị ọ raà sị ụhwọtụ yị wụ nịnị ịnị ụvọ ọnịvị awụ nịnị ana ra kara wụ nịnị; re ka waa wụ Anamarẹkị nịnị ha saka-saka. Dị a sị a kụkụ zụ tamayị ẹnịnị. A sị ayị hí wu nịnị o.
Tans Gekies:
Ọda 25: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.