Ọda 17
17
Ẹngụ ịsa ịsọvọ ọnị Ẹnẹyịmavara nyị ịhyẹrẹ anị.
1Wàa mẹ̀ ịsọvọ, asị ụ sị imaaru a vị atẹmẹ ana nyị ẹngụkata na mẹ̀ ịsọvọ yị Ẹnẹyịmavara ana vị Ohomorihi awụ nịnị. Ọọ̀ nyị ịhyẹrẹ ẹngụ ịsa ịsọvọ ẹnẹẹ.
Ẹnẹyịmavara kà a wụ̀ aza ana hẹkẹ ori
2Wàa wụ́ ka a nyị ọnọrụ a vị ọnẹẹ ọnya ịnị ọnya ịnị ẹkụra awụ nịnị ana aa mẹ akamawụ hi Ẹnẹyịmavara, dị ọ sị ahụ jịnẹ ọkatịtẹ Ohomorihi 3#Kụra 22.20naa hẹkẹ ori, a vị ọyị, a vị ụhwẹ, a vị ụzọmị nịnị nị. 4Wàa wụ́ ẹngụ enube ọnọnị, sị ahụ sì iruvo ịrẹyị ọnọọ hwịnị-hwịnị. Àa vị ịzẹyịza ọza ana ka ịrẹyị anị mẹ̀ ebira odivi ana vị enyisi ịnị ẹtẹ Isirẹrị nị, 5a sị ọ jịnẹ nọ ịrẹma ẹkụra, dị a sị ịrẹta-ịrẹta wụ̀ ọ. 6#Ịrị 35.30; Ọda 19.15; Imt 18.16; 2 Ịkọ 13.1; 1 Itim 5.19; Ihib 10.28Di o vee tu ka a wụ̀ ọza ọnyọọnyị, a nyị ka a nyị onivenu ẹẹva, a vị aza ẹnị ẹẹta ana vaa dọ ivenu. Àa vị ọza ịnya kẹnẹ ọ dọ ivenu, ọza ẹ yị nyayịnẹ wụ̀ ọ. 7#1 Ịkọ 5.13Onivenu nini ẹ vịdị ee ne ịrẹta nya a, dị aza ana vọ ẹ va sị ịrẹta nya a nị. Aa vavọọ a mẹ̀ ọkarẹyị yị aza edivi, udivi vaa hụrẹ ẹtẹ.
Ịrẹyị ọkatẹngụ
8Àa nyị ịrẹyị ọkatẹngụ ọnị ọmọkarẹyị okokooro ẹ yị zụ ka, anka ẹhụ ịrẹyị ogu oyizune, ụnava ịnị ọchẹngụ, a vị ẹhahi ọza ọyị wụ̀ ọnịrị ọza ọyị nyeeyi wụ̀. Ẹngụ ịrẹyị ẹnẹnị vị ana vaa kụ nọ ịzị Ẹnẹyịmavara Ohomorihi nyị ka aa hẹkẹ ọnị. 9Sị ịrẹyị awụ tụ ọvịdị ohirẹsụ irehi Ohomorihi ọnịrị ọmọkarẹyị ana ya ịrẹsụ ode ịnị ụmẹ ọnọọ. Navọ wa ẹ tụ ohi tụ ịnị ịrẹyị ọnọọ. 10Ẹnịnị vaa mẹ̀ ọkarẹyị ama ẹwụ vaa mẹ anka a mẹ ọkarẹyị ịrẹyị ọnọọ. 11Dọ ọkarẹyị ọnị ẹ mẹ, dị ụ waa saasa avaba ịrẹyị ọnị ẹ ka tu ẹtẹ. 12Ọza tụra ọza ene ro ka ọnị ọ zụ mẹ akamawụ hi ọmọkarẹyị, a vị ohirẹsụ irehi Ohomorihi nịnị, vị ana vaa wụ̀; agụvị ebira odivi ọ hụrẹ ẹtẹ Isirẹrị. 13Ọza tụra ọza ana àa wụ́ ọkarẹyị ebira odivi vee hí angwa, dị ẹ yị nyayịnẹ mẹ ịrẹyị ọhịmị.
Ịrẹyị ọnị Ẹnẹyịmavara kà yị ohinọyị.
14 #
1 Ịsa 8.5
Ịrẹma ọnị Anisirẹrị raà dọ ẹtẹ ọnị Ẹnẹyịmavara Ohomorihi ẹnịnị sị yị wa, dị ẹ ra, e vee sì ka ẹnị ẹ rẹ nyị ohinọyị anka anẹkụra nịnị ana kara wa. 15Re ka ọza ọnị wa nyị ka ọ vị ohinọyị awụ nịnị vị ọza ọnị Ẹnẹyịmavara ọnị ụvọta sị nyị. Ẹngụ ọza ọnọọ ọ vị ọza ịnị ẹngụ awụ nịnị, asị ọ vị anikinami. 16#1 Ohi 10.28; 2 Ịtọ 1.16; 9.28Ohinọyị ẹ yị vaa nyị umaata rụrụ yị isoja anị, dị ẹ yị vaa tụ aza nọ Ijipiti na hị́ umaata agụvị ka Ẹnẹyịmavara ộ raà kà a ka asị aza anị varẹma nọ Ijipiti. 17#1 Ohi 11.1-8; 1 Ohi 10.14-22,27; 2 Ịtọ 1.15; 9.27Ohinọyị ẹ yị vaa nyị ọnẹẹ ọrụrụ agụvị asị ẹ mẹ̀ ẹ ka ọ va hụrẹ ịrẹma Ẹnẹyịmavara. Asị ọ rẹ kụ isiriva ọnịrị igooru ahaahara mẹ aanị. 18Ọ̀ọ sị rị, a nyị ka ọ nyị iwe ọda Ohomorihi ana a chẹrẹ eyi Anireevi ana vị ohirẹsụ irehi Ohomorihi. 19Ohinọyị ọ sị iwe ọda ọnọnị pe ẹngụ, dị ọọ ka a ịnị avaba ẹhẹ anị agụvị ọ kọsẹ a mẹ vọrọ ka ọ nyị angwahi Ẹnẹyịmavara, dị ọ saasa avaba ịsa ana kà tụ ịnị iwe ọnọọ. 20Ọsọnị ọ vaa mẹ ka asị o ro ka ọnị o huna anda ẹnịnị ana vọ.
Tans Gekies:
Ọda 17: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.