1 Ịsamụwẹrị 8
8
Anisirẹrị kà ẹnị ee sì ka ẹnị ẹ̀ nyị ohinọyị
1Ô tù ụmẹ ọnya, Ịsamụwẹrị o si bo. Dị ọ nyị ezi anị ka ẹ̀ẹ mẹ̀ ọkarẹyị yị Anisirẹrị nịnị nị.
2Ịrẹha ozi anị ịpaapa ọ rị Ijowẹrị, dị ọsa ọnị rị Abija nị. Ẹnị ẹyịva vị ene hi Ịbẹẹsẹba di eyee pe ada ẹnịnị mẹ̀ ọkarẹyị ịzọọ.
3Ama ezi Ịsamụwẹrị ẹnẹẹ ẹ yị sị ebira ada ẹnịnị Ịrẹyị ẹkẹhị kẹnẹ ọ jị wa areyi nị; ẹ yaa dọ ochirerenu, di eyee sima ọkarẹyị mẹ nị.
4Ẹkụhị ọnya dị ọdọvịdị Anisirẹrị nịnị kụ́ ẹngụ gụ, di e ne tù Ịsamụwẹrị Iraama nị. É mè tù ịzọọ 5#Ọda 17.14dị ẹ ka, “Ịsamụwẹrị, we si bo, ezi ewu ẹ yị zẹẹ ka ẹnị ẹ̀ sị ebira awụ; avọọ yee sì ka wa nyị ọza dị ọ vị ohinọyị ayị, dị ọza ọnọọ ọnị ọ̀ rẹ kụkụ vị ọdọvịdị ayị anka avaba anẹkụra ana vọ ẹnẹ ẹ̀ yị vị Anisirẹrị mẹ̀ nyị ohinọyị.”
6Ịjị ẹ vavọọ kà ka Ịsamụwẹrị ọ̀ nyị ọza ịnya dị ọza ọnọọ ọ̀ vị ohinọyị ana kụkụ vaa vị ọdọvịdị ẹnịnị, ịrẹyị ọnọọ ô du Ịsamụwẹrị ayị. Dị Ịsamụwẹrị ne tù Ẹnẹyịmavara dị aa mẹ̀ aduwa nị.
7Dị Ẹnẹyịmavara va kà a yị Ịsamụwẹrị ka avaba ịsị aza ẹnẹẹ ẹ̀ẹ ka ọ̀ mẹ, asị o pè wa nyị ahankata. Ọ kà ẹ yị vị Ịsamụwẹrị ẹ ka asị ọ kụkụ vị ọdọvịdị ẹnịnị, Ohomorihi ka ọnị ụvọta aza ẹnẹẹ ka asị ọnị kụkụ vị ohinọyị ẹnịnị nị.
8Ohomorihi rẹ ka ọnị mẹ̀ hụrẹ kụ́ wa jịnẹ hụrẹ Ijipiti pooro vi ve tù ajịnị, avọọ aza ẹnẹẹ mẹ̀ mịị mẹ nị. Ọ kà ẹnịnị vị na aā navọ ọnị tịtẹ, dị ẹ naa hẹkẹ ori. Ohomorihi ka ịsị ẹ mẹ hị́ ọnị ẹ rẹ yaa mẹẹ hị́ Ịsamụwẹrị avọọ nị.
9Di Ohomorihi kà a yị Ịsamụwẹrị dị ọ ka ịsị aza ẹnẹẹ ẹ̀ẹ kà kẹnẹ, Ịsamụwẹrị ọ̀ dọ ooho. Ọ kà ama Ịsamụwẹrị ò hú wa ụvọ ẹtẹẹtẹrẹ, dị ọ̀ kà a yị wa ịsị ohinọyị ana vaa rịị tụra wa vaa mẹ wa.
Ịsamụwẹrị ộ kà wa ọ̀nọ̀
10Ịzẹyịza dị Ịsamụwẹrị kà a yị aza ẹnẹẹ ana ka ọ̀ nyị ohinọyị yị ẹnị aanị avaba ịsị ẹnẹ Ẹnẹyịmavara kà yọ nị.
11Dị Ịsamụwẹrị ka, “wàa sị ohinọyị nyị nịnị, ịsị ọ vaa mẹ yị, o! Ọ vaa za ezi ewu nịnị dị ọ kụ́ wa hi ini isoja. Aza ẹnyị vị ọnị ọ vaa kụ́ hi ịnị isoja ana aā sị ịkẹkẹ oni umaata ee turaa kù ịrẹkụ, dị ọ kụ́ aza ẹnyị hi ini isoja anaā sịị umaata kụ́ ịrẹkụ. Aza ẹnyị vị ọnị ọ rẹ vaa kụ́ ka è hi ọvịdị umaata anị di ee zwe echi.” 12Dị Ohomorihi rẹ ka, Â nyị ezi ẹwụ ịnị ẹnyị ọnị o vaa sị mẹ ọga isoja ana a gà hi udi-udi. Aza ẹnyị vaa vi isoja akahị, dị ẹnyị vị isoja ẹvarẹwụ. Ọ rẹ vaa kụ́ aza ẹnyị ana vaa dà aarẹ yọ, dị ẹnyị ee tụ́ ẹnya ịrẹkụụ yọ, dị ẹnyị raa mẹ ịkẹkẹ ọnị ọ vaa sị kụ́ ịrẹkụ. 13Ọ kà, “Ezi ewu nịnị anẹẹ vị ọnị ọ vaa za ka ẹ̀ẹ mẹ eturare yị ọnị, dị ẹ̀ rẹẹ mẹ̀ ịsa ọnị ọ vaa rị 14Aarẹ awụ nịnị ọnịrị ụbazị awụ nịnị ene èe zoza hu vị ọnị ọ vaa dọ wụ nịnị. Ẹtẹ ọnị wàa kụ́ ọchị ana aā hị́ ịvayịnị ọnịrị orivi tụ́ ene zoza hu vị oni ohinọyị ọnọọ rẹ vaa dọ wụ nịnị. Ọ̀ọ vavọọ dọ wụ nịnị, dị ọ sị yị ọdọvịdị nịnị ọnịrị aza ana vị ọga isoja nịnị. 15Wàa mẹ̀ akụ ịnị aarẹ awụ nịnị, dị ụ rẹ ha oromi awụ nịnị, ọ vaa dọ wụ nịnị agẹẹwụ anị, dị ọ rẹ kụ́ ọ yị ọga isoja ene hi ịda anị ọnịrị ọdọvịdị nịnị ana vọ. 16Ezida awụ nịnị anọrụ ọnịrị anẹẹ vị ọnị ọ vaa dọ wụ nịnị ka ẹ̀ naa mẹ ụkọrọọ yị ọnị. Dị ọ rẹ dọ wụ nịnị imaaru ọnịrị ịkẹrịkẹtẹ awụ nịnị dị ọ sị mẹ aanị. 17Ịsụpa awụ nịnị vi oni o vee che tụ́ oze ẹẹwụ dị ọ kụ́ oze ọnya. Ẹwụ nịnị ụvọta vị ana vaa yà ahụ anị. 18Ịjị ụmẹ òo si tù dị ọ vavọọ aa mẹ wụ nịnị nị, u vee nowu ka ma dọ wụ nịnị tụ́ hụụnị ụvọ ohinọyị awụ nịnị, ẹmị Ẹnẹyịmavara me yi vee tụ́ wu nịnị ohi.”
19Anisirẹrị nịnị ê yi, ẹ yị zẹẹ ka ẹnị ẹ̀ wụ́ ịrẹyị ọnị Ịsamụwẹrị aa kà a yị wa. Ẹ ka ẹ yị nyị ụvọ ẹnịnị rị ịnị ịrẹyị ọnọọ, ẹnị ka eni ee sị̀ ka ẹnị ẹ̀ nyị ohinọyị.
20Ẹ ka ẹnị ẹ̀ẹ nyị ohinọyị, dị ẹnị rẹ kụkụ yà anka anẹkụra ana vọ. Ẹ ka di ohinọyị ẹnịnị ẹnị raa kụ́ ẹnịị nọ ịrẹkụ, dị aa gụ ẹnị ụvọ anka anẹkụra ana vọ.
21Ịjị Ịsamụwẹrị raà wụ́ avaba ịrẹyị ana aza ẹnẹẹ ka ẹnị aa kà, dị ọ na dị ọ rẹ vavọọ kà a zụ̀ Ẹnẹyịmavara nị.
22Dị Ẹnẹyịmavara kà Ịsamụwẹrị ọ̀ dọ ooho, dị ọ̀ nyị ọza ana vaa vị ohinọyị ẹnịnị. Dị Ịsamụwẹrị vavẹ va kà a yị aza ẹnẹẹ dị ọ ka ọzọza ọ̀ọ nọ eehi anị nị.
Tans Gekies:
1 Ịsamụwẹrị 8: EBTP
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
Ebira First Bible © Bible Society of Nigeria, 2014.