John 13

1Óóki. Áítamaakitoʼtsstsiiwa amóya ómahksiksistsikoyiia otsítohkanaʼpssatoohpiaawa iihtsitóʼtsikamotsíípiaahpiaawa Egypt isskóóhtsika. Ki Jesus ákaissksiníma okáóʼtsataʼpissi otsítaksiistapáatoohpi annóo ksááhkoi, mááhksskitapoohsi ónni.

Óóki. Jesus iikákomimmiiwa otsitapíímataiksi annóo ksááhkommi, ki ánnimayi otsopokamomímmahsaiksi iihtáístamatsiiwaiksi otánisttsiihpi. Ánnohkai ákohtsitsinikioʼpa.

2Óóki. Ki ánnikskaoʼkiaawa annííksiska annaahka Jesus, áotáksoyiiyaawa. Óóki. Omáa Judas, amoohka Simon Iscariot ohkóyi, okáíksimsstáttsooka Makáʼpatoʼsiiyi mááhksisimiomatskaahsii Jesusi.

3Óóki. Jesus issksinínima otohkóyissi ónni Áʼpistotookiiyi kanáʼpaisiistsi, ki issksiníma ómohtoʼtoohsi Áʼpistotookiiyi ki otáyaaksskitapoohsayi. 4Ki ánniayii sotámitsipóaoowa otsítáaoyihpiaawa. Osáótatsiisokaʼsiimistsi sotámsaoʼtsimaistsi. Sotámoʼtakiwa innáíʼpisstsi, iihtáíssisskiohsoʼpi ki iihtsitsíʼpssiwayi. 5Ki sotámitsapaʼsoyinnakiwa aohkííyi omíi itáísapssisskiohsoʼpi. Sotámomatapssiikaawaatsimiiwa ománikapiimiksi ohkátoawaistsi kii omíi otsíʼpssatayi náíʼpisstsi, ánniayii iihtssíínomoyiiksi ohkátoawaistsi omíi otsíʼpssatayi náíʼpisstsi.

6Kii ki aítoʼtoowa omíi Simon Peter. Osótamanikkayi, “Kiistówa kitáínaaimato. Kiistowa kitákohkottsaissiikaawatsimoki.” 7Jesus itanístsiiwayi, “Kimátomaotsistapiʼtsiihpa nitáwaanisttsiihpi. Íssoohtsika kitákitohkottotsistapiʼtsiihpa.” 8Peter itanííwa “Ki kimátakónoaissiikaawaatsimokihpa.” Jesus itanííwa, “Ikkámsaissiikaawaatsimoiniki, kimátamihpa amóksiska iihtáísapooyikska niistóí.” 9Omáa Simon Peter itanííwa, “Nitsínaaim, ánnohkayii sotámssiikaawaatsimokit. Ki mattsítsstsimíyinnokit. Ki noʼtokááni.” 10Áániiwa Jesus, “Ki omáa ákayissiistsiwa náísopoksiksikkaʼpssiwa. Áksikakssiikaawaatsimawa. Kiistóaawa kikáíksistsikkaahkaanistotootspoaawa. Itsstsíwa niʼtsitápiiwa kiistóaawa mátsiksikkaʼpistotoawa.” 11Óóki, áámohka iihtanííwa omáa Jesus otsítsíkayissksinoahsi anniiska otáksisimiomatskaokiska. Ánnihkayii iihtanííwa, “Itsstsíwa niʼtsitápiiwa ksiistóaawa mátsiksikkaʼpistotoawa.”

12Óóki. Ki áíʼksistssiikaawaatsimiiwaiksi, kii itsskáaksapsskaohsatooma osáótatsiisokaʼsimistsi, ki itsítsskáakaoʼpiiwa omii itáísóoyoʼpi. Ináíʼtanistsiiwa ománikapiimiksi, “Kikátaoʼtsistapiʼtsiihpoaawa áámohka kimániksistaistamáttsoohpoaayihka?” 13Óóki ki itsópooyaʼpanistsiiwaiksi otánisttsiihpi. Áániiwa “Óóki. Kitáísksanistainihkakkihpoaawa ‘áíssksinimaatstohki’ ki ‘nitsinaaim.’ Ki kitsííksoksinihkakkihpoaawa. Ánniai tanistápssi. 14Issáʼtsik. Kitáínaimakkihpoaawa, ki niistówa kitáíssksinimaatsoohpoaawa. Ki kimískitssiikaawaatsimohpoaawa. Ki ánniai kanistáístamaatsoohpoaawa kitákoohkattssiikaawaatsimotsiiyihpooawa. 15Áámohka kitáístamáatsoohpoaawayihk kómohtaistamaatsoohpoaawa kááhkohtsawaisspimmohsattsiʼsoaayi 16Kitakanistohpoaawa niitsííyi. Omóa áʼpaoʼtomohkiwa mátoʼtsitsksspssiimiwa amíi otáʼpaoʼtomoai. Ki amáa otohkáʼtaana mátoʼtsitsksspssiimiwa amíi otsííʼtohkakki. 17Ánnoohka kikáotsistapiʼtsiihpa amoohka kitáístamaatsoohpoayihka. Iikáksiʼtáámaʼpiiwa kiistóaawa ikkamánistsipoʼtotoiʼtsikattsiiyinoainiki kanistáístainaatsoohpoaawayi. 18Ánnohka annááhkayii itsstsííhpa nimátohtaiʼpoyiihpa. Nítssksinoayaawa nítssiikoʼtoaiksi. Ki ináóʼkayákanistsiiwa manistsíkayissiinaapsskohkatoohpi naatóísínaakiaʼtsiistsi isskóóhtsika. Ákstsinaaʼnistaisiwa. Itssínaiʼpa ‘Annaahka nítohpóksoyiimookahka nitsipóʼtapáakka.’

19Ánnohka kitáánistohpoaawa áámohka ánnohka otsítsoomaanistaisiihpi. Ki ánnimayii ánniika íssoontsika aiksistánistsiisi ki kitsiitaʼpomaiʼtsiihpoaawa niistóakaoʼka annááhka.

20Óóki. Kitákanistohpoaawa niitsííyi. Kanáítapiiksi íksimatsimmiiksi nitákániitskoaiksi nitsíímiksistaiksimatsimmokiaawa. Ki áámokska nitsíímiiksistsiksimatsimmokiksi, annaahka nitóʼtsskookahka, Áʼpistotookiwahka ánniskaoʼkinai oníʼtapiksimatsimmoaawayi.”

21Óóki. Jesus, otáíʼksistanistoohsi áámohka sotámstonnatsikihkíniʼtakiwa. Ki sotámaniiwa “Óóki. Kitákanistohpoaawa niitsííyi. Iitsspííhtsiihpa kiistóaawa nitáksisimiomátskaoki.”

22Óóki. Ánniayii ománikapiimiksi itomátapahtoissammotsiiyaawa. Niitáʼpohtaʼpsskoohsiiyaawa takááhtaoʼtsíksináyi.

23Óóki. Jesus otsskááʼkomimmayi ománikapiimi, itapápitsskaohsiiyinai. 24Ki omáa Simon Peter itáʼpsstoyiiwáyi; itanístsiiwáyi “Anistsísa Jesus tsikááhtaoʼtsinai ómohtaiʼpoyihpi.” 25Kii ki itáakikaopiiwa sáákiaitapapitsskaohsiwa omíi Jesusi. Áánistsiiwáyi, “Nitsínaaimi, takáa kómohtáíʼpoyiihpa?” 26Jesus itanstsiiwáyi “Nitákitsapihtaki napayí iihpáooyoʼpi. Ki omáa nitáyaakohkotáwa, ánnaoʼka.” Ki áiʼtsapihtakiwa. Sotámohkotsiiwayi amíi Judas. Ánniskaoʼkinai Simon Iscariot ohkóyi.

27Óóki. Omáa Judas opíítsoohkoʼtsissi amóya iihkótahpi, itsistómatsiiwa Makáʼpatoʼsiwa. Otsínaiʼtanikka omíi Jesus, “Níʼtakianisttotsit.”

28Óóki. Mátsitsstsiihpa itsinópiiwaiksi mááhkssksinimi Jesus ómohtanistahpi Judas áámohka. 29Ki annííksi niitsiksímsstaayaawa Jesus ááhkanistsiiwayi, “Matóóhpommaat ááhkohtsitohkooyoʼsi amóya ómahksiksistsikoyia.” Ki mattsstsíkiiksi niitsiksímsstaayaawa ááhkanistsiiwáyi mááhkotoohkotsiiwa kímmatapssiksi. Ómohtanistsiksimsstaahpiaawa takaa omáa Judas ostóyi áótoitsikatoma otsítaisapinaanihpoaawayi ataksááksi. Ánnihkayii iihtanístsiksimsstatoomiawa áámostska.

30Óóki. Omáa Judas áʼohkotahsi omiihka naapayínihka, sotámsaksiwa. Ákaikoʼkowa.

31Kii ki otáíʼsakssi Judas Jesus itanííwa “Óóki. Ánnohkayii nitáksspipoʼtookoo; niistóakaoʼka annaahka Matápiiwahka. Ki Áʼpistotookiwa ákohtáísspipoʼtoawa niistóyi nitáyaakanisttsiihpi. 32Ki ánnihkayii nitákohtsspipoʼtooka aáóʼtootsiiniki. Ánnohka ákayaakanisttotsima.

33Óóki, nókoʼsaki. Kitákattsiʼnaksisamohpokaʼpawaawahkaamohpoaawa, ki tákitsiistapoo. Annííhka nitáánistahpiaawa omííksi istóʼtotamaʼpssiiksi Jews, ánnohkai kitákoohkattanistohpoaawa. Kitákaʼpaissammokihpoaawa, ki kimátakohkottsitoʼtoohpoaawa nitáyaakitapoohpi.

34Ki ánnohka kítohkotohpoaawa manokákihtsimaani kááhkanistaiʼtsissoaayi. Áwakomimmotsiiyik. Kanistákomimmohpoaawayi kitáwaanistohpoaawa kááhkitotoisapakomimmotsiiyihpoaawa. 35Ikkamákomimmotsiiyinoaainiki kanáítapiiwa ákohtoʼtssksinima kiistóaawa ánnikskaoʼkiaawa omííksiska tsíímaiʼtookiksi.”

36Óóki. Ánnika Simon Peter sotámanistsiiwa Jesus, “Óóki nitsínaaimi. Tsimáa kitáyaakitapóóhpa?” Otáánikkayi, “Kiistówa kimátakohkottohpoʼkiiwoohpa ánnoohka. Íssoohtsika kitákitamitohkottohpoʼkiiwoo nitáyaakitapoohpi.” 37Ki itanííwa Peter, “Ki, nitsínaaimi, nimáʼksaohkottohpoʼkiwoo ánnohka. Niistówa nimátaksstsimohtahtsowaiʼnihpa kiistówa.” 38Jesus itanístsiiwáyi, “Kitáípahtaʼpssi. Kitákanisto niitsííyi. Saomáóhkomisi nínaiʼtawáaki kitákítsoohksskaanii kitsáíʼssksinookssi.”

Tans Gekies:

John 13: BLA

Kleurmerk

Kopieer

Vergelyk

Deel