Rut 1
1
Da'me lachoĝodec jañe'me Noemí
1Ca'li maliaĝa uo'oe jogaa'me jaliaĝanaqa jo'ne nejaliaĝatedelegue di'me aleua jo'ne Israel, nataq'aen uo'oe jaa'me noloqo'ote ca'li yataqachiñe qaya'te qoyalic, yataqachiñe noqouaĝa joca'li yema jodi'me aleua. Qama'le 'uo joca'li ga'me jiyaĝaua jo'ne lenaĝat Elimélec, jo'ne 'lachaqa' di'me Belén, jo'ne 'naleua di'me Judá. Nach'ega jo'ne cada'ac na'ague di'me aleua laqaya jo'ne Moab, qama'le lequiaĝaua ca'li jañe'me loua Noemí, chayovida'alo gaa'me c'oqo'te jo'ne dojolqa, 2nach'egaua Mahlón nataq'aen Quilión. Yemeda naa'me naajo' mach'e Belén laje'. Ca'li male yovideta di'me Moab, qama'le neda'ña joca'li di'me dijo' aleua.
3Qama'te 'uo ca'li jo'me nolo' male yeleu di'me Elimélec, jo'ne loua jañe'me Noemí, qama'le jañe'me male onola, ue'tajopa gaa'me c'oqo'te. 4Male copa'ague di'me loua jañe'me, qama'le gaa'me c'oqo'te male uo'n joca'li, qama'le uo'oe gaa'me dos yauo' jo'ne Moab lajel, onole jaga'me lenaĝat da'me Orfá, nataq'aen jaga'me yauo laqaya mach'e lenaĝat da'me Rut.
Qalaĝaja joca'li male yenoĝodegue diez gaa'me 'uoidi, 5qama'te nataq'aen male yele'u dia'me Mahlón nataq'aen di'me Quilión, qama'le jaga'me Noemí yataqachiñe ja yayaten ga'me ya'uo, yataqachiñe totelegue queda'me male qayaua dia'me c'oqo'te, nataq'aen qaya'te lequiaĝaua.
Noemí nataq'aen jañe'me Rut male dajotegue di'me Belén
6'Uo jo'me nolo' joca'li jañe'me Noemí domachilegue ñe'me Jaliaĝanec queda'me yitaĝa yichoĝoden di'me noic Israel, qama'le en yem ga'me noqouaĝa jo'ne ueta'ña di'me aleua. 7Chane'eja jañe'me male nechachiñi qama'le ca'e di'me Moab qaedi yitaĝa 'viyelaĝague di'me mach'e 'naleua jo'ne Judá. Nataq'aen quetedapegue' ñaa'me la'yoĝo'u. 8Qama'le ca'li yeuo'tape, jañe'me Noemí male dojapegue'to naa'me latel, qama'le enaac:
«Jamoyi, 'noota qom auajoyiyi joga'me at'achaqadi': auajoyiyilo jogaa'me adat'eldi'. 'Noota qom joñe'me Jaliaĝanec yataqachiñe ami yichoĝode'n, ami e'teque ena'am joga'me jayem aueñe'tec ca'li, da'me yataqachiñe jayem avichoĝodeñi nataq'aen da'me avichoĝodeñi' ca'li dia'me yalaqa. 9'Noota qom ñe'me Jaliaĝanec yitaĝa ami yaje'tema ta'le a'uoñi, qama'le auauoyi ga'me mach'e at'achaqadiaĝa'u, qaedi yataqachiñe ami made'tape jo' qomle.»
Yem ca'li dojetac, jañe'me Noemí male onole'tape da'me nec'ouo' ñaa'me yauo' ca'li, qalaĝaja ca'li yem da'me dojo', ñaa'me yauo' male noye'n ca'li, 10qama'le yemeda enapega't:
«¡Aja'y! ¡Da'me qo'mi yitaĝa am qolaĝague jo' qomle auajoyi ga'me at'achaqa'!»
11Qalaĝaja Noemí yitaĝa enaac:
«¡Ami yalole, 'noota qom oquiye! Jetapega yataqachiñe ja 'noota ta'le jayem oquitapegue', qa'a male ja yitaĝa 'uo ga'me yalec nayi, qaedi yitaĝa ami e'n loua' qomle. 12Jamoyi, male a'viyelaqa'y: a'viyelaqayilo gaa'me adet'aldi'. Da'me jayem male yataqachiñe jayem 'yaĝaina', ta'le yitaĝa ja'uo ga'me youa. Ja ch'e ta'le jepetapega ta'le yitaĝa 'uo ga'me jayem nec'ata jena'me jenjo' pi'yaq qaedi en jayem loua, ja naq'aeta qaedi male uo'oe gaa'me yalaqa, qalaĝaja auayachiñe queda'me ja eeta da'me qanejiyaĝauayaĝac. 13Nataq'aen ta'le uo'oe gaa'me yalaqa, ja ami 'te nalo'ogueta, qa'a da'me ami joote ami 'yaĝael. Qama'le ja jepetapega ta'le auajoi'talo qomle ta'le 'yaĝayaqate' qaedi yemta aueñi adouadi'. ¿Qo'li ja naq'aeta da'me dojo'? Chane'eja, ami yalole, ena'te aueñeta, qa'a ñe'me Jaliaĝanec naqaeñe da'me ya'uo da'me yachoĝodec, qama'le ja 'noota qom nataq'aen ami uauelo jena'me jenjo'.»
14Qama'le ñaa'me la'yoĝo'u, ca'li yitaĝa domachita jena'me jenjo' qama'le yitaĝa noye'n joca'li. Qama'le ua'aqueda joca'li jañe'me Orfá male nec'ouoq jañe'me li'yodo qama'le ca'e joca'li, 'viyelaĝa di'me mach'e 'naleua. Qalaĝaja jañe'me Rut yataqachiñe ja ca'e joca'li jañe'me li'yodo.
15Qama'le Noemí dojapegue' joca'li jañe'me:
«Pega jajo'me adonaĝaua male ec, dajoyi di'me 'lachaqa', male dajoyi ga'me nedios gaa'me let'al. Da'me am, ¿toqoch'e ja oquegue?»
16Qalaĝaja Rut 'yateguet joca'li:
«Ena'te jayem a'uetec da'me dojo' qaedi am jeca'e,
dite da'me yataqachiñe jayem eja da'me jajoyi ga'me auec'ata,
nataq'aen da'me jona'ña joga'me ona'ña.
Ga'me mach'e a'naleua nataq'aen jen 'ñaleua,
chayovida'a ñe'me Anedios nataq'aen jen Ñedios.
17Jeleua'ña joga'me oua'ña jo' qomle
nataq'aen nach'ega jo'ne jetaque jayem qoyeji'ña jo' qomle,
ga'me ua'ña na'me adapat.
Jetaque ñe'me Jaliaĝanec jo'ne yataqachiñe qaya'te nalo'taguet,
nach'eñe ya'uo ga'me yachoĝodec
qom am joqovinec jena'me jenjo' 'yaqatac.
'Yaqatac laqaya qaya'te qo'mi yecolaĝachiguilo nayi,
¡chayovida'a qom qadoiquiaqa'!»
18Qama'le jañe'me Noemí male ja yitaĝa ya'uo ga'me 'laqatac, qa'a yauana queda'me yataqachiñe eja joga'me nenaĝategue ca'li jañe'me Rut, da'me yataqachiñe eja ga'me nachoĝodenaĝac da'me equegue jañe'me.
19Qama'le yem joga'me lojaĝac jañe'me Noemí, male eque' joca'li ñaa'me, chayovida'a da'me yovideta di'me Belén. Qama'le joca'li tadoue di'me noic, jena'me yauodipi yataqachiñe 'uo da'me lamai'j, qama'le enapega't joca'li:
«Auec'achiñe jana'me janjo': ¡naqana Noemí, yauo jo'ne yataqachiñe onaĝaicaloec!»
20Qama'le jañe'me dojapegue'to ñaa'me laqaya', enaac:
«Ena'te aueñi yenaĝat da'me Noemí, jo'ne nenaĝat 'me yataqachiñe jama, maq joda'me yenaĝat dalaĝaic jo'ne Mará, jo'ne nenaĝat 'me yataqachiñe chem, qa'a yataqachiñe jayem totelegue nayi, jouaĝat joñe'me Qadejaliaĝanec jo'ne qaya'te yaqalatac yataqachiñe en jayem najaĝaye da'me nachoĝodec jo'ne jayem ue'tajop nayi. 21Ca'li jeca'e jena'me jenjo' Belén, yataqachiñe qaya'te jouetaque, yema jauana, qalaĝaja nayi da'me 'ñiyelaq, joñe'me Jaliaĝanec jayem yanem queda'me yataqachiñe ochichiyelo naa'me youa'. Qama'le ja 'noota qom jayem aviyaĝañetapec da'me Noemí, qa'a ñe'me Jaliaĝanec male jayem nautena qama'le yataqachiñe t'adaic da'me en yachoĝodec jo'ne jayem uetalegue.»
22Qama'le nach'ena jena'me jenjo' 'uo ca'li jañe'me Noemí 'viyelaĝa di'me 'lachaqa', chiyoĝogue di'me Moab, nataq'aen naequetapegue' jañe'me la'yoĝoua Rut jo'ne laje di'me Moab. Male uetedaue joca'li di'me Belén, nalo'taguet ca'li yemta qonaqat jaga'me jala jaga'me nana jo'ne lenaĝat cebada.
Tans Gekies:
Rut 1: TDO
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Biblia en Toba del Oeste © Sociedad Bíblica Argentina, 2014, 2019.