MIJAHEI 22
22
Moab Rengpa’n Balaam Kabek Atir hei
1Israelhei kha khanga kase heia Jordan nisōtinga Jericho kahnget a Moab phaichama rephōr anleisak jo.
2Moab rengpa, Zippor sapa Balak in, Amorhei chunga Israelhei taleitlona khana Israel khongja mo khana khan aka-om hei ti ṭong kha athei pha, 3ama leh ami rakip kaṭi jo hei. 4Moab he’n Midian hlamkakeihei hneng anti, “Hiva mipuihei hin nihnenga neinâk rakip sehratche’n phaichama phi asâk manhmui kapōa inranga ansuk manhmangsō sik jo me.” Khava jâra Reng Balak in 5Amaw ram a Euphrates Tuidung hnenga Pethora aka-om, Beor sapa Balaam kabek sik a palai aleitir hei. Anmani’n Balak a inphut hiva ṭong hi ahnenga anleirôn, “Egypt ram a inphut jât pumpui inkhat he’ntôr jo hei ti hi namanhret sik a kanmadu; hiva mipuihei hi hmun rakip a inchek jo hei khana niram lona sik a anmaṭhit jo me.#Mj 31.8; 2 Pe 2.15-16; Ṭt 11 6Eini nek a anja katam hei, achang jâra hong ina kei sik a vahâksêr hei roh. Khanga nitor heia ram a inphut nihnongsōt torkhat thei sik heia kae. Nang in vâng napek pha mihei kha vâng anchen, nang in nahâksêr hei pha anmani kha hâksêr anchen ti hi ke’n kamanhret.”
7Khava jâra Moab leh Midian hlamkakei he’n hâksêrna man pek sik kha anchoia Balaam hneng kase heia Balak ṭong manrôn kha anhri pek jo. 8Balaam in anhnenga ati, “Jân hi hin rek jo ruh, Rōngpu’n ahri pek eng rakip kha ajînga kahri pek sik jo chei.” Khava jâra Moab hlamkakeihei kha Balaam leh ka-omsap jo hei.
9Balaam hneng Pathen kha kajōnga aleider, “Na-ompui hei hi tuhei mo?”
10Ama’n amasôn, “Moab a Reng Balak in kahnenga ṭongkahri sik a ahei tir hei kae 11Egypt a inphut ajōng intôr mihe’n ram pumpuia kasip sō jo hei. Ama’n re tloa ahnong sōt torna sik heia anchunga kahâksêr sik hei hi amadua kae.
12Pathen in Balaam hneng ati, “Hiva mihei hi juimak hei roh, khana Israelhei chunga hâksêr mak hei roh, ajârchu anmani kei vângpekna antachen kae.”
13Abâna jîngkâra Balaam kha Balak mitir hei hneng vakasea ava ti, “Inna inle jo ruh; Rōngpu’n kei hi nangni leh inṭhōi sik hnōm mak jo.” 14Khava jâra anmani Balak hneng inle jo heia Balaam in anmani leh inṭhōi sik ahnōm makna kha anhri pek jo.
15Khana hma kakeihei kanek a apui karôn det hlamkakei katam det Balak khan atir jo hei. 16Balaam hneng vakase heia Balak a inphut hiva ṭong hi anhri pek, “Lungsettak a kei hneng hongmakna heitlo mak roh! 17Hlōman katamtak kapek sik che khana nati rakip katlo pek sik che. Lungsettak a hong ina hiva mihei hi kei sik a vahâksêr hei roh.”
18Tâk Balaam in amasôn, “Balak in a-innpuia inphut sana dangka rakip apek eng inum, kei Rōngpu ṭongpek kha ajâr kasintek achang inum juiloa om tor mak ning. 19Tâk lungsettak a jân hi nansap hei taleitlo kapōa, rek jo ruh; Rōngpu’n heikhat amanthei sik leh amanthei mak sik eng kha kamanhretna sik a.”
20Khava jân a Pathen kha Balaam hneng kahonga ahri, “Hiva mihei hin nang inṭhōipui sik chea anti’nchu, sena sik a intluk roh, tâk kahri rōk kha tlo roh.” 21Khava jâra abâna jîngkâra Balaam kha ashakōrtung achōnga Moab hlamkakeihei leh inṭhōi jo hei.
Balaam leh Ashakōrtung
22Balaam kase kha Pathen ahnuk leikana, Balaam in ashakōrtung achōnga, asōk 2 hei leh khanga aselai, Rōngpu ngeva khan ahlam atinga kangir jo. 23Shakōrtung khan ngeva’n chemjâm achoia akangir kha ahmu pha, hlam kha adahlona hleipukting inhe jo. Balaam in shakōrtung kha ajem a hlamting aheiṭhōi malea kae. 24Khana ngeva kha vomhruibi 2 hei kâk a, asir inhnia hlung bang inchîpna leikangir nôk jo. 25Shakōrtung khan ngeva kha ahmu pha hlampena sik atloa Balaam ke kha banga amanrôt pek jo. Balaam in shakōrtung kha avōk nôk jo. 26Avea ngeva kha hmating leikasea; hmun inchipna apang pena sik ka-om mak hmun khan leikangir jo. 27Hiva pha hinchu, shakōrtung khan ngeva kha ahmu pha, lei inbok jo. Balaam kha ahnuk kana rei joa shakōrtung kha asung vâng avōk manphut jo. 28Khana Pathen in shakōrtung kha ṭong theina ratha apek jo, khana Balaam hneng aheiti, “Ke’n nahnenga heimo katlo jo? Heisa mo vōithumset navōk eng?”
29Balaam in amasôn, “Ajârchu nang in kei hi mikamoa nasyem jo eng! Chemjâm kaleirôn inchu, kaleithat sik jo che kae.”
30Shakōrtung khan amasôn, “Nahringkhō shunga naheichōng shakōrtung kha kei hi changmak eng mo? Tûn mak hma hiva kapōa kaleitlo phung che mo?”
“Tlophung mak che,” tia amasôn.
31Khana Rōngpu’n Balaam kha ngeva’n achemjâm achoia angir kha amanhmu jo; Balaam kha abinga hongkatlua raleia ahmai amathlâk jo. 32Ngeva khan arakôk a, “Heisa mo nashakōrtung hing’hin vōithumset navōk? Hiva nahlam hi nahro makna sik, nahlam kating akahong eng kae. 33Tâk nashakōrtung inchu ahmu eng, vōithumset hlampanga ale’nhesōt mak inchu kaleithat chea shakōrtung chu kalei ṭhensōt sik kae.”
34Balaam in amasôn, “Kei setna katlo jo. Kei katinga hlam a naleingir kha leimanhret mak jo eng; tâk tûn kei kase sik hi dikmak nati’nchu, kei inna inle sik eng.”
35Tâk-kha ngeva khan ati, “Mihei hi sepui jo hei roh, tâk ke’n hri sik kamanthei rōk che kha vahri roh.” Khanga Balaam kha anmani leh inṭhōi jo hei.
Balak in Balaam Aleiratō
36Balak in Balaam kava jo ti athei pha, Moab ramria Arnod Tuidung panga khōpui Ar a khan ama intōpui sik a kase jo. 37Balak in ahnenga ati, “Heisa mo ahma inkeia kahei manbek lai che akava mak che? Ke’n pui katluk a hlōman pek tor mak che ning tia namandon mo?”
38Balaam in amasôn, “Kei kahong jo eng, hongmak enga mo? Pathen in ahri pek eng rōk kha ke’n kahritor.” 39Khana Balaam kha Balak leh inṭhōi heia Huzoth khōpuia kase jo hei, 40khana khan Balak in se leh kemōng athat a ahme kha Balaam leh a’nṭhōipui hlamkakeihei alei mansâk hei.
Balaam Tlâ-sân Inkhatna
41Ajîng jîngkâra Balak in Balaam kha Bamoth Baal katlung aleiṭhōi, khana inphut Balaam in Israel mipuihei kha ṭhahrep chu aleihmu tor hei.
Tans Gekies:
MIJAHEI 22: KOMRBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.