Mattá 4
4
Shaytán Issáyá chakkásit
(Markás 1:12–13; Luká 4:1–13)
1Randá, cha Pákén Ruhay rahshóniá Issá gyábáná shot tánke Shaytán áiá bechakkásit.#4:1 Chakkásag, bezán ázmáesh kanag, emtehán gerag. 2Chell shap o chell róch róchag dáragá rand Issá shodig but. 3Gorhá Shaytán pa áiay chakkásagá átk o gwashti: “Agan taw Hodáay Chokk ay, é sengán begwash nagan bebant.” 4Issáyá passaw dát: “Pákén Ketábá nebisag butag:
‘Mardom tahná pa nán zendaga nabit,
cha Hodáay zobánay sajjahén habaráni mannagá zendaga bit.’” #4:4 Mussáay Wáz 8:3.
5Padá Shaytáná Issá pákén shahrá bort o mazanén parasteshgáhay diwálay borzterén jágahá óshtárént o 6gwashti: “Agan taw Hodáay Chokk ay gorhá watá cha edá jahlád dawr beday chéá ke nebisag butag:
Hodá pa tai negahpániá wati préshtagán hokma kant o
á, tará wati dastáni delá dárant
tán tai pád dhókéá malaggit.”#4:6 Zabur 91:11–12.
7Issáyá gwasht: “Haw, bale chosh ham nebisag butag: Wati Hodáwandén Hodáyá machakkás o ázmáesh makan.”#4:7 Mussáay Wáz 6:16.
8Nun Shaytáná yakk sakkén borzén kóhéay sará bort o cha ódá donyáay sajjahén bádsháhi o áyáni shán o shawkati pésh dáshtant o 9gwashti: “Agan taw mani démá kóndhán bekapay o maná parastesh bekanay, man é sajjahénán tará dayán.” 10Gorhá Issáyá gwasht: “Oo Shaytán! Cha mani démá gom bay! Pákén Ketábá nebisag butag: Wati Hodáwandén Hodáyá parastesh bekan o tahná hamáiay hezmatá bekan.”#4:10 Mussáay Wáz 6:13. 11Nun Shaytáná á yalah dát o shot. Préshtag átkant o Issáay hezmatesh kort.
Issáay hezmatkáriay bongéj
(Markás 1:14–15; Luká 4:14–15; Yuhanná 4:43–45)
12Wahdé Issá sahig but ke Yahyá dazgir kanag butag, gorhá Jalilá shot. 13Náserahay shahri yalah dát o Kaparnáhumay shahrá jahmenend but. Kaparnáhum, Jalilay mazangwarmay#4:13 Mazangwarm, bezán daryáchah. kerrá, Zebulun o Naptáliay kabilaháni sardhagárá ent. 14Paméshká é dhawl but ke Eshayá nabiay gwashten sarjam bebit:
15 Zebulun o Naptáliay sardhagár, gwarmay mazanráhay sará,
Ordonay kawray á dastá, Jalilay hamá hand o hankén ke darkawm jahmenend ant,
16 hamá kawmá ke zendi taháriá gwastagat,
mazanén rozhné dist o
hamá molk o dhagár ke ódá mark sáhél at,
óday jahmenendáni sará rozhnáiá sar jat. # 4:16 Eshayá Nabiay Ketáb 9:1–2.
17Cha hamá wahdá, Issáyá é kolaw o paygámay rasénag bongéj#4:17 Bongéj, bezán bendát, shoru. kort. Gwashti: “Cha wati gonáhán pashómán bebét o tawbah bekanét, chéá ke ásmáni bádsháhi nazzikk ent.”
Issáay awali chárén morid
(Markás 1:16–20; Luká 5:2–11; Yuhanná 1:35–42)
18Wahdé Issá Jalilay mazangwarmay lambá#4:18 Lamb, bezán dámon, kerr. gám janagá at, do bráti dist, yakké Shamun at ke pannámi Petros at o domi áiay brát Andriás at. Áyáni kár máhigiri at o á wahdá pa máhigiriá wati dám o máhórán gwarmá chér géjagá atant. 19Issáyá gón áyán gwasht: “Byáét, mani randgiriá bekanét o man shomárá anchosha kanán ke máhig geragay badalá, mardománi delá shekár bekanét.”#4:19 Delay shekár kanagay maksad mardomán Hodáay ráhá árag ent. 20Áyán hamá damáná wati dám yalah dát o áiay hamráh butant. 21Wahdé kammé démá shot, dega do brát, Ákub o Yuhannái distant ke Zebdiay chokk atant. Bójigay#4:21 Bójig, bezán lánch, kashti. tahá gón wati pet Zebdiá neshtagatant o wati máhórán sráchag o sharr kanagá atant. Issáyá á lóthetant. 22Áyán ham wati pet gón bójigá yalah dát o áiay hamráh butant.
Jalilay damagá, Issáay hezmatkári
(Markás 1:35–39; Luká 4:42–44)
23Issáyá sajjahén Jalilá tarr o garda kort. Áiá kanisaháni#4:23 Kanisah, bezán Yahudiáni parasteshgáh. tahá mardom dars o sabakka dát, Hodáay bádsháhiay mestága#4:23 Mestág, bezán wasshén hál, bashárat. rasént o mardom cha nájórhi o nádráhián jórh o dráha kortant. 24Sajjahén Suriahá áiay nám o tawár prosht o mardomán har dhawlén nájórh o nádráh, jenni, mergiay nádráh,#4:24 Mergi anchén nádráhié ke mardomá béhósh o kap o gajja kant. Arabi o Pársiá “sar'”. lang o mondh Issáay kerrá áwortant o áiá dráha kortant. 25Jalil, Dekápulis, Urshalim, Yahudiah o Ordonay kawray á dastay hand o damagáni bázén mardomé átk o Issáay hamráh but.
Tans Gekies:
Mattá 4: HPKB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2015-2022, Wycliffe Bible Translators, Inc. and the Balochi Bible Translation Team. All rights reserved.