دَرگوَز 35
35
شَبَّتئے کانون
1موسّایا اِسراییلئے سجّهێن مهلوک مُچّ کرت و گۆن آیان گوَشتی: ”اِش اَنت هما کار که هُداوندا شمارا اِشانی کنگئے هُکم داتگ: 2شش رۆچا کار کنێت، بله هپتمی رۆچ شَبَّت اِنت، په شما پاکێن رۆچے و آرام کنگئے رۆچ اِنت. اے رۆچا په منِ هُداوندا وَپْک کنێت. هرکَسا شَبَّتئے رۆچا کار کرت، آییئے سِزا مَرک اِنت. 3شَبَّتئے رۆچا وتی لۆگ و مێتگان آس رۆک مکنێت.“
تَمبوئے اَڈّ کنگئے چِن و لانچ
4موسّایا گۆن سجّهێن اِسراییلی مهلوکا گوَشت: ”اے هما هُکم اِنت که هُداوندا داتگ: 5چه وتی مال و هستیا په هُداوندا شُگرانه پێش بکنێت. شُگرانه هما کَس بدنت که دلیَ پرماییت. په هُداوندا اے چیزّان بیاریت: تلاه و نُگره و بْرنج، 6آسمانی و جَمو و سُهرێن پَژم، شَرّێن لیلُم، بُزئے مود، 7گوَرانڈئے رَتکگێن سُهرێن پۆست، دگه پئیمێن مُهرێن پۆست، چِگردئے دار، 8په چراگان ٹێل، په پِر مُشَگی رۆگن و وشبۆێن سۆچُکیا مَساله و 9په اێپۆد و سێنَگپۆشا سِنگِ سُلئیمان و دگه گرانکیمّتێن سِنگ.
10شمئے سجّهێن هُنَرمند بیاینت و اے سجّهێن چیزّان اَڈّ بکننت که هُداوندا هُکم داتگ: 11شاهِدیئے تَمبوا گۆن تۆکی تَمبو و پۆش و کَڑی و مِکّ کنگی تَهتَگ و گوَربَست و مِنُک و بُنهِشتان، 12پێتیا گۆن گوَرباسک و کَپارَتئے سرپۆش و پێتیئے دێما لۆنجانێن پردها، 13ٹێبَلا گۆن گوَرباسک و سجّهێن سامان و پاکوَنڈێن نگنان، 14په رُژناییا، چِراگدانا گۆن چراگ و ٹێل و سجّهێن سامانان، 15بۆسۆچی کُربانجاها گۆن گوَرباسک و پِر مُشَگی رۆگن و وشبۆێن سۆچُکیان، شاهِدیئے تَمبوئے دپئے پردها، 16سۆچَگی کُربانیگئے کُربانجاها گۆن بْرِنجێن جالی و گوَرباسک و سجّهێن سامانان، بْرِنجێن ترَشتا گۆن پادَگا، 17پێشگاهئے پردهان گۆن تَهتَگ و بُنهِشتان، پێشگاهئے دپئے پردها، 18تَمبوئے مێه و پێشگاهئے مێه و سادان، 19دینی پێشوا که پاکێن جاگها رئونت و هِزمتَ کننت، په آیان دَزگواپێن گُد، په دینی پێشوا هارونا پاکێن گُد و په آییئے مردێنچُکّان گُد که دینی پێشوایی کنگئے وهدا گوَرااِش بکننت.“
20گڑا اِسراییلیانی سجّهێن مهلوک چه موسّائے کرّا در آتک و 21هرکَس که دلا پرمات و اَرواها سِکێن دات، آییا په شاهدیئے تَمبوئے کاران، په سجّهێن هِزمتی کاران و په پاکێن گُدان شُگرانهَ آورت. 22جنێن و مردێنَ آتکنت. هرکَس که دلا پرمات، آییا ٹاسین#35:22 ٹاسین سَهتے که په جیگئے بندَگا کارمرزَ بیت. و نالُک و مُندریکّ و هار، هر تَهرێن سَهت و زێوَرَ آورت. هر مردما تلاهئے ٹێکیَ آورت و په هُداوندا چست کنگی کربانیگَ کرتنت. 23هرکَسئے کِرّا که آسمانی و جَمو و سُهرێن پَژم یا شَرّێن لیلُم، بُزئے مود، گوَرانڈئے رَتکگێن سُهرێن پۆست یا دگه مُهکمێن پۆست هستاَت، آورتی. 24هرکَسا که نُگره و بْرنجئے شُگرانهے داتَ کرت، په هُداوندا آورتی و هرکَسئے کِرّا که چِگردئے دار هستاَت، آورتی که په تَمبوئے یکّ نه یکّ بَهرێا کار بِدنت. 25سجّهێن هُنرمندێن جنێنان جَلّکئے#35:25 جَلّک ائوزارے که په بندیکّئے گوَپگا کار بندگَ بیت. کار دستا کرت و اے چیزِّشَ گوَپت و آورتنت: آسمانی و جَمو و سُهرێن پَژم و شَرّێن لیلُم. 26آ سجّهێن کارزانتێن جنێن که دلا پرماتنت، پَسئے مودِشَ زرت و جَلّکئے کارِشَ کرت. 27مهلوکئے سرۆکان په اێپۆد و سێنَگپۆشا سِنگِ سُلئیمان و دگه گرانکیمّتێن سِنگَ آورت. 28په چراگانی رۆک کنگا و په پِر مُشَگی رۆگنا و په وشبۆێن سۆچُکیانی اَڈّ کنگا مَساله و ٹێلِش هم آورت. 29اِسراییلئے هر جنێن و مردێنے که دلا پرمات، آییا په هُداوندا هما ٹێکیَ آورت که دلا گوَشت، په اے سَرجمێن کارا که هُداوندا موسّائے وَسیلها هُکم داتگاَت.
بِسَلێل و اُهولیاب
30موسّایا گۆن اِسراییلیان گوَشت: ”بچارێت، هُداوندا چه یَهودائے کَبیلها اوریئے مردێنچُکّ، اَهورئے نُماسگ بِسَلێل گچێن کرتگ و 31چه هُدائے روها پُرّ کرتگ و اَگل و پَهم و زانت و هر کِسمێن دستئے هُنَر بَکشاتگ. 32په تلاه و نُگره و بْرِنجئے سامانانی سرا نَکشئے سازگا، 33په سِنگئے تراشگ و نادێنگا و په دارئے آجِنَگ و دگه هر پئیمێن اِزمکاریا هُنَری بَکشاتگ. 34هُداوندا بِسَلێل و دانئے کَبیلهئے اُهولیابِ اَهیسامَک سِکّارێنَگئے لاهکی هم داتگاَنت. 35هُداوندا اِشانا په هر پئیمێن کارا هُنَر بَکشاتگ، په هما سجّهێن کاران که آجِنۆکِشَ کننت و اِزمکارِش آسمانی و جَمو و سُهرێن پَژم و شَرّێن لیلُمئے سرا گوَپنت و دۆچنت، بزان هر کارے که بَلدێن اِزمکارَ کننت.“
Tans Gekies:
دَرگوَز 35: HPKB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2016-22 Wycliffe Bible Translators, Inc.
