دَرگوَز 21
21
گُلام دارگئے کانون
1”اے هما کانون اَنت که ترا گۆن کئوما گوَشگی اَنت: 2اگن تئو اِبرانی گُلامے بها زرت، اے گُلام تان شَش سالا تئیی هِزمتا بکنت. هپتمی سالا په وتی آزاتیا هچّ زَرّ مدنت و برئوت. 3اگن تهنا آتکگ تهنا برئوت، بله اگن چه پێسرا سور کرتگێنے گڑا جَن هم آییئے همراهیا برئوت گۆن. 4اگن واجها جنے دات و جنێنا بَچّ و جنکّ پێدا کرت، جَن و چُکّ واجهئیگَ بنت و گُلام تهنا برئوت. 5بله اگن گُلام دپِ وت بگوَشیت: ’منا وتی واجه و وتی جَن و چُکّ دۆست اَنت و آزات بئیگ و رئوگَ نلۆٹان،‘ 6گڑا واجه آییا هُدائے بارگاها ببارت. گُلاما دروازگ یا دروازگئے چانٹئے دپا ببارت، دْرَپشے#21:6 دْرَپش مزَنێن سوچِنے که دستگے پِری و په چیزّێئے سُمبَگ و دۆچَگا کار بندگَ بیت. بزوریت و آییئے گۆشا بِسُمبیت و آ گُلام تان زندگ اِنت، واجهئے هِزمتا بکنت.
7اگن مردے وتی جنکّا مۆلِدێئے هسابا بها بکنت، آ جنکّ مَردێنێن گُلامانی پئیما آزات کنگ مبیت. 8اگن اے جنکّ واجهێا گچێن کرت و زرت و رندا واجها پَسُند نبوت، گڑا باید اِنت بِلّیت که جنکّا دگرے بمۆکیت. واجها اے هکّ نێست که آییا ڈَنّی مردمێئے کرّا بها بکنت، چێا که آییا وت گۆن جنِکّا بێوَپایی کرتگ. 9اگن واجها جنکّ په وتی بَچّا گچێن کرتگ و زرتگ، گڑا جنکّا هما هَکّا بدنت که وتی جندئے جنکّا دنتی. 10اگن واجه دگه جَنے بگیپت، وتی ائولی جَنا چه وراک، پۆشاک و جَنی هکّا زِبَهر مکنت. 11اگن آییا اے سئیێن چیزّان مدنت، جنێن په وتی آزاتیا هچّ زَرّ مدنت و برئوت.“
جنگ و جێڑَهئے سِزا
12”هرکَسا که مردمے جت و کُشت، آییئے سِزا مَرک اِنت. 13بله اگن آییا په نازانتی اے کار کرت و منِ هُدایا هم اے کارئے دێم نداشت، گڑا من جاگهے گیشّێنان که هۆنیگ بتچیت و همۆدا برئوت. 14بله اگن کَسێا په زانت یَکّێئے سرا اُرش کرت و کُشتی، آییا منی کُربانجاها هم پَناه نێست. چه اۆدا هم دَری کن و مَرکئے سِزایی بدئے. 15هرکَسا که وتی پت یا مات جت، آییئے سِزا مَرک اِنت. 16هرکَس که مردمێئے دُزّگا گِرگ بوت، آ مردمی بها کرت یا وتی کِرّا داشتی، آییئے سِزا مَرک اِنت. 17هرکَسا که وتی پت یا مات نالَت کرت، آییئے سِزا مَرک اِنت. 18اگن مردمان وتمانوتا جنگ کرت و همے وهدا یکّێا دومیارا سِنگے یا مُشتے جت و آ مردم نمُرت بله تَهتئے باهۆٹ بوت و 19رندا پاد آتک و دَزلٹّئے مَدتا ڈَنّا گَشت، گڑا جنۆک دگه سِزا دئیگ مبیت، بله زئوال بوتگێن وهدئے تاوان و اِلاجئے هَرچ و دَرچان پُرّ بکنت. 20اگن کَسێا وتی گُلام یا مۆلد لَٹّ جت و گُلام یا مۆلد آییئے دستا مُرت، گڑا جنۆک سِزا دئیگ ببیت. 21بله اگن گُلام یا مۆلدا تان یکّ و دو رۆچا هِچّ نبوت، گڑا جنۆکا سِزا پِرَ نبیت، چێا که گُلام وتی واجهئے مال اِنت.
22اگن مردێنان جنگ و داوا کرت و همے وهدا لاپپُرّێن جنێنے جَتِش و جنێنئے چُکّ اِشکند بوت، بله دگه مسترێن جانی تاوانے نرسِتی، گڑا جنۆک هما ڈَنڈ#21:22 ڈَنڈ، بزان مَلام، جَریمه، جُرمانه. و مَلاما پُرّ بکنت که جنێنئے مَردَ لۆٹیت و کازی بگیشّێننت. 23بله اگن جنێنا مزنێن جانی تاوانے رَست، گڑا ساهئے بدل ساه اِنت، 24چمّئے بدل چمّ، دنتانئے بدل دنتان، دستئے بدل دست، پادئے بدل پاد، 25سۆچْکئے#21:25 سۆچْک، بزان سُچگئے ٹَپّ، سُچگئے درد. بدل سۆچْک، ٹَپّئے بدل ٹَپّ و زئیمئے#21:25 زئیم، بزان هما ٹَپّ که پۆستئے چێرا اِنت و هۆنَ ندنت. بدل زئیم اِنت. 26اگن کَسێا وتی گُلام یا مۆلدئے چَمّا شَهماتے جت و آییئے چمّ کۆر بوت، گڑا چمّئے بدلا گُلاما آزات بکنت. 27اگن وتی مۆلد یا گُلامئے دنتانی پْرۆشت، گڑا دنتانئے بدلا گُلاما آزات بکنت.
28اگن گۆکێا مردێن یا جنێنے کانٹ جت و کُشت، گۆک سِنگسار کنگ ببیت و مردم آییئے گۆشتا مئورنت. گۆکئے واهند#21:28 واهند، بزان مالِک، هُدابُند. سِزا دئیگ مبیت. 29بله اگن آ گۆکا پێسرا هم کانٹ جتگ و آییئے واهُندِش هال داتگ و هُژّار کرتگ، و واهندا اَنگت گۆک نبستگ و آ گۆکا مردێن یا جنێنے کُشت، گۆک سِنگسار کنگ ببیت و واهند هم مَرکئے سِزا دئیگ ببیت. 30بله اگن چه گۆکئے واهندا مَلام لۆٹگ بوت، گڑا په وتی زندئے مۆکَگا هر مَلامے که چه آییا لۆٹگَ بیت، بدنت. 31اگن گۆکا کَسێئے بَچّ یا جنکّے کانٹ جت، اۆدا هم کانون همِش اِنت. 32اگن گۆکا گُلام یا مۆلدے کانٹ جت، گڑا گۆکئے واهند گُلامئے واجها سی شِکِل#21:32 شِکِل، اِسراییلیانی کِرّا سَنگ و وَزنے بوتگ. سی شِکِل کِساس سئے سَد و پنجاه گِرام اِنت. نُگره بدنت و گۆک سِنگسار کنگ ببیت.
33اگن کَسێا چاتێئے دپیگ دور کرت یا اگن کَسێا چاتے جَت و آییئے دپی نگِپت و گۆک یا هرے چاتا کَپت، 34چاتئے واهند مَلامان پُرّ بکنت، مُرتگێن دَلوَتا بزوریت و دَلوَتئے واهُندا زَرّان بدنت. 35اگن کَسێئے گۆکا همساهگێئے گۆک جت و آ گۆک مُرت، گۆکانی واهُند جنۆکێن گۆکا بها بکننت و زَرّان نێم بکننت، مُرتگێن دَلوَتا هم نێم بکننت. 36بله اگن مردمَ زاننت که آ گۆکا پێسرا هم کانٹ جتگ و اَنگت واهندا گۆک نبستگ، گڑا آ واهُند گۆکئے بدلا گۆکے بدنت و مُرتگێنا بزوریت.“
Tans Gekies:
دَرگوَز 21: HPKB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2016-22 Wycliffe Bible Translators, Inc.
