دَرگوَز 17
17
چه تَلارا آپئے دَر آیگ
1هما پئیما که هُداوندا هُکم داتگاَت، سجّهێن اِسراییلی مهلوک چه سینئے گیابانا رهادگ بوت و داران و رئوانا شت و رِپیدیما اُردی کرت، بله اۆدا آپ نێستاَت که مردم بوَرنت. 2مردم گۆن موسّایا اَڑِتنت، گوَشتِش: ”مارا آپ بدئے که بوَرێن.“ موسّایا گوَشت: ”چێا گۆن من اَڑگا اێت؟ چێا هُداوندا چَکّاسێت؟“ 3بله مردم اۆدا تُنّیگ اَتنت، آیان موسّائے سرا نُرُنڈِت و گوَشت: ”تئو چێا مارا چه مِسرا در کرت و آورت؟ که مارا و مئے چُکّان و مال و دَلوَتان چه تُنّا بکُشئے؟“ 4موسّایا هُداوندئے کرّا پریات کرت و گوَشت: ”اے مهلوکا چۆن بکنان؟ اے وَه په منی سِنگسار کنگا اۆشتاتگاَنت.“ 5هُداوندا گۆن موسّایا گوَشت: ”اِسراییلئے لهتێن کماش همراه کن و چه مهلوکئے دێما گوَزان کن. هما اَسا که تئو گۆن آییا نیلّئے کئور جت، آییا دستا کن و برئو. 6بچار، اۆدا هُرێبا تئیی دێما من تَلارێئے#17:6 تَلار، بزان مُهر و مزنێن سِنگ، سِنگێن کۆهی ٹُکّر. سرا اۆشتان. گۆن اَسایا تلارا بجن، په مهلوکا ورَگی آپ درَ کئیت.“ گڑا موسّایا اِسراییلئے کماشانی چمّانی دێما اَنچُش کرت. 7آییا آ جاگهئے نام مَسَّه#17:7 مَسَّه، اِبرانی زبانا مَسّهئے مانا اِنت ”چَکّاسَگ“. و مِریبَه#17:7 مِریبَه، اِبرانی زبانا مِریبهئے مانا اِنت ”اَڑ و کُڑ کنگ، اڑَگ“. کرت، چێا که اۆدا اِسراییلی اَڑِتنت و هُداوندِش هم چکّاست و گوَشتِش: ”بارێن هُداوند گۆن ما گۆن اِنت یا نه؟“
اَمالیکیانی پرۆش
8اَمالیکی آتکنت و رِپیدیما گۆن اِسراییلیان جنْگِش کرت. 9موسّایا گۆن یوشایا گوَشت: ”لهتێن مَرد گچێن کن و برئو، گۆن اَمالیکیان جنگ کن. باندا من هُدائے اَسایا دستا کنان و جُمپئے سرا اۆشتان.“ 10یوشایا هما پئیما کرت که موسّایا گوَشتگاَت و گۆن اَمالیکیان جنگی کرت. موسّا و هارون و اَهور جُمپا سر کپتنت. 11هر وهدا که موسّایا دست چستَ کرتنت، اِسراییلی بالادستَ بوتنت و هر وهدا که وتی دستی جَهلَ کرتنت، اَمالیکی بالادستَ بوتنت. 12موسّائے دستان دَم برت. هارون و اَهورا سِنگے آورت و آییئے چێرا دات. موسّا سِنگئے سرا نِشت. آیان موسّائے دست گِپت و بُرز داشتنت، یکّێا راستێن دست و دومیا چَپّێن دست. اے پئیما موسّائے دست تان رۆنندئے وهدا جَهل نکپتنت و 13یوشایا اَمالیکی پئوج په زَهم پرۆش دات.
14هُداوندا گۆن موسّایا گوَشت: ”اے کِسّها کتابێا نبشته کن که شَمۆشگ مبیت. اے کِسّها یوشائے کِرّا بیار. چێا که من اَمالیکئے نام و نِشانا چه جهانا سَرجمیا گارَ کنان.“ 15موسّایا کُربانجاهے اَڈّ کرت و آییئے نامی کرت ”هُداوند منی بئیرَک#17:15 بئیرَک، بزان پَرچَم، جَنڈی، اَلَم. اِنت“. 16گوَشتی: ”منا هُداوندئے بادشاهی تَهتئے سئوگِند اِنت که هُداوند نَسلانی نَسل گۆن اَمالیکیان جنگَ کنت.“
Tans Gekies:
دَرگوَز 17: HPKB
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© 2016-22 Wycliffe Bible Translators, Inc.
