Matai 1
NTK50
1
Nkanda ya mbutukulu ya Yesu
1Nkanda ya mbutukulu ya Yesu Klisto, mwana ya Davidi, mwana ya Abalahami. Luk. 3:23
2Abalahami vandaka tata ya Isaki, Isaki tata ya Yakobi, Yakobi tata ya Yuda ye bampangi ya yandi. 1 Mose 21:2; 25:24; 29:35
3Yuda ye Tamali butaka Pelesi ye Sela, Pelesi tata ya Heselone, Heselone tata ya Lami. 1 Mose 38:27; 1 Lus. 2:4, 5
4Lami tata ya Aminadabi, Aminadabi tata ya Nasoni, Nasoni tata ya Salamoni. Luti 4:19
5Salamoni ye Lakabi butaka Boasi, Boasi ye Luti butaka Obedi, Obedi tata ya Isai.
6Isai tata ya Davidi, ntinu, Davidi ye nkento ya vandaka ya Ulia butaka Solomo. 1 Sam. 17:12; 2 Sam. 12:24
7Solomo tata ya Lehabami, Lehabami tata ya Abia, Abia tata ya Asa.
8Asa tata ya Yosafati, Yosafati tata ya Yolami, Yolami tata ya Usia. 1 Nt. 15:24; 2 Nt. 8:16, 24
9Usia tata ya Yotami, Yotami tata ya Ahasi, Ahasi tata ya Hiskia. 2 Lus. 26:23; 27:9; 2 Nt. 16:20
10Hiskia tata ya Manase, Manase tata ya Amoni, Amoni tata ya Yosia. 2 Nt. 20:21; 1 Lus. 3:14; 2 Lus. 33:25
11Yosia tata ya Yekonia ye mpangi ya yandi mu ntangu ya bau natwaka ku Babeli. 2 Nt. 23:30, 34; 1 Lus. 3:15, 16
12Kulanda ya bau natwaka ku Babeli, Yekonia tata ya Sealatieli, Sealatieli tata ya Zelubabeli. 1 Lus. 3:17, 19; Yes. 3:2; 5:2
13Zelubabeli tata ya Abiudi, Abiudi tata ya Eliakimi, Eliakimi tata ya Asoli.
14Asoli tata ya Sadoki, Sadoki tata ya Akimi, Akimi tata ya Eliudi.
15Eluidi tata ya Elasali, Elasali tata ya Matani, Matani tata ya Yakobi.
16Yakobi tata ya Yosefi, bakala ya Malia ya butaka Yesu, ya bingwa Klisto.
17Mpilayai bambandu yonso tuka Abalahami ti Davidi ikele babandu kumi ye iya; bambandu tuka Davidi ti bau; natwaka ku Babeli ikele kumi ye iya; bambandu tuka bau natwaka ku Babeli ti Klisto ikele kumi ye iya.
Lubutuku ya yandi ye nkumbu ya yandi
18Lubutuku ya Yesu Klisto vandaka mpilyai: Bu ngudi ya yandi Malia silwaka kwa Yosefi, bu bau imene kwiza sikamosi ve, yandi monwaka na divumu ya katuka na Mpeve Yanlongo. Luk. 1:37
19Kansi Yosefi bakala ya yandi, sambu na yandi vandaka muntu ya lunungu ye zolaka ve kumonisa yandi nsoni nantwala ya bantu, yandi zolaka kubika yandi mu kinsweki. 5 Mose 24:1
20Bu yandi yindulaka mambu yai, tala, wanjo ya Mfumu monikaka kwa yandi mu ndozi, kutuba: Yosefi, mwana ya Davidi, tita ve kubaka Malia nkento ya nge, kadi yina ya yimitwa mu yandi ikele ya Mpeve Yanlongo.
21Yandi tabuta mwana bakala, ye nge tabinga nkumbu ya yandi YESU, kadi yandi tavulusa bantu ya yandi na masumu ya bau. Luk. 1:31; 2:21; Bis. 4:12; 10:43; 13:38
22Mambu yai yonso vandaka, na yo lenda maniswa ya Mfumu tubaka mu mbikudi, kutuba:
23Tala, nkento ya imene kuzaba bakala ve tavanda na divumu ye tabuta mwana bakala; bau tabinga nkumbu ya yandi Emanueli, tendula ya yo ikele yai: Nzambi ikele na beto.
24Yosefi sikamaka na tulu ye salaka mpilamosi wanjo ya Mfumu sikidikisaka yandi, ye bakaka nkento ya yandi.
25Kansi yandi zabaka yandi ve ti yandi butaka mwana bakala; yandi bingaka nkumbu ya yandi YESU.

L’Alliance Biblique de la République Démocratique du Congo

Vind meer uit oorLe Nouveau Testament en Kikwango 1950