Aasee 2
2
Biilu cɛi sɛnɛi Hala-o
1O vɔsi diinndɔɔ nin o masale Darius len bɛngu, o paale bidiin a lepilɛndɔlen coo, o paangii ŋɔmmɛwndɔɛi nin, mí sɔɛi Mɛlɛka-e tɛɛngulun vannda a sondo Hasee vana-tɛɛngaa-diom Hala-o-o aa: 2«Soo o Sorobabɛl masa ibungaa Yuda, po Sɛaltiɛ-lo lo, o Yosue bolle vanaa-solia-lasálàá, po Yehosadak-o lo a o vanaa tɔ̀a kpow lo, mà ɲuna nda aa: 3‹O niaa tɛɛn, vana pum co vɔ pá o ce mɛɛ Cɛiyo ho ndóò naŋ o tasendɔ yɛ-o? Vɛ̀ɛ̀ niaa co yɛ ndu nihau cɔu? Vɛ̀ɛ̀ la ce maa naŋɔɔ kon siŋnun ɲɛ fondoo le? 4Lelan, nɔm Sorobabɛl, luei yoomuan. Ya Mɛlɛka soaa nuaa ni. Nɔm Yosue bolle vanaa-solia-lasálàá, po Yehosadak-o bɛɛ, luei yoomuan. Niaa vanaa tɔ̀a lɛŋnden nin kpow, la lueinun yoomuan. Ya Mɛlɛka soaa nuaa ni. La tosa baalaa, Kani i co niaa ikɛi. Ya Mɛlɛka-Nɔ-Kpaayaa-Kpow-vo o soaa nuaa ni. 5Sɔɛi ya solin o sondo lɔ́ɔ́ niaa fula Esipte-o-e yɔŋnun ken ni. Kɔl nuu vanin niaa tɛɛn, lelan siòòŋii bíì niaa le: 6Kani nuaa ya Mɛlɛka-Nɔ-Kpaayaa-Kpow-vo dimi ni aa: ‹O lo cɔɔlu cobe mì hiilu halataalaa a lɛŋnden, mì hiiluu mɛmma ihɛllan a lɛŋnde kɔngɔlen. 7I hiiluunin vanaa-mangalaa-isɔɔa kpede, mì bolofaa ndaa kpow hin nanu, mì pei Cɛiyo ho a biiloo. Ya Mɛlɛka-Nɔ-Kpaayaa-Kpow-vo dimi lende ni. 8Ya nɔ volion a sianion ni. Diom ya Mɛlɛka-Nɔ-Kpaayaa-Kpow-vo soo-o co kon ni. 9Biilu Cɛiyo ho hiawnin biilu Cɛi tasoo, Mɛlɛka-Nɔ-Kpaayaa-Kpow-vo dimi lende ni. I kenin niaa kɔlɲuloo o fonda kon. Diom ya Mɛlɛka-Nɔ-Kpaayaa-Kpow-vo soo-o co kon ni.›»
Vanaa co a diandaa Hala o hɔl te-a
10Paangii ŋɔmahiɔɔlundɔɛi va malɔ bidiin a lehiɔɔlu, o vɔsi diinndɔɔ nin o masale Darius len bɛngu, mí sɔɛi Mɛlɛka-e dimulun Hasee vana-tɛɛngaa-diom Hala-o aa: 11«Nuaa Mɛlɛka-Nɔ-Kpaayaa-Kpow-vo dimi ni aa: ‹Ɲuna vanaa-solia-lasálàá mà muli sɔɛi he: 12Te vanndo vow pɛ visii sálài o doma ndɔɔ nin, mì doma kon pilan buloo, ɲɛdiaa pum, mɔiyan, cuɛiyan te kon te ɲɛdiaa súú-súù ka, vɛ̀ɛ̀ ɲɛ kon siŋnun pá ɲɛ siŋnun teengen le Mɛlɛka-o lelan?›» Mí vanaa-solia-lasálàá muli aa: «Ɛ-ɛ». 13Mí Hasee ɲuna nda vɛlɛ aa: «Te vanndo siŋnun pɛ vana nɔɔlɛiyo le vanaciee vílɛ́i o pilan-ndo, mò kɔ pilan ɲɛdiaa pum, vɛ̀ɛ̀ ɲɛdiaa kon siŋnun pá ɲɛ nɔɔlɛiyo lelan?» Mí vanaa-solia-lasálàá muli aa: «Oi, mò siŋnun o nɔɔlɛiyo.» 14Mí Hasee muli aa: «Lende vannda ha co ni, lende vanaa co o lɛŋnden nden nin-nda co ya Mɛlɛka o hɔl ni. Diom ya Mɛlɛka soo-o co kon ni. Lende baalala nda co tosaa a bala ndalan ndan la co ni. Ɲɛm nda co hunɔɔ ya o hɔl-lon kpow, n'nɔɔlɛiyon n co ni.»
Kandɔɔ hau, la va vanaa biyaa isɔɔa
15«La dɔw ɲɛ co hunɔɔ tosan o hau kɔɔli-o taasi ɲɛkɛndɛi. Lɔ́ɔ́ pá mì la kandu powtan hɛɛnduuo le Cɛi-Mɛlɛka-o mingio tangullo, 16yɛɛ nɛ va yɛ niaa tosalanndo? Te vanndo ndóò kɔɛ pɛ maalon cuaa panio bidiin o konda, tɔ́ daama ndóò komal ni. Te vanndo ndóò kɔɛ pɛ le mɔiyan litililan beleŋuɛɛnu kɔndɔɔ o doolaa nin, litililan bidiin daama ndóò komal ni. 17Ya Mɛlɛka, mí veesiaa ɲɛm niaa vaa-on, mí tosa mí n sia o tumndan coo, mí tuisi loeon delian lecoo. Kɛ a kon kpede, la muungu ya ibuŋ te.
18La dɔw ɲɛ co hunɔɔ tosan o hau kɔɔli-o taasi, paangii ŋɔmahiɔɔlundɔɛi co hau malɔ bidiin a lehiɔɔlu, paalen nden Cɛi nuu kilan ni, Ya Mɛlɛka pɛɛn. La dɔw taasi ɲɛkɛndɛi. 19Vɛ̀ɛ̀ ɲɛ lo lɛ pá o lakonda? Nakɔla n'rɛsɛnnda, nakɔla n'buumbuulan, nakɔla krenadieelan a nakɔla olivieelan la co lɛ komɔɔ le. Kɛ kandɔɔ hau, i co niaa duaa nuu tuisi coo.»
Mɛlɛka hɛli Sorobabɛl mó yiilu ndu kpemaa
20O paale bidiin a lehiɔɔlundɔlen coo, o paangii ken nin, mí sɔɛi Mɛlɛka-e dimulun vɛlɛ Hasee o bɛmbɛ diinndɔɔ aa: 21«Dimul Sorobabɛl co masa ibungaa Yuda-o maa i co halataalaa a lɛŋnden hiiluu. 22I co kpɛŋɛla lemasala masaa kombiaa, mì tɛɛmbuu kpaaya masɛi vanaa-mangalaa-isɔɔa, mì yɔl ɲɛla ɲaanannda ndala soa nan-ndan a vanaa ɲaanun lan-nda. Soa a vanaa ɲaanun o soa coo-a viawnunnin lɛŋ. Vana-vana delnin o mɔɛi cɔvii puapilɛ ndɔɔ bɛngu. 23Paale len, ya Mɛlɛka-Nɔ-Kpaayaa-Kpow-vo co sɔɛi nuaa ni, i cuanin nɔm Sorobabɛl po Sealtiɛl-lo, nɔm vana ni baalaa pɛɛn, ya Mɛlɛka-Nɔ-Kpaayaa-Kpow-vo co sɔɛi nuaa ni, mì siinguu nɔm maa kelɛi tampɔŋii lemasa, kani nɔm ya hɛli ni. Diom ya Mɛlɛka-Nɔ-Kpaayaa-Kpow-vo soo-o co kon ni.»
Tans Gekies:
Aasee 2: BKG
Kleurmerk
Kopieer
Vergelyk
Deel
Wil jy jou kleurmerke oor al jou toestelle gestoor hê? Teken in of teken aan
© Alliance Biblique en Guinée