MATIUS 3
3
Tong ha' tebaraa' Yohanes Batis
(Mrk. 1:1-8, Luk. 3:1-18, Yoh. 1:19-28)
1Tovoo' inah Yohanes Batis nebaraa' kelunan tong ahang tana' tong tana' Yudea. 2 Ka' ha' néh ngan réh, Jian keh piso jin penyala' keh uban lepah danii' jaka' Allah Pengeja'au, ha' néh. 3 Uban Yohanes nah néh éh benara' nabi Yesaya dalem ha' tebaraa' néh rai, ka' ha' néh.
Pu'un jah kelunan éh mejui tong ahang tana', Ka' ha' néh,
Petenup jalan Tuhan ngan
pepejek jalan Néh, ha' néh.
4 La'ah pakai Yohanes nah senuai jin bulun unta, ngan jeret é'éng néh kulit ka'an, éh penguman néh karah ngan nyak layuk. 5La'ah irah jin Yérusalem ngan jin tana' Yudea ngan tutuh tana' tong baa' Yordan, tai tavin éh. 6La'ah pu'un réh ngakun penyala' réh, la'o inah Yohanes ngebatis réh dalem baa' Yordan.
7 Bang hun Yohanes na'at kelunan pinaa' éh kivu adet Parisi ngan irah éh kivu adet Saduki tuai ke' réh menyat éh ngebatis réh, boh éh tioo pané ngan réh, ka' ha' néh, Ka'ah pohoo' torok, séé' éh bara' keh omok kelap jin kemerek Allah éh juk teneng tong keh nah. 8Jian keh maneu' kekat éh jian éh omok pepoléng ka'ah lepah piso jin kekat kesa'at keh. 9 Mai keh ngelan tong ha' keh éh bara', Abraham éh tamen améé'. Mai keh seruh Tuhan juk pepurip keh uban keh pohoo' anak Abraham, akeu' bara' ngan keh, Allah éh pu'un penyukat ngepaléu kekat bateu' iteu' malui anak Abraham, ha' néh. 10 Ha' Yohanes kepéh, Hun iteu' pu'un kapak lepah petenup tebeng kekat inah kayeu' pah avéé' lakat néh. La'ah siget-siget kayeu' éh bé' ngebuaa' ngan buaa' éh jian, inah éh juk tenebeng néh ke' néh bet éh dalem luten. 11Mu'un akeu' ngebatis ka'ah lem baa' dokoo' néh pepoléng ka'ah lepah piso jin penyala' keh, bang pu'un jah usah éh juk tuai jin la'o ké' iteu', iah juk ngebatis ka'ah neu' Sahéé' Ni'ai ngan luten. Iah éh pelapah ja'au ngaran jin akeu', Sapét kasut néh péh bé' ku' tekep mihin. 12Iah ngamit tapan néh ke' néh napan kekat parai ke' néh tipun kekat lo'ong néh dalem luvung néh, bang kekat éh upih néh, notong néh tong luten éh bé' omok pata', ha' néh.
Tong Yohanes ngebatis Tuhan Yésus
(Mrk. 1:9-11, Luk. 3:21-22)
13Tovoo' inah tuai néh Yésus jin Galilia tai baa' Yordan dokoo' Yohanes omok ngebatis éh. 14Bang bé' Yohanes keloo' ngebatis éh, ka' ha' néh ngan Yésus, Tekep éh akeu' ke' Tuhan ngebatis, bang pu'un ka'au' tuai tavin akeu', ha' néh.
15Ha' Yésus mipa éh, Turut ke' éh kenat hun iteu', uban kenat éh jalan pesukup pengeloo' Allah, ha' néh. Boh Yohanes kivu sohoo' néh ngan ngebatis éh.
16Tovoo' Yésus musit jin baa' nah, pu'un langit pukap ngan ta'an néh Sahéé' Tuhan tuhun tong néh, layan néh barei'-okoo' juhit punai. 17 La'ah pu'un jah ha' jin seruga, éh bara' ka', Iteu' néh Anak Ké' éh kemurung Ké', payoo' mu'un kenin Ké' tong Néh, ha' néh.
Tans Gekies:
MATIUS 3: PNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia