SPREUKE 25:24-28

Dit is beter om op die hoek van ’n platdak te bly, as binne-in ’n huis saam met ’n vrou wat oor alles stry. Goeie nuus van ’n ver land af is soos koue water vir ’n moeë mens se dors. ’n Regverdige mens wat swig voor die goddelose is soos ’n fontein vol modder, soos ’n put met vuil water. Om te veel heuning te eet, is nie goed nie, so ook is iemand wat voortdurend sy eie eer soek. Iemand wat homself nie in bedwang kan hou nie, is soos ’n stad sonder ’n muur wat beskerming bied.