Yun 4
4
Ɓasa ŋuɗufa Yunusa
1Zɗəgana a tsa skwi ya ta Yunusa ɗekɗek wu, ka gufaftá ŋuɗuf ni. 2Ka mag tsi ta duʼa da Yawe, kaʼa mantsa: « Ar Yawe! Nana na a na mnə yu ma nzakwa ɗa tata haɗika ɗa ya kay rki? Tsaya si kəl yu ka kuma hwayaghuta da Tarsis, kabga nda sna yu kazlay kagha ná, Lazglafta ta maga zɗakatahuɗi ka, ta tawa hiɗahiɗa ka, haɗ ka ta ga sidi misimmisim wu kəʼa. Dagala zɗaku da kagha, ta zlaŋ zla ka ta zaɗaku si dzaʼa ka da magay. 3Ndanana tama Yawe ɗa, kdəkkdək klap kla ta hafu ma iʼi, kabga ta draŋ ya mtu yu, ka nzata ɗa nda hafu, » kaʼa. 4« Ra gha ki ɓasay gha ta ŋuɗuf na? » ka Yawe nda tsi.
5Ka saghu Yunusa ma huɗa luwa Ninive ka laghu nzakta kətsaʼu nda ga silwa tsa luwa ya. Hada, ka magaftá tsi ta glakam, ka nzamtá tsi ma sulkuma ni, ka ngha skwi dzaʼa slanaghatá tsa luwa ya. 6Ka ɗyanaftá Yawe, Lazglafta ta ghughula, ka glanaghatá Yunusa, ŋa vlaŋtá sulkum, ŋa mbanafta ma tulekata ni. Ka rfu Yunusa ta rfu katakata, dabga tsa ghughula ya. 7Ama ga mahtsima ni tsaɗakur vli, ka ghunadaghatá Lazglafta ta mtarak, ka lagha hatá tsa ghughula ya, ka ghwalutá tsi. 8Tahula tsa, ka saf fitik ghwinzaŋ, ka vyagaftá Lazglafta ta falaka silwa, furak nzakwa ni. Ka dzə fitik ta Yunusa ma ghəŋ, ka kuma suʼufay. Ka zbə tsi ta mtaku, kaʼa mantsa: « Ta draŋ ya mtu yu ka na, ka na nzata ɗa nda hafu na, » kaʼa.
9Ka Lazglafta nda Yunusa mantsa: « Ra gha ki ɓasay gha ta ŋuɗuf dabga na ghughula na na? » kaʼa.
« Mantsa nzakwa ni, riha ra ɓasay ɗa ta ŋuɗuf ha prək ka mtuta ɗa! » ka Yunusa.
10Ka Yawe mantsa: « Kagha, ta taway ka ta hiɗahiɗa ta ghughula, skwi ya kul ghuyaŋtá ka ta ɗaŋwa ta ghəŋa ni. Kagha a ta ɗyanafta wu, ta rviɗika turtuk glafta tsi, ta rviɗika turtuk mtuta tsi guli. 11Iʼi yeya tama rki má dzaʼa kwal kul tawa hiɗahiɗa ta Ninive luwa dagala, ta malay mnduha ta dəmbuʼ dərmək nda hisambsak (120.000), kul snaŋta dgatá zeghwa taŋ, nda zlaɓa taŋ, nda ndəghata rini tani tama rki na? » kaʼa.
Tans Gekies:
Yun 4: xed
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© Wycliffe Bible Translators, Inc. All rights reserved.