THRÜNTAN 4
4
Kain tüsho Abel
1Kheakü Adamnü aniube Eve keak nung tüsho alibe mübünkeangde kambah Kain zübejih, tüsho tha, “Inü mihtsürü khülang Atungpuh kilimnü ngüdo.” 2Jushu she alibenü aniurü Abel zübejih. Abel ju namfimihnu neakrü lakheah, tüshe Kain a thulu wochakrü lakheah. 3Kim khülang ching Kainnü yimlukhi chingnü Atungpuh kilim kingaün hande arü. 4Abelnü she api namfimihnu bolung adüji tüsho amüdang hande arü. Atungpuhnü Abel tüsho apinü kingaünkhi leangkhi, 5tüshe apinü Kain tüsho apinü kingaünkhi müleangkhi. Jumonü Kainnü khide bukakhiuk tüsho api mi khuram. 6Jumonü Atungpuhnü Kain ki tha, “Tümüde nü bukakhiukcho? Tüsho tümü thsükhi nü mi khuramcho? 7Nünü lungkide rhimokhülaa, nü müleangkhibea de? Tüshe tümü alungkianü nünü ju mürhimosho, khimdopü ki neak yaplah; hanü nü mürheangchoh, tüshe nünü ju kukbeah.”
8Kheakü Kainnü aniurü Abel ki tha, “Ike thulu ching yüanü.” Tüsho ane thulu ching lachoki Kainnü aniurü Abel azhihde wusu tüsho api laksah.
9Judüki Atungpuhnü Kain ki keokhi, “Nü niurü Abel kükheak la?” Tüsho apinü alo, “Inü mümükheah. I ju I niurü neakbuh a de?” 10Tüsho Atungpuhnü tha, “Nünü tümü rhimokhea? Nü niurü thiyihnü alo chingnü I ki zhichoh. 11Kheakü küpü lonü nü niurü thiyih nü khah chingnü leangkhipü kadünü ju lo chingnü nü muthrumüneando. 12Küyimki nünü alo wochakbanü junü nü kilim tümü makhiukshih, nü a lomi ching lapung mülade tsotsahrümtsahrü thsübah.”
13Tüsho Kainnü Atungpuh ki tha, “I thsümüchikhi ju inü marümkhukbe ah! 14Atsütsü khihni nünü alomi chingnü I yana bahdo; I nü kheaknü jikde alabah; I a alomi ching lapung mülade tsotsahrümtsahrü khülang thsübah, tüsho shepünü I ngübanü I laksahbah.”
15Tüshe Atungpuhnü api ki tha, “Jude yung, khürünü Kain laksahsho, api kheak thüne ki royimbah.” Tüsho khürünü api ngübah mülaksahshihpü thsüde Atungpuhnü Kain kheak mütsan khülang yihkihjih. 16Jumonü Kainnü Atungpuh kinü tso tüsho Eden aniakhiuklim Nod lomi ching la.
Kain Tsühsoniusobo
17Kainnü aniube kheak nung, tüsho mübünkeangde kambah Enok zübejih. Tüsho apinü kiuto khülang thsübah atsührü Enok mung müshide ji. 18Enok kilim Irad zübejih; tüsho Irad kheaknü Mehujael, Mehujael kheaknü Methushael, tüsho Methushael kheaknü Lamek trükkhit. 19Lameknü aniube mahne, Ada tüsho Zilla lu. 20Adanü Jabal zübe. Api ju shiwühbo akamde khimyambo ching larü abuh lakheah. 21Aniurü mung Jubal lakheah. Api ju bingshang tüsho khungpi khungrü alala abuh lakheah. 22Zillanü müwayinchi tüsho yinchi rhimosorü alala thsangdanrü Tubal-kain zübe. Tüsho Tubal-kain niurü aliberü Naama lakheah.
23Lameknü aniube ki tha:
“Ada tüsho Zilla, I düsheak soang;
nüke Lamek niuberübo, inü athakhi aniang:
Inü athrününgtsüng mihtsürü khülang apinü I yurijihmonü laksahdo.
24Kain dünkheak thüne ki royimsho,
Lamek dünkheak a nerükheak thüne ki labah.”
Seth tüsho Enosh
25Kheakü Adamnü aniube kheak nung, tüsho alibenü tsührü khülang zübe tüsho amung Seth#Mülüjihkhi de jide tha, “Thrünpuhnü Abel müthri tsührü khülang I kilim jihdo, tümütüsho Kainnü api laksah.” 26Seth tsührü kheaküshe alakheah, tüsho amung Enosh de ji. Judüki mihtsürübonü Thrünpuh mung jipü tankih.
Tans Gekies:
THRÜNTAN 4: YIMCBSI
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.