Gewilde Bybelverse vanaf Ree 6

Wiels de Sind äa Loon es de Doot; oba de Jnodengow von Gott es daut eewje Läwen en Christus Jesus, ons Har.

Wiels de Sind woat nich äwa junt harschen, wiels jie nich unja daut Jesaz, oba unja de Jnod sent.

Soo sent wie nu met Am begroft worden derch daut Deepen en dän Doot, om daut wie, jrod soo aus Christus derch de Harlichkjeit vom Voda von de Doodje opperwakjt worden es, uk en een nieet Läwen waundlen sullen.

Jäft uk nich june Jlieda han fa de Sind aus Instrumenten von de Ojjerajchtichkjeit, oba jäft junt selfst Gott han, aus Läwendje von mank de Doodje, un jäft june Jlieda no Gott, aus Instrumenten von de Jerajchtichkjeit.

Wie weeten dit, daut ons oola Mensch met Am jekjriezicht es, om daut de Kjarpa von de Sind to Enj jeit, daut wie de Sind nich mea deenen.

Jrod soo uk jie, hoolt junt selfst doafäa, daut jie to de Sind jestorwen sent, oba fa Gott läwen en Christus Jesus, onsem Harn.

Waut sell wie dan nu sajen? Sell wie en de Sind bliewen, om daut de Jnod toonemt? Sea lang nich! Woo sell wie, dee wie to de Sind jestorwen sent, noch en ar läwen?

Weet jie nich, daut, wäm jie junt hanjäwen aus Kjnajchts däm to jehorchen, däm siene Kjnajchts sent jie, däm jie jehorchen, entwäda de Sind toom Doot, ooda däm Jehuarsom to de Jerajchtichkjeit?

Oba Gott traft Dank, daut jie Kjnajchts von de Sind wieren, oba vom Hoaten jehuarsom jeworden sent no daut Väabilt von de Lia, dee junt äwajäft es. Un nu, daut jie frie jeworden sent von de Sind, sent jie Kjnajchts fa de Jerajchtichkjeit jeworden.