Gewilde Bybelverse vanaf Taetasi 3

Deel

Taɂa, ɂihaitaa wau sii ɂi koru mae sena ɂuna, Waratoɂo, ne ɂe haɂamauri koru, ɂe haataɂania reteha naia ma raetoɂoha naia hana taɂaa, ana ɂe ɂeroa Miɂi Naia mai. Ana horoɂa nena, ɂe haɂamauri koru. Hii ɂare rete ma otooto koru tauɂi, ɂe mae taua hana Waratoɂo ɂe ka haɂamauri koru. Taɂa, ɂe haɂamauri koru tamana ɂe raeuruhi koru ke. Ɂe haɂamauri koru ana rotoha ne Anoa Maea ɂe watea hutaha haoru ma mauriha haoru hana koru aɂi na. Ma Waratoɂo ɂe watea Anoa Maea hautaɂai hana koru ana Tisasi Karaesi ne ɂe haɂamauri koru na. Tamana raesenaha Waratoɂo hana koru ke, ɂe haɂamauri koru ɂuna hana ɂe ka iria koru otooto noɂo. Ɂe ɂiɂi otooto ana koru noɂo, hana koru ka toɂo ana haɂaɂuniha ɂe taua hana ɂi koru, hakae tarena, mara maahaneha ɂe ana koru hana mauriha taraunaɂi.

Taetasi, ɂo ko haipoonia hakae tarena Waratoɂo hana niɂirae tari ana ɂoniɂoniha ɂe rete hana kira. Ɂe ɂuriɂe. Kira ka niɂirae haɂapainaa painaha ɂe ana hii noni paina ana kahumanu ma hii araha ni hanua. Kira ka roɂo soɂona rikimana wara otooto taɂaa paina kira naɂia, ma kira ka ɂoni akau hana tau ana rikimana ɂare ɂe rete. Kira si naɂa waeria taɂena noni moa rerehoɂa. Ma ɂe hana kira ka maemaekoɂa/maneko ma kira ka niɂirae soɂona poɂopoɂoha ɂe ana te noni ma ka maroɂita hana haipooni ana taɂaa haɂiraku.

Taɂa, haru taɂaa, raena kira ɂe hana paunimaeha pipiuɂa raona rokota ni taɂaa Waratoɂo, mara naɂaha soɂona hutaa ana marahuna taɂaa kira Tiu. Ɂo si raitaɂania naɂaha ɂuna ka rau matorana ɂau. Ma ɂo si haitariri haahia ma rerehoɂa soɂona hii wara otooto Waratoɂo ne Mosisi ɂe kiria warita. Hii rauta ni paunimaeha pipiuɂa ma naɂaha ma haitaririha ma rerehoɂaha nena ni, ɂe waawaa ma ɂe si haipooni ɂau.

Ma ɂo ko haɂapasua taɂena mane ɂe toɂi hitaria taɂaa Waratoɂo ana haɂausuriha rora ɂe tauɂi. Ɂaremara ɂo ko haɂapasua rua horoɂa, taɂa ɂe mae panoro hamu, ma ɂo ko ɂihaitaa ana mane nena.