Gewilde Bybelverse vanaf Mateusi 15

Deel

Janejuru rupi oike mã'ẽ rõwã janemoai ipi. Janepy'a ai pupe wyi oẽ mã'ẽ pè tè “ijai mã'ẽ” eu. Ava mõ ipy'a ai remẽ, oporegeta aità. Ava mõ ipy'a ai remẽ, keetà. Ojipy'amogeta ai ipi. Ãmõ, porojuka. Ãmõ, ojimomy'a. Ãmõ, nojimoavai weevewarà rè. Ãmõ, imona jomoma'e rè. Ãmõ, nivoi mã'ẽ omo'y teywete koivo kõ rè. Ãmõ, ijayvu teitete koivo kõ pè. Wãisõ ekoi, ipy'a ai rewarà mõ, e'i.

Kee pejẽ tite ipi: “Ja'umã'ẽ nijakusuive iwa mã'ẽ poromoky'a Janejare'e kyty”, pejẽ tite. Aepo jaa rè kee a'e. Ja'umã'ẽ rõwã poropy'amoai ipi. Janejuru pupe oike mã'ẽ rõwã. Ayvu ai janejuru rupi wyi oẽ mã'ẽ tè poropy'amoai ipi, e'i Jesu.

Kee e'i itõkõ Janejare'e ayvu rõmõ ikusiwa: “Aã jane kõ ‘Janejare'e koty rewarà mõ ije’, e'i epe. Ajamã'ẽ ojuru e'e pupe kõrijõ tè emoe'e kupa! Opy'a kõ pupe rõwã! Nojipy'amogetai 'eteay ere kupa! Emoe'e maevo sõ tite tè kupa! Manyvo jaa mõ rõwã emoe'e tite kupa! Wãmõi kõ rekoawerà rè poromo'e kupa remẽ, ‘Janejare'e ayvu tè’, e'i tite wekoawerà pè kupa!” e'i maekwerà.

Ãmẽ Jesu “hoõ” e'i ky'y. – “Aje ywete” ere ekasia pè. Neremimotarà rupi katu amokatutà ajawyi, e'i. Ameve py'awarà mõ imemyry ikatupa ãmẽ ky'y.

Ãmẽ wãivĩ “aje ipõ” ne'i. Ãmẽ ywesõ ojiporijauesaoka ijupe. Ojimoenãpa'ã ovake. – Epãtavõ jẽ rejupa, jõvijã! e'i. Jesu e'i ijupe: – Eretãrãgwerà kõ rè ypyry ajo ike! Isaeu kõ rè ypyry. A'e kõ rè ypyry rã'ĩ aja'atà. Tekoua amome'utà terekuwa. Ãwitõ janeãkarãgwerà rè ypyry jaja'a ipi. Jaapoi katu ipi. Ojimi'u jẽ kupa upa remẽ, nijaekyi amãtejẽ emi'õ kõ iwyi kõ ime'ẽ janerima jawarà pè ipi. Ãwĩvo ve eretãrãgwerà kõ rè ypyry aja'a, e'i Jesu. Ãmẽ wãivĩ aepo wenu remẽ, okuwa katu manyvo jaa tè aepo e'i remẽ. Ajawyi e'i Jesu pè: – I'ete, aje. Neporegeta katuay, e'i. Ajamã'ẽ emi'õ kurerà o'a namesa 'aryvo wyi remeve eima kõ o'u ipi, e'i. Ãwĩvo ve ore. Neretãrãgwerà kõ rè neja'a remẽ, nekasi jẽ orere neja'a, e'i. Nopa'ãi nekasia, e'i ijupe.