Kha vha Tshile Vhutshilo ho Ḓalaho Ndivho!预览

U Funa Vhaṅwe

Nga lufuno lu titimaho na lu aluwaho lwa Mudzimu lune lwa khou shuma vhutshiloni hashu, vhukoni hashu ha u funa vhaṅwe vhathu vhu ḓo aluwa. Nga lufuno lwo vhibvaho kha vhaṅwe hu ḓa lutamo lu aluwaho lwa u sumbedza lwonolwo lufuno, nga zwenezwo ra ḓadzisa iṅwe ya ndivho dza ndeme vhukuma dze Mudzimu a ri sikela dzone:

“Mudzimu ndi Ene we a ri ita zwine ra vha zwone; ndi Ene we a ri sika nga huswa nga u ri ita vhathihi na Khristo, uri ri tshile ri tshi ita zwivhuya, vhunga na Mudzimu o dzula o zwi dzudzanya uri ri zwi ite.” Vhaefesa 2:10

Zwo vha zwi kha pulane ya Mudzimu tshifhinga tshoṱhe uri inge lufuno nga zwiito. Muṅwe na muṅwe washu u na vhuimo kha pulane khulwane ya Mudzimu ya u kwama matshilo a vhaṅwe nga mishumo yavhuḓi.

Tshifhinga tshoṱhe musi ri tshi kwama vhutshilo ha muṅwe nga ipfhi ḽa vhulenda, ri tshi fhindula ṱhoḓea yo khetheaho, kana ri tshi sokou thetshelesa wa mbilu i vhavhaho, a ri sumbedzi lufuno lwashu fhedzi, fhedzi ri sumbedza lufuno lwa Mudzimu khavho nga riṋe. Nga heyi nḓila, ri vha vhaimeli vha ndeme vha u vhonetshela vhugala ha Mudzimu nga nḓila i penyaho kha shango ḽine ḽa vha ḽo ḓala swiswi na u fhelelwa nga fulufhelo. Vha dzhiele nzhele maipfhi a Yesu:

“Inwi ni tshedza tsha shango. Muḓi wo fhaṱwaho nṱha ha thavha a u koni u dzumbama. Ndi nnyi-vho ane a ri u funga luvhone a lu tiba nga mvuvhelo? Ha lu vhei vhudzuloni halwo kani, uri lu vhonetshele vhoṱhe vha re henefho nḓuni? Na tshaṋu tshedza kha tshi dzule tshi tshi vhonetshela vhathu nga u ralo, uri vha vhone mishumo yaṋu mivhuya vha rende Khotsi aṋu wa ṱaḓulu.” Matiosi 5:14-16.

U vhonetshela tshedza tshashu ndi u tendela tshedza tsha Mudzimu tshi tshi ri vhonetshela. Hu na nḓila tharu dza ndeme dza u vhonetshela vhugala ha Mudzimu kha vhaṅwe: u vha ṱhanzi i shumaho; u shumela vhaṅwe; na u khonano na Vhakhriste. U vhea lutendo lwashu kha nyito nga hedzi nḓila tharu zwi ita uri vhaṅwe vha kone u tshenzhela lufuno lwa Mudzimu, vhuthu na khathutshelo, zwoṱhe zwi tshi itela vhugala hawe.