Kha vha Tshile Vhutshilo ho Ḓalaho Ndivho!预览

U Alusa Lufuno Lwashu Kha Mudzimu

U ṱahulela lufuno lwa u funa Mudzimu khamusi zwi nga konḓa u fhira u vha na khonani kana muraḓo wa muṱa. Tshiṅwe tshiitisi tshihulwane ndi tsha uri a ri koni u vhona Mudzimu nga lwa ṋama. Nga zwenezwo, u vhulunga na u alusa lufuno kha Mudzimu zwi ṱoḓa lutendo.

“Zwino lwone lutendo ndi mini? Lutendo ndi u vha na ngoho na zwe ra zwi lavhelela, nangwe zwi sa vhonali ra ḓi zwi fulufhela ri sa timatimi.” Vhaheberu 11:1

Lutendo lu ri tendela u livhisa lufuno lwa vhukuma lu bvaho mbiluni dzashu lwo livhaho kha Mudzimu, naho ri sa koni u mu vhona nga maṱo ashu a ṋama. U itela u alusa lufuno lwashu kha Mudzimu, lutendo lu fanela u vha lu shumaho vhutshiloni hashu ha Vhukhriste.

Musi ri tshi vhala Ipfhi ḽa Mudzimu, ri tshi vhona lufuno lwawe na u dzhenelela hawe vhutshiloni hashu na vhaṅwe, na u ṱanganelana nae nga thabelo, ri thoma u ḓivha Mudzimu nga lwo engedzeaho. U mu ḓivha nga lwo engedzeaho musi tshifhinga tshi tshi khou ḓi ya zwi ṱuṱuwedza lufuno lwa vhukuma lwo vhibvaho khae vhutshiloni hashu.

U alusa lufuno lwonolwo kha Mudzimu nga lutendo lwashu khae zwi dovha zwa ḓitika nga u sumbedza lwonolwo lufuno nga zwiito:

“Na lutendo lwo ralo; arali lu sa vhonali nga mishumo lwo fa.” Jakopo 2:17

Lufuno lwashu kha Mudzimu nga lutendo, lu tshi tshimbila na u ḓikumedzela hashu kha Mudzimu nga zwiito ndi vhushaka ha dzimbilu vhune ha ṱoḓea kha vhushaka vhu bvelelaho, vhune ha khou aluwa nae.

Naho lufuno lwashu kha Mudzimu lu tshi ḓo aluwa vhukuma nga ṅwambo wa u shumisa lutendo lwashu, ndi zwa ndeme u pfhesesa uri zwenezwi zwiito a zwi iti uri Mudzimu a ri fune na u ri takalela.

Ngoho ndi ya uri Mudzimu o vha o no ri funa nga vhuḓalo lu si na tshiṱahe riṋe ri sa athu u mu ḓivha. Lufuno lwa Mudzimu ndi tshisima tsha vhukuma tshashu: lufuno lwashu khae na kha vhaṅwe.