2 Korantiyawa 11
11
Bulus ma ɓahona parasa
1Me kama kǝsǝ nkaa sǝ sǝm ma hautǝma na ngeek maɗ. Pa nǝn kǝnasǝ, sǝ tom sǝmmo ma niina. 2Nǝn tom rǝmara a ɗuura saa, ma nkamǝra rǝmara u yauta Kaa yǝn tomsǝ a ɗuura saa wa. Nǝ werkǝ me kǝsǝ nsaa Almaseho, ɗǝm nǝn taa me sǝ tom kaɗɗo ɗekɗek wa, me nǝsǝ na a sani nga ɓaan nasǝ pera a yaa yǝsǝn kerisi ya. 3Pa nǝn kura kokto me tom pa mbu nteesǝ Hawawu ɓa, ǝsǝ ntee kǝn da. Nsaa yǝ nlaasǝ ma wee nuuwa usu yǝ tom tenatenato. Maaso saase kǝn, senta saa kǝsǝ kwaa sǝ lee na ɗuura saa wa nsaad ma kaɗɗo waaso ma kuɗa fin a wiiyo a Almaseho ni wa. 4Pa me yaake yǝ wo yǝn nkeesǝ mara a ɗuura Yeso kǝra ɓol ma u tǝ nkeesǝsǝ mara ira wa, hana me sǝ taa wis ko ɓol, ma wis sǝ konsǝ wa, hana mara kwalari kǝra ɓol, ma u sǝ konsǝ wa, hankara sǝn haɗ aa kon nkamǝra mbusǝsa ra! 5Pa a wǝro waano, ɓaa sǝn nkee ɓǝsǝ me, ɓǝ “wiina ɓahona ɓa” ɓǝ faɗnǝ ma mbukake ra. 6Minda nase ɓaa fǝɗkǝnǝ pǝro kan mara wa ra, pa nǝ ma maa mbuka wa. Tǝ weɗɗasǝ mbusǝsan a ɗǝta nsaad. 7Nǝ nkeesǝ mara kwalari u Kaa ra wa a salto. Nǝ loo ɗuura naa me ɓaa sǝ na mbarta. Yaa nǝ tom tenatenato nǝu? 8Tom nga nǝ pǝk ɓaata kwauwo ɓan bǝɗ Kaa ɓa ma lau kon kwasira a ɓoni wa, me nǝsǝ tom tinima. 9A fer nǝsǝ ke ma saase wa, nǝn taa mɓaa, hana maaso siso, nǝ pǝtasǝ rǝka ra. Ɓaata ɓan bǝɗ Kaa ɓǝ fiɗsǝ a put Makidoniya wa, ɓǝ wonǝ ma nsaad mbu nǝn taasǝ ɓa. Nǝ tisǝ lǝnglǝnggo a fer siso ra, ɗǝm kǝnǝ faɗ wiiyo a tommo maaso wa. 10Nga ɓongtǝra Almaseho yǝsǝ ɗaan a nanii ya, yaake sem kǝn a put Akaya wa nsaad, kiyaa nkaa yǝnǝ saa nheura sǝra ra. 11Mbu kwaa mbi nǝn nkeesǝsǝ maasou? Siso me nǝ sem ma yauta saa rau? Ai, Kaa yǝ maan me nǝ ma yauta saa! 12Kǝnǝ faɗ wiiyo ma mbisi kon kwasira mɓaa ra wa a saani, me nǝ saa “wiina ɓahona sǝsa” taa mbu nheura ɓa, me ɓǝn nkee me, ɓǝn tom tinima keke ma taase.
13Nkamǝra ɓet sǝsa ra, ɓǝn ɓahona para sa, ɓǝn ɓan tinima para ma. Ɓǝn kang ɗuuti ɓose nga ɓahona Almaseho ɓa. 14Ən mbu weɗara ɓa ra, me hanan Shaitan yǝn kang ɗuura ira nga yǝn antimira Kaa u ɗekɗekto ya. 15Me maaso, sem mbu weɗara ɓa ra, me ɓaa ɓǝn tomsǝsǝ tinima ɓa, ɓǝ kang ɗuura ɓora nga ɓan tom tinima u yǝsǝ keke a wiiyo a Kaa ni ɓa. A feɗefeɗe ɓǝkǝ taa nsaa ɓoso u ka tom keke ma tinima ɓosa wa.
16Nǝ ɓaarǝ nǝsǝ nkee me, aa lee yaake yǝ sen me nǝ haura ra. Pa me sǝn sen me nǝ maaso, to, aa lee sǝ nǝ too nga haura, me nǝ taa mbu kǝnaa nheu ngeek ɓa. 17A nkamǝra nheura nǝn tomsǝ ma ɗuura naa ya, sem Ankundi yǝ nkeesǝ me nǝ nkee wa ra. Awo, a mara ra, nǝn nheu nga haura. 18Tomsǝ me ɓaata kǝn ɓaa ɓǝn nheusǝ nga ɓaa a put taandi wa ɓǝn tomsǝ wa, aa lee nase kǝn nǝ tom maaso. 19Waso sǝ wee nuuwan ɓong, pa sǝn hur kuɗa ma sǝmmo ke ma hauta wa! 20Me yaake tisǝ tom hooto wa, sǝn sǝm ma sase, hana yǝ konsǝ mbuka, hana yǝ hoɓsǝ, hana yǝ weɗɗasǝ me yǝ kokrok, ɗǝm hana yǝ ɗaktǝsǝ a oota. 21Waano nǝn kura ɗuura nwaara nǝ nkee me, tǝ nkaa tǝ tom mbusǝsa ra me tǝ sem kokrok ra!
Pa me yaake kiyǝ nkaa yǝ nheu a ɗuura mbukake ra, nase kǝnǝ kweetǝ nǝ tom maaso kǝn. A hanɓa nǝn kan nga haura! 22Me ɓǝn ɓaa Ibraniyawa ɓa, nase nǝ maaso kǝn. Me ɓǝn ɓaa Israˈila ɓa, nase nǝ maaso kǝn. Me ɓǝn tuwa Ibrahim wa, nase nǝ maaso kǝn. 23Me ɓǝn ɓan tom tinima Almaseho ɓa, nase nǝ faɗ ɓǝn! Nǝn kan nga nǝn farfara! Ai, nǝ faɗɓǝ kweeton dem, ɓaa tinǝ a pursunan nfee, ɓaa hoɓnǝn dem, ɗǝm nǝn kana ee woɗɗa ya nfee. 24Kanan wonon, ɓaa Yahudawa ɓa ɓǝn hoɓnǝsǝ ma lǝɓra pusa taatǝn aa nhaa wanakurun ya. 25Kanan taatǝn ɓaa Romawa ɓa ɓǝ hoɓnǝsǝ ma lǝɓra wa. Ɗǝm ɓaa pǝta nǝ muɗkon ma ɗungate. Kanan taatǝn kurnyamo okǝsǝ nǝ ɗaan a si wa. Nǝ pǝta tǝron ma tuka ɗaan a aulaara, pa ɓaa wo nǝ hiki. 26A siko nǝn tomsǝ wa, nǝ pam ma kongsa a senaa, ɗǝm nǝ pam ma kongsan a nema ɓan ngwel ɗǝɗa ɓa, nǝ kana kongsan nfee a nema ɓaata ɓǝna ɓaa Yahudawa ɓa ni, nǝ kana kongsan nfee a nema a ɓaa ɓǝn Yahudawa ra ɓa ni, nǝ kana kongsan nfee a ura ɓolɓol, nǝ kana kongsan nfee a sanglo, nǝ kana kongsan nfee a aulaara, nǝ kana kongsan nfee a nema ɓaan bǝɗ Kaa para ɓa. 27Nǝ tom tinima dem, ɗǝm nǝ wee kongsan, nǝn tǝr nfee munda sem ra, nǝ wee kongsa ma ɗoora ma mbraa siman. Ɗǝm nfee nǝn taa mbuseya ra, nǝ wee songran ɗǝm nǝ taa luktu tungtung wa ra. 28U nwa ma peera mbusa ɓolɓol u nǝ nkee ra wa, hana a han nwaya naɓa, nǝn kura ma lǝnglǝngo senggo kwauwo ɓan bǝɗ Kaa ɓa wa nsaad. 29Me yaake yǝ wal kokrokton, nǝn kura nga nǝ wal niina, me ɓaa ti yaake yǝ tom tenatenato, mbusǝsa ǝn tinǝ nǝ kura nfiima dem.
30Me tommon ɗaɗ me nǝ tom nheura, to, aa lee nǝ nheu ma mbu ɓǝn weɗɗasǝ wallo waano wa. 31Kaa yǝ maan me nǝ kanaa para ra, sase yǝsǝn Kaa ya, ɗǝm yǝn Papa Ankundi Yeso Almaseho ya. Aa lee saltǝra aa kaɗ a saani pakarese! 32A fer nǝsǝ a ur Dimaska wa, ngwamna yǝn tomsǝ kuɓsutu a kunda kuɓu Aretas wa ya, yǝ liki inntiime ur Dimaska wa, me yǝ nǝ ma. 33Pa sik ɓǝna ɓǝnǝ ti a karkadanggo, ɓǝnǝn fiɗ ma nkaara ur siso ra, pa nǝ no a sani.
©2023 Seed Company in collaboration with Language Developers and Bible Translators Association