2 Korantiyawa 10
10
Bulus yǝ nkweetǝ nkweera ira a tinima ima
1Nase Bulus ma nkweerane, yaa ɓan nkeenǝsǝ me, “yaa ma ɗuura papa ya” nǝn kǝnasǝ, me nǝ ke ma saase, pa “yaa yǝn kansǝ ɗuura kǝɗ ya” me nǝ sem ke ma saase ra. Nga yaa yǝsǝ ma loo ɗuura wa ma papato u Almaseho wa ya, 2nǝn kǝnasǝ, sǝnǝ kwaalǝ ra, me tom nǝsǝ kan mara ma ɗuura kǝɗ ra me nǝ won, me nǝ maan kǝnǝ nkaa nǝ kan mara ma ɗuura kǝɗ ɓaa ɓǝn nkeesǝ me, tǝn bǝɗ ɗǝɗa u put taandi wa ɓa. 3Hana ka tǝsǝ aa kaɗɗo a put taandi wa ɓa, kit tǝn tomsǝ wa sem nga u put taandi wa. 4Mbu kito ɓǝtaa ǝn u put taandi wa ɓa ra, pa ǝn u kwangto Kaa ɓa wa. Ma lau usu tǝn ookǝ hanta ɓǝsǝ kokrok u senda para wa. 5Tǝn ookǝ hana nkamǝra renǝta nara, ma hana mbi u ka saa maa Kaa ra wa, tǝ ɗǝm kang ma hana nkamǝra senda nara, ɓǝ kang hoota ɗǝm ma yau ee wa a Almaseho ni. 6Tǝ feɗ werkon me tǝkǝ tom kiita ɓongtǝra wa a ɗuura hana nkamǝra mbisi ee nara, ndiira yau ee waaso a Almaseho ni kungsǝ wa.
7Sǝ sengge mbu yǝsǝ a talte ɓa! Me yaake yǝ nkee ma ɗuura kǝɗ me, sase yǝ u Almaseho wa, aa lee eɗ sisi yǝ ɓaarǝ yǝ sene, kiyǝ maa me taase kǝn tǝn u Almaseho wa, nga sase yǝsǝ wa. 8Hanaka nǝn nheusǝ a ɗuura kwangto waato u Ankundi yǝ natǝsǝ me tǝsǝ mar wa, sem me tǝsǝ ookǝ ra, nǝ sem ma mbu kura ɗuura nwaara ɓa daan da. 9Nǝ yauwaa me sǝ wǝr nga nǝn yau me nǝsǝ na kokto ma likarkaraa nǝ nyorsǝsǝ wa ra. 10Ɓan nkee me, “Likarkaraa Bulus sa ǝn mbu lǝklǝk ɓa ma kokrokto, pa me ndǝ ke ma sase a han ɓa, yǝn yaa yǝn kansǝ ma kokrokto ya ra, ɗǝm mara ira sem mbuka ra.” 11Tommon ɗaɗ nkamǝra ɓeta sǝsa ɓǝ maa me, mbukake sem ɓol ɗaan a mbu tǝn nyorsǝsǝ a likarkaraa waato ɓa ra, me tǝ sem kǝnso ra, ma mbu ɗǝm kǝtaa tom ɓa me tǝ ke ma saase.
12Tǝn ɓauniu! Ai, tǝ nkaa tǝ mǝɗkǝ, hana tǝ too nkweerate nga ɓaa ɓǝn minisǝ ee ɓose wa ra. Pa nkamǝra ɓet sǝsa ra, ɓǝn mǝɗkǝ nkweera ɓora a ɗaaso ɓoso, ɓǝn ɗǝm kǝr me ɓǝ maa yaa faɗ ate ni a ɗaaso ɓoso, ɓosa ɓǝ hauta! 13Pa waato, tǝ nkaa tǝ nheu aa faɗ u pamsǝ wa ra, pa kǝtǝ nǝɗ a han Kaa yǝ nǝngtǝsǝ ɓa, u tǝmɓasǝ ma saase wa nsaad. 14Ai, saase kǝn sǝ daan a han Kaa yǝ nanǝsǝ ɓa, pa me maaso, nǝ talǝ nyaayo ma nkaama ra, me nǝ talǝsǝ nǝ ko a saani me nǝ nkee mara kwalari u Almaseho ra wa. 15Nheuwo waato faɗ u pamsǝ me tǝ tom wa ra, ɗǝm ntee tinimsa ɓaata ma ra. Pa tǝn ti kanggo me naɓongtǝra waaso kǝ tomma sokoo, ɗǝm a tommo maaso wa, han tom tinima ɓǝtaa a ɗaaso waaso ɓa, kǝ tomma sooko dem, 16me tǝ nkaa tǝ nkee mara kwalari ra a putsa u a wii waso wa, sem me tǝ nheu a ɗuura tinima ate yǝ weesǝ tommo kǝnso wa ra. 17Pa nga ɓaa nyorsǝ a likarkar Kaa wa me, “Nsaad hana yamni yaa yǝn yausǝ me kiyǝ nheu ya, aa lee yǝ nheu ma Ankundi”. 18Ai, sem yaa yǝn minisǝ ee usu ya, ɓan yausǝ ma sase ya ra, pa yaa Ankundi yǝ minisǝsǝ ya.
©2023 Seed Company in collaboration with Language Developers and Bible Translators Association