2 Korantiyawa 12
12
Mbu Kaa yǝ weɗɗasǝ Bulus a rotǝma ɓa
1Hanaka mbukake sem kǝn kǝnaa hima wa ra, tommon ɗaɗ nǝ tom nheura. Waso kǝnǝ faɗ wiiyo nǝ kan mara a ɗuura mbu Ankundi Yeso Almaseho yǝ weɗɗasǝ nga a rotǝma wa, ɗǝm ma mbu yǝ nwanyǝsǝ ɓa. 2Nǝ maa yaake yaa yǝsǝ u Almaseho wa, naso meeta pu aa nhaa kurun ɓaa toosǝ aa ko ɓoti a liura u taatǝn wa, ko yǝ ɗaan a maabiriu, ko yǝ sem ɗaan a maabiri rau, nǝ maa ra, Kaa fin mbusa yǝ maasǝ wa. 3Ɗǝm nǝ maan me eɗ sisi ɓaa toosǝ aa ko ɓoti a liura u taatǝn wa, ko yǝ ɗaan a maabiri, ko yǝ sem ɗaan a maabiri rau, nǝ maa ra, Kaa fin mbusa yǝ maasǝ wa. 4A liura ɓoti kǝnso yǝ kura matǝmse u aa nkaa aa nkee ra wa, nkamǝra matǝmse sǝsa ɓaa lee ɗǝɗa ete yǝ kan mara a si ra. 5Kǝnǝ nheu a ɗuura nkamǝra eɗ sisi ra, pa nǝ nheu ma ɗuura naa ra, ndub a ɗuura mbu weɗɗasǝ wallo waano ɓa. 6Me kanǝ yau me nǝ nheuwe, kama nǝ tom haura ra, me kǝnǝ tom aa kan mara ɓongtǝra wa. Pa nǝ nheu ra, me nǝ yauwa yaake yǝnǝ too aa faɗ nga yǝn wǝrnǝsǝ wa ra, ɗǝm aa faɗ nga yǝ pǝtasǝ kura a nani wa.
7Me tom nǝ kong nheuwo ma mbu ɓaa nwanyǝsǝ u faɗsǝ nsaad ɓa wa ra, ǝn siso ɓaa tungnǝsǝ siyo ko u kaɗsǝ tǝute a maabiri yaane wa. Siso yǝ nga antime u Shaitan yǝ tungsǝ me yǝnǝ tomma na kongsa wa, ɗǝm yǝnǝ saa nheuwo. 8Kanan taatǝn nǝ kǝnasǝ Ankundi wa, me yǝnǝ ɓaa ma mbǝsa, 9pa yǝnǝ nkee me, “Kwasira naa maa ngǝn, me ma lau wallo waango wa, ɓan wǝrsǝ kungsǝra kwangto waano wa.” Me maaso, ma kwallo kǝnǝ sookǝ nheura ma wallo waano siso wa, me kwangto Almaseho wa, yǝ kaɗ ke ma niina. 10Me maaso, nǝn hur kuɗa ma wallo kokrokto waano wa, ma sǝrma ɓan tomnǝsǝ wa, ma wee kongsa wa, a ɗuura Almaseho ra. Me a fer nǝ walsǝ kokrokto wa, a fer siso nǝsǝ ma kokrokto wa.
Rǝkata Bulus taa a ɗuura ɓan bǝɗ Kaa a ur Korinti ɓa
11Nǝ tom hautǝma nǝn, pa ndǝ saase sǝ kwaanǝsǝ ɓa. Pamman me saase sǝnǝ mini. Hanaka nǝsǝn mbuka ra wa, weɗɗa me, “wiina ɓahona” waaso sǝɓa, ɓǝ faɗnǝn da. 12Kaa yǝ tom mbu maa ɓa ma mbu nhiinyanhiinya ɓa, ma lau waano a ɗaaso waaso, nǝ tom tinimsa naa ma sǝmmo. Mbu nhiinyanhiinya sǝsa ɓǝ weɗɗa me nǝn ɓahone u teno wa. 13Ən mbi kwaasǝ sǝn wǝrsǝ nga sǝ wallan a nuuwa pepere ɓaata kwauwo ɓan bǝɗ Kaa ɓa wau? Ko me nǝ saasǝsǝ me sǝnǝ kwasi ma mɓaa ra wau? To, sǝnǝ lee a senda a mbu kwalakwala sǝsa!
14Waso nǝn kǝr me nǝ wo a saani u taatente wa. Nǝsǝ ti lǝnglǝnggo ko ra, me ndǝ saase nǝn yausǝ wa, sem mɓaa ɓǝsaa ra. Pam me emba ɓǝ too lǝnglǝnggo wiina ɓosa wa ra, pa wiina ɓǝ too lǝnglǝnggo u em ɓosa wa. 15Kǝnǝ kura nepto nǝ toɗ mbu nǝsǝ ma siso ɓa nsaad hana ma ɗuura naa, me nǝsǝ kwasi. Me ɗǝm nǝ sookǝ yauta naa a ɗuura saan, hankara, kǝsǝ pee yauta sǝn tomnǝsǝ tau? 16Kǝsǝ yau ma niina me, nǝ kang lǝnglǝnggo a saani ra. Pa yaake kiyǝ nkee me, nǝ weesǝ nuuwa, ɗǝm nǝsǝ nlaa ma para. 17Ko nǝ pǝksǝ ma lau yaake a ɗaaso ɓaa nǝ tungɓǝsǝ ɓǝ wo a saani ɓa nǝu? 18Nǝ kǝna Titus me yǝ ko a saani, ɗǝm nǝ tung ate an bǝɗ Kaa ya ke ma sase. Kǝsǝ nkee me Titus yǝ pǝksǝ nǝu? Hankara, nase ma sase sem senda fin ǝn bǝɗsǝ ma taase wa rau? Ɗǝm sem ɗǝɗa fin tǝn bǝɗsǝ wa rau?
19Hankara, tangtang ka sǝn ɗim me tǝn kweetǝ me tǝ kon nkweerate a saaniu? Kaa ndǝ sase yǝ maatǝsǝ wa, tǝn nkee ɓongtǝra ma lau Almaseho wa. Ɓaata ɓǝna, ɓaa nǝn yausǝsǝ ɓa, hana tǝ tom mbi, tǝn tom me saase sǝ mbara. 20Ai, nǝn kura kokto, a fer nǝ wosǝ wa, minda nǝ wo nǝsǝ taa nga nǝn yausǝ wa ra, saase kǝn, minda sǝnǝ wǝr nga sǝn yausǝ wa ra. Nǝn kura kokto minda wo nǝ taa kito ma rǝmara ma kuɗa ɓeɓe ra, ma yau ɗuura wa, ma tǝblǝ ɗǝnda wa, ma tang ɓaatǝ wa, ma nik ɗuura wa, ɗǝm ma nik kito wa. 21Nǝn kura kokto me a fer kǝna ɓaarǝ nǝ wo a saani wa, Kaa ɓǝna kiyǝ ti nǝ kura ɗuura nwaara a wii waaso. Nǝn kura kokto me tom nǝ tom kuɗa teptep ra a ɗuura ɓeta dem ɓǝ tomsǝ tenatenato tangtang ɓa wa, ɗǝm ding waso ɓǝ mbisisǝ kon nfaata wa a nsaad nkamǝra tinimsa pepeto ma ra.
©2023 Seed Company in collaboration with Language Developers and Bible Translators Association