Vaeburania 8
8
Yesu Mükumbëki witu Müküü
1Uvii, ihanyo në ifanga nanguu mu asaa nëguuhanya tëërë: Sese gukweti Mükumbëki në Müküü në wëë uvii, wasuu nëwëkhee uvaru wa gëlëlo wa itumbë ra utemi ra Mutemi Müküü Muungu girunde. 2Mweeso uguutendaa mwëmo wa Mükumbëki në Müküü Fana Gweru ino, uu mukhatë a iheme ra tutë nërajengiwe na Müküü tina mwaamuntu.
3Müü Mükumbëki në Müküü wahwaaniywe umüfunyiya Muungu dahwa na ikumbëko, na uvii Mükumbëki Müküü witu imünoneye noo atendeke una gëntu ga udwëëya. 4Nësa mweeso naa wëë afaa mu urëmi, naa atiutendeka mbanduvë mükumbëki, gusoko vërëfo akumbëki vangëja nëvëuduyaa dahwa gwa uhonga Seria. 5Mëëmo awe, a gëkumbëki uunë nyinkhori gutufu na mumiimi wa asaa në ërëfo girunde. Naa gwëë uvii noo kunë Musa. Itungo nënaa wahumbeera urëtenda iheme ëroo Muungu agamukhanëa: “Tenda muu intu uhonga nyinkhori ëyoo nënaa waraghëërwe ukoo ugëtanto.” 6Ëgweeso itungwee Yesu wafewe mwëmo wa gëkumbëki nëuja nanguu ukëra awe mwino iraghano nëagarëtenda mukhatë a antu na Muungu uunë ija nanguu, gusoko rëkweti gëfandwa gayo mu maraghano a mantu në maja nanguu.
7Gusoko nësa iraghano rasëë ra mwandyo naa rëtina ihada, naa gutie soko a iraghano ra gavëë. 8Ëgweeso Muungu agavarëghëtia vivë antu vakwe nënaa agahanya:
“Matiku ëjie uguhanya Müküü,
në nëjie utenda iraghano në
ifya na antu va Isiraeli
na antu va nyumba amwa
Yuda.
9Iraghano ërëë rëtiutendeka
mwino ëroo nënaangatenda
na vaa kükü vawe
itiku ëroo nënaangavatongeera
gwa mukhono ufuma ung'ë
a uMisiri. Naa vinatendaa
antu va uhuvëa gwa iraghano
rane,
na uvii nene ntinavakeeraa,
uguhanya Müküü.
10Na ërëë uno iraghano nëngurëtenda
na antu va Isiraeli
gwa matiku në ëjie,
uguhanya Müküü:
Nguvëka seria yanë mumahaa
awe, na uyiandëka
munkhoo yawe,
veesonoo vëutenda antu vanë.
11Gutie muntu nëugumusëya muuyakwe,
mbesa nëugumukhanëa muunaakwe:
‘Mumanye Müküü.’
Gusoko antu voong'e
anyuughuu nanë aküü,
vëumanya nene.
12Nguvarekea mavë awe,
mbesa ntiuyakumbukwa kangë
mahutye awe.”
13Gwa urëhanya iraghano në ifya, Muungu agarëkaghahua ëroo në ra mwandyo, na roong'e rasëë në rakaghahuwe na utendeka rakhee gwa itungo ikufë rëuwuraa.
Kirimi New Testament © Bible Society of Tanzania, 2008.