Vaeburania 7
7
Mükumbëki Melikisedeki
1Melikisedeki naa mutemi wa Salemu, na mükumbëki wa Muungu Müküü. Iburahimu nënaa üsükie ufuma ufëta kunu naa agavauragha atemi, Melikisedeki agatang'ana inakwe, agamuforya. 2Iburahimu noo agamufa itambë ra ikumi ra mantu oong'e nënaa ukwetë. Ryana ra mwandyo ra rina ërëë Melikisedeki unë “Mutemi në wa Tutë,” na gusoko mweeso naa mutemi wa Salemu, rina rakwe noo rëna ryana “Mutemi wa Majëghana.” 3Tata wakwe nanë yiu wakwe vëtihanyiywe, mbesa mwango wakwe utihanyiywe, ëtihanyiywe wafafiwe nanëë mbesa agakuya nanëë. Wikhwete na Mwana wa Muungu, na ufwaghëëre utendeka mükumbëki khae oong'e.
4Uvii, mwoona mwino muntu uyuu mwino naa ükumukie. Tata Iburahimu agamufa itambë ra ikumi ra mantu oong'e naa agahora gwa uhuma ufëta. 5Gumanyie noo mwino gwa uhonga Seria, vana vamwa Lawi vasaa në akumbëki, ivanoneye uhora itambë ra ikumi ufuma gwa antu, uunë vauna vawe, mbesa veeso ufafo wamwa Iburahimu. 6Ëgweeso Melikisedeki wasuu naati wa mwango wamwa Lawi mbesa uvii agahanga itambë ra ikumi ufuma kunë Iburahimu, kangë agamuforya mweeso wasuu nënaa wafewe iraghano a Muungu. 7Gutie wisaghasaghëi mbanduvë mwino nëuguforya unë müküü nanguu ukëra wasuu nëuguforiwa. 8Kangë akumbëki vasaa nëvëuhoraa itambë ra ikumi unë antu nëvëukuya, ëgweeso afaa nëughuhora itambë ra ikumi, wasuu Melikisedeki, uguhanyiwaa mwino atiukuya. 9Gudahëte uvii, uhanya mwino Iburahimu nënaa waduya itambë rëmwe ra ikumi, mbesa Lawi wasuu uguhora a itambë rëmwe ra ikumi agaduyaa itambë rëmwe ra ikumi noo. 10Gusoko Lawi naa akëë ainafafwa, ëgweeso gwayo naa mwino wëë mukhatë a mwërë wamwa tata wakwe, Iburahimu, itungo nënaa Melikisedeki agatang'ana inakwe.
11Ufuma ükumbëki wa Valawi, antu va Isiraeli vëgafewa Seria. Itungwee, nësa në mwëmo wa Valawi ukhondekie naa sa gutie ifenja ra ükumbëki ungëja hiya, ükumbëki nëuhongie ntende a ükumbëki wamwa Melikisedeki, na ti uroo wamwa Aroni. 12Gusoko ükumbëki nëwakhaanëkëka inoneye Seria noo ikhaanëkëke. 13Müküü witu noo, wasuu në mantu ayoo oong'e ëgurëghëtiwa gusoko akwe, naa wandughu ëngëja, na mbesa gutie mba umwe wa ndughu akwe nëagadaha ütümamëa madabahu nësa mükumbëki. 14Imanyëkie daaji mwino mweeso agafafwa mu ndughu amwa Yuda ësëë në Musa inamëhanyaa nënaa ugurëghëtya sayu a akumbëki.
Mükumbëki ungëja
15Kangë ihanyo ërëë uurëë daaji nunguu: Mükumbëki ungëja nëwikhwete ina Melikisedeki wadahie udwëëraa. 16Mweeso inatendwaa mükumbëki gwa seria na maraghëëyo a giuntu, ëgweeso gwa nguu ya ufanga wasuu nëutina mpëo. 17Gwa uvii Maandëko ëguhanya: “Veve wëë mükumbëki khae na khae, uhonga na ntende a ükumbëki wamwa Melikisedeki.” 18Uvii, iraghëëyo ëroo ra mwandyo rëgaheywa gusoko naa rëlegheleghe na naa ari rëtinoneye intu mbanduvë.
19Gusoko seria amwa Musa inadahaa utenda intu rëkhondeke mba rëmwe. Ëgweeso itungwee, faafo gwa vëkiwe ughoje neuja nanguu rasee nëëudaha ugutenda gümühumbeere Muungu.
20Ukëra asaa oong'e afaa gwina irafëo ra Muungu. Itungo nënaa avoo vangëja nënaa vëgatendwa akumbëki naa gutie irafëo. 21Ëgweeso Yesu agatendwa mükümbëki gwa irafëo itungo nënaa Muungu agamwëëra:
“Müküü wërafëa,
ëgweeso atiurëfëëntua
isëgho rakwe:
‘Veve wëë mükumbëki
khae na khae.’”
22Uvii, udua hiya ëyëë, Yesu watendekie mukwatëëri wa iraghano në ija nanguu.
23Gwina hiya ingëja noo: akumbëki vangëja avoo naa vingë gusoko vëgakuya na vinadahaa ufwaghëëra na mwëmo wawe. 24Ëgweeso Yesu uguduvaa khae na khae, ükumbëki wakwe utiuhegha kunë mweeso. 25Uvii, mweeso udahëte itungo roong'e uvatyowa tutë tuutë voongë nëvëumweendea Muungu gwa njëa akwe gusoko mweeso uguduvaa khae na khae uvarombea kunë Muungu.
26Uvii, Yesu unë Mükumbëki në Müküü wasuu nëugunoneye ino mu asaa nëguuyafenjaa mu uduvi witu Mweeso unë mweru, atikweti ihondo mbesa mahutye mukhatë akwe, atifo mwikhako ra anya mahutye na wahumbuchiwe faka gunto girunde. 27Mweeso atikhwetë mwino akumbëki aküü vangëja avoo, atina soko a ukumbëki mu itiku, mwandyo gusoko a mahutye akwe, na gusoko a mahutye a antu. Mweeso agatenda uvii itambë rëmwe gutufu itungo nënaa agidüya mweeso mughonjo, na rësëë radahëkie gwa matungo oong'e. 28Seria amwa Musa arë ëguvahwaania antu nënaa alegheeku utendeka akumbëki në aküü, ëgweeso iraghano ra Muungu nëagarëtenda gwa irafëo rasëë regafika nënaa ikhondo ra seria rakëra amuhwaaniye Mwana wasuu nëwatendiwe ukhondekekie khae na khae.
Kirimi New Testament © Bible Society of Tanzania, 2008.