Vaeburania 9
9
Iküryo ra muurëmi na ra girunde
1Iraghano ra mwandyo naa rëkweti ntende yayo ya iküryo nanë fana gweru gwa iküryo nëgwajengiwe na antu. 2Gugatendwa iheme gwa gunji ayo gugataanwa Fana Gweru. Faafo naa gwina gatumbë ga gëmwëë, mesa nanë mëkaate nënaa aduiywe kunë Muungu. 3Unyuma a ifufa ra gavëë, naa gwina ihema naarë rëutaanwaa Fana Gweru ukëra Goong'e. 4Mukhatë faafo naa gwina masabahu a sahabu a utunkiya musalaka, nanë Isanduku ra Iraghano, nënaa rëviriwe sahabu ng'andë yoong'e, na mukhatë ayo naa gwina chungu ga sahabu nënaa gëkweti mana, mwanga wamwa Aroni nënaa wabohie matutu, nanë vibao ivyoo vivëë nënaaviandëkiwe iraghano. 5Gunto a Isanduku rasëë naa gwina mantu në mafanga nënaa ëguraghëëra mwino Muungu urëfo, na mabava awe naa ükündanëë gunto fana mahutye naa ëguheyiwaa. Ëgweeso itungwee, gutiudaha urëghëtya daaji gwa mantu asaa.
6Mëfaango ësëë ëgatendeka na ëgatenda ntende gwa akumbëki gingëa mwi itiku mwi cheme ra gunji utenda mëëmo awe. 7Ëgweeso Mükumbëki në Müküü imwene wasuu unëugingëaa mwi cheme ëroo ra gavëë, na mweesonoo ugutendaa uvii muhënjo rumwedu gutufu gwa mwakha. Nëugingëa ukhatë uguhoraa saghami nëugumufunyëya Muungu gusoko akwe mughonjo na gusoko a mahutye në antu vëuyatendaa gwa veeso aghonjo udëa umanya. 8Udua untende yasëë Mwahu Mweru ugusëya daaji mwino itungo në iheme rasëë ra gunji ëkëë rimëkie, njëa a gingëa Fana Gweru ëkëë inarughuwa. 9Intu ërëë unë nyinkhori a matungo a itungwee. Rëuraghëëra mwino dahwa nanë makumbëko nëëgudwëëywaa kunë Muungu ëtiudaha uyitenda nkhoo ya vasaa nëvëukürya utendeka ikhondekie, 10gusoko ayaa oong'e unë ikhwete na malëwa, maya unywewa na ntende hiyahiya ya gioya. Oong'e asaa unë maraghëëyo a gë njiinji gutufu, na nguu yakwe igufikëa mpëo itungo në Muungu ikwë waasinkamya ntende në mpiya.
11Ëgweeso Kiristo wadahie ufikaa, mweeso unë Mükumbëki Müküü wa mantu oong'e në maja, asaa në itungwee adahie ufikaa. Mweeso ugutenda mëëmo akwe mu ihema në ija na rëkhondekëkie nanguu, nërinatendwaa gwa mëkhono a antu, uunëtira muurëmi uruu nëwatundiwe. 12Mweeso agingëa Fana Gweru muhënjo rumwedu gutufu, kangë naa inahoraa saghami a mbüri mbesa a ng'ombe, ëgweeso agingëa gwa saghami akwe mweeso mughonjo, waguhangëya ukhomoi wa khae na khae. 13Antu nënaa avaya gëdini vëgadaha geriwe na utendeka aja nënaa vamyaghëwa saghami a mbüri na a ng'ombe itambëëmwe na mau a ndama. 14Gweeso, gwa saghami amwa Kiristo, mantu në maküü nanguu ëgutendeka! Gwa nguu ya Mwahu wa khae na khae, Kiristo agiduya mweeso ikumbëko nërëkhondie kunë Muungu. Saghami akwe ëgugwerya dhamiri yitu gwa ufuma ntendo nëyigweetaa nkuya, gusoko gudahe ümütümamëa Muungu në mufanga.
15Uvii Kiristo unë warëning'anëëye iraghano në ifya gusoko vasaa nëvataaniwe na Muungu vëyihange mboto ya khae na khae nëvayiahidëwe. Vëuyihanga, gusoko ikuya radwëëre rasëë nërëuvakhomoaa antu udua mu mahutye nëvayatendie itungo ra iraghano ëroo ra khae. 16Nkhani ya mpeo igumanyëkaa na urumëëywa nësa nkuya a wasuu nëwayihanyiye amanyëkaa. 17Nkhani ya mpeo yinadaha utendewa mwëmo faka ikuya rëdwëëre, gusoko nkhani ya mpeo itina ryana nësa wasuu nëuyihanyiye ëkëë uguduva. 18Gusoko ësëë nanë iraghano ëroo ra mwandyo rinavëkwaa gwa saghami udëa uhunuwa. 19Mwandyo Musa agavatanantëya antu voong'e maraghëëyo oong'e mwino ëtë naa ërë mu Seria, na faafo agahora saghami a ndama naa mbüri itambëëmwe nanë majë, na gwa utümëa matütü a mutë nëugutaanwa hisofo nanë mpamba në nkhooku agagëmyagëa gëtabu ga Seria nanë antu vasaa voong'e.
20Musa agahanya, “Ëyëë unë saghami nëëguraghëëra daaji iraghano nëmwaraghëëywe na Muungu murëkwatëëre.” 21Musa noo agamyaghëa saghami ihema rasëë na vife vya iküryo. 22Nhaa, gwa mu Seria ëgiinga uraghëëra muu intu rëudaha geriwa gwa saghami, nanë mahutye noo ëguheyiwa gutufu nësa saghami ahunuwaa.
Dahwa amwa Kiristo ëguheyaa mahutye a antu
23Mantu ayaa në uu nyinkhori gutufu a mantu a tutë a girunde, ëganoneya eriwe gwa njëa ësëë. Ëgweeso mantu a girunde ëgufenjaa ikumbëko në ija nanguu. 24Gusoko Kiristo iningëaa Fana Gweru nëgwajengiwe gwa mëkhono a antu fana uu nyinkhori gutufu gwa rasëë në ra tutë. Mweeso agingëa girunde ëgweeso kunë itungwee wimëkie usonge a Muungu gusoko itu. 25Mükumbëki Müküü wa Ayahudi ugingëaa Fana Gweru muu mwakha sa ukweti saghami a mwana, ëgweeso Kiristo iningëaa faafo adahe gifunya mweeso mëhënjo mingë, 26gusoko nëësa naa uvii Kiristo sa naa imunoneye ukhasiwa mëhënjo mingë udua utundwa urëmi. Ëgweeso itungwee matungo ayaa nëoohumbeera umpëo ayo, mweeso wadwëëre muhënjo rumwedu gutufu, uheya mahutye gwa gifunya mweeso mughonjo ikumbëko. 27Uvii, mwino chuu muu muntu ugukuyaa muhënjo rumwedu gutufu, na faafo gimëka usonge a iramweywa ra Muungu, 28vii uvii Kiristo mweesonoo agifunya ikumbëko muhënjo rumwedu gutufu gusoko a uyaheya mahutye a vingë. Nëikwë wadwëëra muhënjo wa gavëë ti gwa wikhuvë na mahutye, ëgweeso gusoko a uvatyoa vasaa nëvëmwiindëëre.
Kirimi New Testament © Bible Society of Tanzania, 2008.