Vaeburania 6
6
1Uvii, gufwaghëëre usonge gwa asaa nëakhomie na uyareka unyuma masëyo ayoo a mwandyo a Gëkiristo. Gutiufenja uvëka musingi kangë gwa usukëëra masëyo ayoo a mwandyo mwino gëtë urekanuka na ntendo ya ikuya, umuhuvëa Muungu, 2masëyo a ubadiso na uvëkëwa mëkhono, ufëtya gwa akuyi na iramuëywa ra khae na khae. 3Asaa guuyatenda, Muungu nëwagwaarëëya.
4Gusoko antu nëvawurekie uhuvëi wawe ëgudahëka wurihe uvasucha vëfëe kangë? Antu vasaa naa vaye vëë mu weru wa Muungu, naa vadahie usoyaa dahwa a girunde na utenda akhuvëi va Mwahu Mweru, 5vadahie usoyaa uja wa ukhani wa Muungu na nguu ya urëmi nëujie, 6yu! vëurekwana vëfëe kangë, gusoko vëumukhoma umuti kangë Mwana wa Muungu na umuvirya mënyaa mu maumbë a antu.
7Muungu ugumëforyaa fang'ë asëë nëëgumëghenyifaa mbura nëëgumënyëaa muu matungo, na ukindisya mpafatuka në a nsao kunë murëmi. 8Ëgweeso në mbesa fang'ë ësëë ëkinde mëtë a maghuya na mafafee, ëtikweti nsao, ëëfifë üjumwa na Muungu na mpëoayo unë gwachiwa moto.
9Gweeso, mbesa gurighitya uvii, ayanjwi vitu, mung'ë a sayu yanyu gwahuvëë mantu në maja nanguu na në utyoi. 10Muungu atiuwuryaa tutë, mweeso atiuwëwa mwëmo nëmootendie mbesa uyanjo nëmugadwëëya gusoko a rina rakwe mu utumami nëmugavatendea na nëmuuvatendea itungwee antu vakwe. 11Nkümbü itu unë muu muntu mukhatë anyu adwëëye wikunkunyaayi uruurouruuro faka mpëo, gusoko asaa unë mwina ighonje radahe ukhondeka. 12Mutatendekee atoto, ëgweeso mutendeka mwino vasaa nëvëhuvëe na vina ughimëëyi na uvii vëuyahanga asaa në Muungu wavëkie iraghano.
Iraghano ra Muungu unë ra tutë
13Muungu nënaa ugumufa Iburahimu mëhadi, agirafëa gwa rina rakwe mweeso, gusoko gutie në müküü ukëra Muungu wasuu nëudahëte girafëa gwa wasuu. 14Muungu agahanya: “Tutë tuutë nguguforya na ngugufa ufafo në wingë.” 15Iburahimu agiindëa gwa ughimëëyi na uvii agagihanga gasëë nënaa Muungu wavëkie iraghano. 16Antu nëvëgirafëa, vëgirafëaa gwa wasuu në müküü nanguu ukëra veeso, na irafëo rasëë rëumëëyaa wiküngümi woong'e. 17Muungu mweesonoo agarëkhamya iraghano rakwe gwa irafëo, na gwa njëa ësëë agavaraghëëra daaji vasaa nënaa wawafee iraghano mwino atiufëëntua isëgho rakwe. 18Gwa uvii maghonje ayoo nëëvëkiwe gusoko itu sese nëgüümankëe uhaghaaro kunë mweeso, guukhomiwa nkhoo ukwatëëra tutë tuutë ndolyo nëëvëkiwe usonge itu. 19Gukweti ighonje rësëë mwino isinkamëo ra uduvi witu. Ighonje rasëë unë ikhamu ryesoo noo rëuguhefeeryaa mwifufaa hekalu la girunde faka fana weru mukhatë. 20Yesu watongeere gingëa kuuko gusoko itu na watendekie mükumbëki müküü khae na khae, gwa uhonga ntende a ukumbëki wamwa Melikisedeki.
Kirimi New Testament © Bible Society of Tanzania, 2008.