Vaeburania 10
10
1Seria a Ayahudi ti mwimimi nëukhondekie wa mantu ayoo në atutë: uu në mwimimi gutufu wa në maja nëëjie. Makumbëko ayaayo ayaayo ëguduywaa matungo oong'e, mwakha gwa mwakha. Seria ëgudaha wurëhe, uvii, gwa njëa a makumbëko asaa uvatenda vasaa nëvëukürya vëtende vëkhondekie? 2Nësa antu vasaa nëvëumükürya Muungu sa veeriywe mahutye awë tutë, naa vëtigitegheeya kangë mwino vëna mahutye na makumbëko asaa oong'e naa ëgusima. 3Ëgweeso makumbëko asaa ëgutendeka mwakha gwa mwakha uvakümbükëya antu mahutye awe. 4Gusoko saghami a njaghamba nanë mbüri ëtiudaha mbanduvë uheya mahutye.
5Gusoko ësëë Kiristo nënaa ujie mu urëmi agamwëëra Muungu:
“Winafenja makumbëko mbesa dahwa,
ëgweeso wang'ondanëërëye mwëërë.
6Utiuyanjisiwa na dahwa ya
ufembewa mbesa ya uheya mahutye.
7Faafo agahanya:
‘Nërëfo afaa vee Muungu,
uyatenda mafenji ako
mwino yiandëkiwe gwa ungookëa nëë
mu gëtabu ga Seria.’”
8Mwandyo agahanya: “Utiufenja mbesa utiuyanjisiwa na makumbëko nanë dahwa, mbesa dahwa ya ufembewa na ya uheya mahutye.” Agahanya gwa uhonga Seria. 9Kangë agahanya: “Nëë në afaa vee Muungu, nëyatënde mafenji ako.” Uvii Muungu agabulanga makumbëko a khae na fana naa ërë agavëka ikumbëko rëngëja rëmwedu. 10Gusoko Yesu Kiristo agatenda mafenji a Muungu, sese gugoywa mahutye itu gwa dahwa ësëë a mwëërë wakwe nëwamëduiywe muhënjo rumwedu gutufu adahie.
11Muu mükumbëki Muyahudi ugutendaa mwëmo wake wa iküryo muu itiku na uduya makumbëko ayaayo ayaayo mëhënjo mingë, makumbëko nëëtiudaha uheya mahutye. 12Ëgweeso Kiristo agaduya ikumbëko rëmwedu gusoko a mahutye, ikumbëko nërënoneye khae na khae, agëkhaa uvaru wa gëlëlo wa Muungu. 13Kuuko wëëndiire faka arughu vakwe nëikwë vavëkwa mwino gëbao fang'ë a mëghuu akwe. 14Uvii, gwa dahwa akwe ëmwedu, wamutendie mutende mukhondekie khae na khae vasaa nëvëgoywaa mahutye awe.
15Mwahu Mweru noo ugugufaa usudanga wakwe. Mwandyo uguhanya:
16“Ërëë unë iraghano nëngurëtenda
ginaawe, matiku nëëjie,
uguhanya Müküü:
Nguvëka seria yanë munkhoo
yawe, na uyiandëka
mumahaa awe.”
17Na kangë uguhanya:
“Ntiukümbükwa kangë mahutye awe,
mbesa ntendo yawe ya uvë.”
18Uvii, mahutye nëaheyiwa, gutie soko kangë a uduya dahwa ya uheya mahutye.
Guhumbeere kunë Muungu
19Uvii, anyandughu, gwa saghami amwa Yesu guukhamiwa nkhoo gingëa Fana Gweru. 20Mweeso wagurughwëëye njëa nëmpya njëa a ufanga, ukëërëa ifufa ëroo uunë gwa njëa a mwëërë wakwe mughonjo. 21Uvii, gukweti mükumbëki nëumanyëkie goong'e nëukweti wibali mu nyumba a Muungu. 22Gwa uvii gumuhumbeere Muungu gwa nkhoo në njeru na uhuvëi nëukhondekie, gwa nkhoo nëyeeriwe ufuma mu damiri nëmbë, na gwa mëërë nëooyiywe gwa majë në maja. 23Gukwatëërë ighonje ritu nëguurëhanyaa, gusoko Muungu nëwatendie iraghano rakwe ra tutë tuutë. 24Gujindame gwa gitendëa nëmaja gwa goongeeya wikunkunyayi wa giarëëya sese gwa sese we giyanja na utenda në maja. 25Gutamërekee ntende ëyoo a utang'ana itambëëmwe, mwino chuu vangëja vëutendaa. Ëgweeso ëgunoneye giarëëya gusoko mwino mughune Itiku ëroo ra Müküü rahumbeeraa.
26Gusoko nëgwafwaghëëra utenda mahutye gwa ghuyëda kunu gwadahie umëmanyaa tutë, gutie ikumbëko nërëdahëte udwëëywa kangë gusoko a uheya mahutye. 27Nërësaghie unë gwindëëra gutufu gwa choghofi iramwëëywa ra Muungu na moto nëukharë nëujie uvameeya voong'e nëvëumufëngaa. 28Muntu nëatiumëkwatëëraa Seria amwa Musa uguuraghwa gwa udëa goonewa uvavi sa gwina usudanga wa antu vavëë mbesa vatatu. 29Wurë, muntu uyoo nëatiumükeeraa Mwana wa Muungu na umëhorya saghami a iraghano ra Muungu nëamweeriye, muntu nëugumutuka Mwahu wa Mboto, imunoneye uhanga ikhuwa ikharë wurëhe? 30Gusoko gumumanyie wasuu nëagahanya, “Nene ngurëfisya ikuwo, nene ngurëfisya,” na nënaa agahanya noo, “Müküü uguvaramuëya antu vakwe.” 31Ugwa mumëkhono a Muungu në mufanga uunë intu raghooghofya ino!
32Kümbükwi nëëgamudwëëra matiku ayoo a mwandyo nënaa mugamwëëkëwa weru wa Muungu. Mbesa matiku asaa mugahangwa na makhasëko mingë nyenye mugaghimëëya. 33Mëhënjo ëngëja mugatëkwa na uviriwa mënyaa usonge a antu, mëhënjo ëngë mugakhuvëa itambëëmwe na avoo nënaa vëukhasiwaa gwa uvii uvii. 34Mugakhuvëa itambëëmwe mumakhasëko a atungwa, na nënaa mwahegheywa maari anyu mugaghimëëya gwa uyanjo, gusoko mugamanya mwino mukweti nsao në njija nanguu na utendeka ërëfo khae na khae. 35Uvii, mutauyaghayee, umpampaghu wanyu, gusoko ugumuhangëya gëfewa gëkhuu. 36Muufenjiwa sa mwina ughimëëyi, mudahe utenda nëuguyafenja Muungu na uhanga gasëë nëwagëvëkie mëhadi. 37Gusoko, mwino ëguhanyaa Maandëko:
“Ëkëë gunyuughuu gutufu,
na wasuu nëujie, ujie,
ëgweesonoo atiutinia.
38Ëgweeso muntu wanë nëwina
uduvi në uja uguhuvëa
na uduva,
ëgweesogwayo nëwasuka unyuma,
nene ntiuyanjisiwa na mweeso.”
39Uvii, sese gutifo mukhatë a avoo nëvëusuka unyuma na uyaghaa, ëgweeso sese guhuvëe na guutyowa.
Kirimi New Testament © Bible Society of Tanzania, 2008.