ROM 16
16
Go Poul ba 'Walụ Atwa Krast
1Mo hi utogono bụngwụfwụ tu ge Fibi, na shɛ bɛnjɛ-bi-iyi#16:1 bɛnjɛ-bi-iyi: Abayiburu oko hiɛŋ, yɛu-ugondu, ono oko du hiɛŋ, buhwuri-bu-umbe. ba tụ'ụlwa-tụ-ụhiɛŋshɛ-Agwangwama tu na tu namɛ ni Kɛnkɛria, 2maa hi leshiji bu na amɛ Agwangwama, gana na lanɛ maa atwa tijilo leshiji bụtụ, maa hi no mbiyono bu ni iyi elele nɛ ukekeshi ibɛ wa nda bu pi hiŋ. Iwɛnɛ po ubwa ni ikɛnyi ibwɛ ba sumanɛ atwa ofwugwo u'uno hwɛɛ, tu Gamba ni ikɛnyi mi du.
3'Walụ ma Prisika#16:3 Prisika: uhwaŋna unya na aa 'nyata te Prisila ta. Ike ike yaa shɛ. #Ugo 18:2 keeni Akwila, a na a nda ugondu ne mi na amɛ Krast Jisus, 4anaa na keri ohiuhiu aba iwe mi; shɛ Gamba ngooko kaa du kiri ma nda ugwoje wa aba o, ama ta atwa tụ'ụlwa-tụ-ụhiɛŋshɛ-Agwangwama ta atwa na shɛ shɛ Eju du ta nda ugwoje wa aba hwɛɛ. 5'Walụ ma tụ'ụlwa-tụ-ụhiɛŋshɛ-Agwangwama tu na to sotulonu ni ihwɛ ya aba.
'Walụ ma biyejilo mi bu tulubo gɛ Ɛpainɛtos, na shɛ bụtụ bi hiiŋ na leshiji iwɛ Krast na cɛnjɛ te Esia. 6'Walụ ma Meri na njɛ ugondu nụ ụbaụta duwa iwe hiŋ. 7'Walụ ma Andronikos keeni Junias,#16:7 Junias: Pa'ụtụ Abayiburu a 'nyata gana ga, ama ono oko hiɛŋ, Junia. Ama tuba ibɛ gɛtɛtɛ ike ike. a na shɛ udenji mu,#16:7 a na shɛ udenji mu: Kwo kaa a na shɛ eyejilo mi Eju, kwo kaa a na atɛ shɛ atwa cɛnjɛ tu ko na aba. a na namɛ nu umwono-tishi ne mi. A shɛ atwa na 'yajɛ izeci na ashashɛ atumwa, aba du shɛ atwa na tɛtanɛ Krast rishe hiiŋ ne mi. 8'Walụ ma Ampiliatos, bụtụ mi bu tulubo na amɛ Agwangwama. 9'Walụ ma Obanos, na ba nda ugondu no tu na amɛ Krast, keeni Sitikus bụtụ mi bu tulubo. 10'Walụ ma Apɛlɛs, na shɛ bụtụ na ee menji aa kwụbɛ maa bi teni cɛŋ na amɛ Krast. 'Walụ ma atwa ihwɛ Aristobulos. 11'Walụ ma Hɛrodon, na shɛ udenji mu. 'Walụ ma atwa ihwɛ Nasisos na namɛ na amɛ Agwangwama. 12'Walụ ma Trufaina keeni Trufosa, a shɛ eyikwo na njɛ ugondu nụ ụbaụta iwɛ ya Agwangwama. 'Walụ ma Pesis, biyikwo ata bu tulubo na njɛ ugondu nụ ụbaụta duwa iwɛ ya Agwangwama. 13'Walụ ma Roufos, na ee teri na amɛ Agwangwama, keeni bino bwa na shɛ du bino mi.#Mak 15:21 14'Walụ ma Asinkritos, keeni Filɛgon, nɛ Hɛmɛs, na Patrobas, nɛ Hɛmas keeni miaụŋ-mo-bino na namɛ na aba. 15'Walụ ma Filologos, no Julia, ne Neros keeni bụngwụfwụ bwa, keeni Olumpas, keeni atwa tijilo elele na namɛ na aba. 16Na mama 'walanụ ma a'walụ tijilo. Tu'ulwatagwụ tu Krast hwɛɛ ta hi 'walụ.
Iwɛ Imɛwɛɛ no Ofwo Miaụŋ-mo-bino
17A-miaụŋ-mo-bino mi na amɛ Krast, Ma hi lụpa maa hi no shiyono atwa na a 'waŋnɛ tubogwu keeni iyi ukwurishi nɛ ya sukakana imbisegeni tu nɛ ehi seshi eshe maa kede hi cimi aŋ o. 18Iwɛnɛ po shɛ Agwangwama Krast atwa gana ata a ndana iyi o, semi shɛmɛ sha aba kiri aa ndana iyi.#16:18 shɛmɛ sha aba kiri aa ndana iyi: Gobwonu du tɛjɛshɛrɛga tu ko ti hiɛŋ, ama Abayiburu oko hiɛŋ, ukwedeyi wa aba iyimɛyɛ aa ndana iyi. A na halakaka atwa na te eshiciji shi iyi tebiye tedure nu n-ndumwa ma aba mi biye keeni unu wa aba ụlatụ. 19Iwɛnɛ po unu na ahi hwụjɛ teni atwa kpaaŋ na shɛcɛbɛ. Ibɛ po Ama nda unyasa iwe hiŋ, ama i n kwụlanɛ maa hiɛ shɛ atwa na incɛ ni iyi ibiye, ama to no shiyono ma tuba i'ɛlɛ hiŋ ni iyi iwɛ o. 20Ama Agwatana amɛ-olom zhɛ a pɛpɛtana Setan tuta tɛ shivwɛvwɛjɛ shi hiŋ hwuwayɛ hwuwayɛ.
21Go tulubo-ti-biye ta Agwangwama tu Jisus Krast tu nama ne hiŋ.
Go Timoti na ba nda ugondu ne mi, ma hi 'walụ, no Lukios, na Jason keeni Sosipata, a na shɛ udenji mu, ma hi 'walụ du.#Ugo 16:1
22Gamba gɛ Tɛtios na 'nyacɛ utakada ga, Ma hi 'walụ na amɛ Agwangwama.
23Ga Gaiyos na n 'imɛ uganyi, na 'imɛ du tụ'ụlwa-tụ-ụhiɛŋshɛ-AGWANGWAMA uganyi, ma hi 'walụ. Gɛ Ɛrɛstos na ba ngbaraka ukwuribi ụshɛpwụ ga, ma hi 'walụ, keeni Kwatos na shɛ yɛu-bino tu.#Ugo 19:29; 1 Kor 1:14; 2 Timo 4:20
24[Go tulubo-ti-biye ta Agwangwama tu Jisus Krast tu nama ne hiŋ hwɛɛ. Ami].#16:24 Go tulubo-ti-biye ta Agwangwama tu Jisus Krast tu nama ne hiŋ hwɛɛ. Ami: Abayiburu oko 'nyeci shi n-ndumwa ma buwala ga bu 24.
Tukwunanga na Adua Iwɛ Atwa Rom
25Ama no ofwo bụtụ ata na eri me hi shikicingo dimi, tedure na Anabarɛ Ebiye Jisus Krast na Ama ananga, gana na ta tɛkapɛshɛnga ti iyi tusweci nɛ ee shiri saiiŋ te kwuni na aka cala namɛ. 26Ama bu vwɛ iŋ ya hwuwayɛ caakwụ tedure nu utakada na egesere 'nyeci, tedure nu unu na Agwatana unyizo-nom peni. Ibɛ shɛ inɛɛ nɛ aa njɛ maa ga atwa na shɛ shɛ Eju mepi maa a hwụjɛ-unu rishe-tɛtɛtana. 27Ga shɛ Agwatana unyizo-nom na incɛ kiri ee peni ụjɛrụma. Ami.
Rubassa Bible © Bible Society of Nigeria, 2008