ROM 15
15
Ga Bụtụ Bụtụ na Kwulana Binya Bwa
1I shɛ tilɛɛ maa atuba na ti 'yajɛ ikɛnyi ne rishe-tɛtɛtana, tu no mbiyono ma atwa na lwegeji i'wɛŋnɛ tulwogo ta aba tu'waŋna, maa kede tu na mama kwulana ma o. 2Ga bụtụ bụtụ na ashashɛ tu na kwulana binya bwa, iwɛ maa binya bwa kwụbɛ du uwebiye, maa o mo bu. 3Iwɛnɛ po ga Krast mama kwụlanɛ shɛ la du o, ama i shɛ gana na te e 'nyeci, ɛɛ hiɛŋ, n-ndumwa mu na atwa ubu mbiseji mu n layɛtanɛ.#Shɛzu 69:9 4Ama iyi elele nɛ kaa ee 'nyeci cala, e 'nyeci iŋ iwɛ maa to soso, maa tu na la-egiri, maa ta nda ashɛlatụ, maa Utakada Iwɛ ya Agwatana na ti ingatanga du. 5Ama ga Agwatana isɛbwɛ-ti'ima keeni a na ti'ingatanga na hi pana ahaŋsa oko ti'yaga na anya hiŋ, gana na tu ga Krast namɛ du, 6iwɛ maa go unu hiŋ nama uko maa hi na muna Agwatana na shɛ Bishi ba Agwangwama tu Jisus Krast ụjɛrụma na ahaŋsa hiŋ oko.
Anabarɛ Ebiye Iwɛ Atwa na Shɛ shɛ Eju
7Iwɛ ecilo ata, no momo loshogonu ma gana na ga Krast du ihi leshiji iwɛ ụjɛrụma wa Agwatana. 8Ama N hi mbiswo maa ga Krast shɛwa ya yɛu-ugondu i teleyi tijaja#15:8 yɛu-ugondu i teleyi tijaja: Gana tɛjɛshɛrɛga tu ko tɛ jɛmɛ ta du, ama Abayiburu oko hiɛŋ, yɛu-ugondu ye Eju. iwɛ iwɛ-tɛkana ya Agwatana, iwɛ maa shikicingo unu na Agwatana shileni la ogwunukwoshi aba dimi, 9iwɛ maa atwa na shɛ shɛ Eju peni du Agwatana ụjɛrụma iwɛ inyɛmɛnyɛmɛ ibwɛ, gana na te e 'nyeci, ɛɛ hiɛŋ,
Iwɛbɛ po Ngɛɛ zhɛ ma bu shɛtana na ashashɛ atwa
na shɛ shɛ Eju,
N zhɛ kaa ma bu zungangana azunga ashɛtwa.#2 Sam 22:50; Shɛzu 18:49
10Yaa dumananɛ, yɛɛ hiɛŋ,
Ahiɛba na hiɛ shɛ shɛ Eju, na bwada ma unyasa na atwa ubwa.#Undwa 32:43
11Yɛɛ hiɛŋ sasana, Ahiɛba na hiɛ shɛ shɛ Eju kpaaŋ, shɛtana ma Agwangwama, ga atwa kpaaŋ na shɛtana bu.#Shɛzu 117:1
12Ga Ayizaya dumananɛ, bɛɛ hiɛŋ,
Bujalalo Jɛsi zhɛ ba zhajɛ,
bụtụ bu ko kaa zhɛ ba ya tugwama ta atwa na shɛ shɛ Eju;
tedure na bụtụ ata, ibɛ atwa na shɛ shɛ Eju zhɛ
a 'yaga ashɛlatụ.#Ayiz 11:10
13Ga Agwatana na ba pana bụtụ ashɛlatụ ihi shidinji nu unyasa we elele keeni amɛ-olom tedure ne rishe ru na ahiɛ tɛtanɛ, iwɛ maa ashɛlatụ hiŋ na kaana ugombo tedure nu ukpahiŋ Mpiala mi Tijilo.
Ecilo no po go Poul 'Nyeteni Aŋ Utakada ne Eshe-hwoo
14Ama a-miaụŋ-mo-bino mi na amɛ Krast, Gamba ni ikɛnyi mi N leni na amɛ mi maa iyi ibiye shini na ashashɛ hiŋ pusulu, ehi mepi kaa iyi elele tebiye, maa hi no momo mbisogonu shihaŋsa. 15A-miaụŋ-mo-bino mi na amɛ Krast, N hi 'nyatanɛ n-ndumwa mu ko ne eshe-hwoo a'wụtụ, maa me hi teyingeni iwɛ tulubo-ti-biye tu na Agwatana m peni, 16maa Ma sha yɛu-ugondu Krast Jisus no ofwo atwa na shɛ shɛ Eju, maa Ma nda ugondu tunongbo ta Anabarɛ Ebiye Agwatana tu'ananga, iwɛ maa tɛshɛkana tu na ɛɛ zhɛ a shɛkana Agwatana atwa na shɛ shɛ Eju tu kwụlanɛ bụ tulashɛga, ibɛ shɛ tishɛkana tu na Mpiala mi Tijilo mɛ njɛ tụ iyi tijilo. 17Iwɛbɛ po Ama busa na amɛ Krast Jisus iwɛ iyi nɛ Ama ndana Agwatana. 18N zhɛ ma duma iwɛ ne eshe-hwoo iwɛ iyi elele nɛ ga Krast njɛ tedure ne mi kiri maa atwa na shɛ shɛ Eju hwụjɛ-unu wa Agwatana. Bɛ njɛ iŋ tedure ni iwɛ tụdụma keeni ugondu tɛnda du, 19ni iyi tudama keeni arụhwajɛ na 'yajɛ ukpahiŋ, tedure nu ukpahiŋ Mpiala mi Tijilo. Te kwuni nu Jɛrusalɛm tutu rungwutwonu Ilurikum, n onongwonuo aŋ Anabarɛ Ebiye Krast hwɛɛ. 20Iyi nɛ ma n kwulana i shɛ maa Ma ananga Anabarɛ Ebiye no ofwo na aa ta hwụjɛ shɛ izeci Krast kwukwuŋ, iwɛ maa kede ma patana ugondu mu nu ukoshilo na binya bụtụ shilwo. 21Ama maa ga i shɛ gana na te e 'nyeci, ɛɛ hiɛŋ,
Atwa na ee te mbishi shi anabarɛ iwɛ ubwa, ɛ zhɛ a
kwụba bụ; atwa na kaa ta hwụjɛ shɛ, ɛ zhɛ eshicigo.#Ayiz 52:15
Go Poul ba Imanganga maa Zha maa Kwụba Atwa Rom
22Iwɛ ecilo ata ee n kepeni uhwaŋna kpalụ gembi ofwugwo na aka na Ama jala maa ma zhajɛ pi hiŋ.#Rom 1:13 23Ama gana na tu Ngaa zasa ya ofwo elele Ngɛɛ tɛ zhɛ ma nda ugondu geri ga hwuwayɛ, gana na yaa namɛ na amɛ mi tebiye taa na shiywa shu ufwugwo maa ma zhajɛ pi hiŋ, 24asha aka elele na Ngɛɛ zhɛ Sipen, N zhɛ me dure pi hiŋ. I namɛ na amɛ mi maa ma hi kwụba aka na ti Ngɛɛ zhɛ tahaŋnụ ta ata ti mi, maa hi m mbiyeni na tahaŋnụ ta ata Ngɛɛ zhɛ, ti yaa shɛ amɛ mi lemi iwɛ tukwụba tu na Ngaa hiɛ kwụbɛ okwo cwɛŋ. 25Ama N tɛ zhɛ tugwo Jɛrusalɛm hwuwayɛ maa ma ndanɛ atwa tijilo iyi.#1 Kor 16:1-4 26I kwụlanɛ kaa tụ'ụlwa-tụ-ụhiɛŋshɛ-Agwangwama tu Masɛdonia keeni Akaya maa ta nda apalajɛma oko iwɛ okofwo na namɛ na ashashɛ atwa tijilo nu Jɛrusalɛm. 27I kwụlanɛ aŋ, iwɛ-tɛkana, yaa shɛ Eju shepirigeni atwa na shɛ shɛ Eju urubwo iyi mpiala, asha atwa na shɛ shɛ Eju a yɛ Eju utashɛ maa e mbiyeni aŋ du ni iyi ukekeshi wa aba u tu'waba.#1 Kor 9:11 28Ibɛ po aka elele na Ngee hwuwe inɛ ɛtɛ hwɛɛ, Ngaa shɛkanɛ aŋ apalajɛma#15:28 Ngaa shɛkanɛ aŋ apalajɛma: Kwo kaa, Ngee zweneni aŋ tụ'walụ tu ga. Abayiburu oko hiɛŋ, Ngee peni aŋ ukwuribi ata ɛɛ ishicinjɛ, kwo kaa ee leshiji. ata, nazhɛ Ngɛɛ zhɛ mɛ hi vwurɛ ti Ngɛɛ zhɛ Sipen. 29M mepi maa aka na Ngɛɛ zhɛ ma zhajɛ pi hiŋ, N zhɛ ma zhajɛ no tishidingo tu uwebiye Krast.#15:29 tu uwebiye Krast: Abayiburu oko angwụshɛ shiyeni tuwebiye ta Anabarɛ Ebiye Krast.
30Ama a-miaụŋ-mo-bino mi na amɛ Krast, Ma hi lụpa ni izeci ya Agwangwama tu Jisus Krast, keeni tulubo tu Mpiala mi Tijilo, maa hiɛ 'imɛ-isɛbwɛ maa hi togwu ne mi na adua tɛnda pa Agwatana iwe mi, 31iwɛ maa Agwatana m bicinji ni i'ɛlɛ ya atwa na tɛtanɛ shɛ rishe a na namɛ na cɛnjɛ tu Judia, maa ge iyi mi nɛ Ama ndana atwa Jɛrusalɛm i kwụlanɛ atwa tijilo tulashɛga; 32maa mɛ zhɛ pi hiŋ nu unyasa nu ukwulana wa Agwatana, maa Ma ta ụhinjanụ pi hiŋ. 33Ga Agwatana amɛ-olom nama ne hiŋ kpaaŋ. Ami.
Rubassa Bible © Bible Society of Nigeria, 2008