ROM 14
14
Ta na Duma Ma Ụshɛrɛya Yɛu-bino Hiŋ o
1Ama na lashɛga ma bụtụ na lweji ne rishe-tɛtɛtana, ama ta na zuga bu ma ni iheŋtengene nɛ zhɛ ya pana bu oruwo tuta o.#Kolo 2:16 2Bụtụ bu ko ba tɛtana-rishe bu na ya iyi elele, ama bụtụ na lweji ne rishe-tɛtɛtana abuba kiri baa ya. 3Kede bụtụ na ba ya iyi elele ngbaraka bụtụ na yɛ shɛ cwɛŋ o, kede kaa du bụtụ na yɛ shɛ iyi na duma ụshɛrɛya bụtụ na ba ya o, iwɛnɛ ta Agwatana loshigwo bu. 4Gaaba abɛ shɛ maa na duma ụshɛrɛya yɛu-ugondu binya bụtụụ? Tishikono tu bwa kwo kaa tulaya tu bwa, tu namɛ ni i'ɛlɛ ya agwuma-ihwɛ ibwɛ; iwɛnɛ ta Agwangwama 'yajɛ ikɛnyi maa shikiciŋgo bu.
5Bụtụ bu ko bo shiyono ụjita uko eshe gana maa una ata ubwa hwuri unya ụjita, binya bụtụ tuba bo shiyono ụjita we elele eshe. Bụtụ bụtụ ga bu na untangana ahaŋsa ubwa tebiye. 6Bụtụ na bo shiyono ụjita we elele eshe, Agwangwama boo shiyonono uŋ eshe; bụtụ na kaa ba ya, Agwangwama du baa yana, iwɛnɛ tu baa nda ugwoje wa Agwatana. Bụtụ na yɛ shɛ, Agwangwama baa yanɛ shɛ, ba nda du kaa ugwoje wa Agwatana.
7I zasa bụtụ be elele na ashashɛ tu mama yana uraiŋ o, i zasa kaa du bụtụ be elele na momo 'wono. 8Okwo ata ya uraiŋ, Agwangwama ata yana uŋ, okwo etu 'wi, Agwangwama du etu 'weni. Ibɛ po okwo ata ya uraiŋ, kwo kaa etu 'wi, atwa Agwangwama atɛ shɛ. 9Iwɛ ecilo ata ga Krast 'wi baa shaananɛ buumwa, iwɛ maa ba sha Agwangwama atwa na 'wi, ta atwa na a shɛ buumwa hwɛɛ. 10Ama iwembe po aba duma ụshɛrɛya yɛu-bino buu? Kwo kaa iwembe po aba ngbaraka yɛu-bino bu cwɛɛŋ? Iwɛnɛ po ti zhɛ to shikono hwuŋ hwɛ hwɛɛ tu no ogbudu ụshɛrɛya wa Agwatana.#2 Kor 5:10 11Iwɛnɛ te e 'nyeci, ɛɛ hiɛŋ.
Agwangwama hiɛŋ, Gana na tu Ngaa shɛ buumwa, shilulo she
elele shi zhɛ shi mo n kwuzono; unu we elele kaa zhɛ ma n shɛtana Gamba Agwatana.#14:11 shɛtana Gamba Agwatana: Abayiburu oko hiɛŋ, bụratụ be elele zhɛ bo lono, kwo kaa zhɛ bo mbiso Agwatana. #Ayiz 45:23 12Ibɛ po bụtụ bụtụ tu zhɛ be swegeni hwuŋ Agwatana iyi nɛ baa njɛ la.
Kede Bụtụ Shileni Yɛu-bino Bwa Utayɛ Udukwutwa o
13Ibɛ po kede tu na duma ma ụshɛrɛya wa anya tu o, ama ụshɛrɛya na ɛhi zhɛ hi na duma na, maa kede bụtụ shileni yɛu-bino bwa utayɛ udukwutwa kwo kaa iyi nɛ zhɛ ya gwumana bu o. 14M mepi, ohwulu mi kaa du namɛ oko na amɛ Agwangwama Jisus, maa (i ga zasa iyi elele nɛ#14:14 i ga zasa iyi elele nɛ: Abayiburu oko hiɛŋ, i ga zasa iyimɛyɛ ye elele nɛ. ge jirimi tiya ni ikɛnyi ibɛ o, semi bụtụ na rɛcɛ iŋ maa i jirimi, asha i jirimeni bu ga.) 15Yaa shɛ ni iyimɛyɛ aba hashɛgana amɛ yɛu-bino bu, asha shɛ tulubo tu ta ya o. Ta nda kaa bụtụ na ga Krast 'wi iwɛ ubwa ufwu tedure ni iyimɛyɛ nɛ aba ya o. 16Iwɛ ecilo ata, to lono ma maa iwɛ iyimɛyɛ nɛ ihi teneni cɛŋ tiya na hashɛgana ya iyi ibiye nɛ ahi ga nda o. 17Cɛnjɛ-ta-tugwama ta Agwatana tɛ shɛ shɛ iwɛ iyimɛyɛ kwo kaa iwɛ iyi tuswa o, ama tɛ shɛ iwɛ iyi tiririri keeni amɛ-olom keeni unyasa na Mpiala mi Tijilo ma 'waŋnɛ. 18Bụtụ na ba ndana Krast iyi nu uhwaŋna gana ga, asha ubwa du kwụlanɛ Agwatana tebiye, atwa kaa du a muna bu ụjɛrụma.
19Iwɛ ecilo ata, tu na 'wa ma iyi ya amɛ-olom keeni iyi nɛ eti eri tu no momo monu. 20To hwuŋzo ma ugondu wa Agwatana iwɛ iyimɛyɛ o. Iwɛ-tɛkana, iyi elele namɛ shɛshɛshɛ, ama i shɛ iyi iwɛ no ofwo bụtụ na ba ya iyimɛyɛ nɛ zhɛ ya nda maa bụtụ leyi. 21I zhɛmɛ maa bụtụ genji usunda tiya, kwo kaa meni mu tụ'walụ ta afwafwa tuswa keeni iyi elele nɛ eri ya nda yɛu-bino bu ukwurishi#14:21 binya bụ ukwurishi: Abayiburu oko hiɛŋ, binya bụ maa twa udukwutwa, kwo kaa maa laya. Ono oko hiɛŋ, nɛ zhɛ ya shapɛrɛganɛ atwa na 'wa Agwangwama ihiɛŋmɛ, kwo kaa zhɛ yo logwocongo… tɛnda. 22Rishe-tɛtɛtana ru na abu 'yajɛ, mama 'yagana rụ ne eshe Agwatana. Bụtụ na mama dumanganɛ shɛ ụshɛrɛya ni iyi nɛ bee menji maa i teni cɛŋ ubwa gwoje. 23Ama bụtụ na ba ya na ahaŋsa eyeyebi, ɛ zhɛ a pana bụ n-ndumwa-tụwụma, iwɛnɛ ti iyi nɛ baa njɛ beni shi ne rishe-tɛtɛtana. Iyi elele nɛ kaa beni shi ne rishe-tɛtɛtana, iwɛwɛ yaa shɛ.
Rubassa Bible © Bible Society of Nigeria, 2008