Loos 8
8
Ua Neej Lawvle Vaaj Ntsujplig Qha
1Nwgnuav tsi muaj kev rautxim rua cov kws nyob rua huv Yexus Khetos lawm. 2Ruaqhov Vaaj Ntsujplig txuj kevcai kws coj peb lug tau txujsa nyob rua huv Yexus Khetos, tub tso kuv#8:2: kuv; tej phoo ntawv qub kws xuas teg sau, muaj koj; lwm phoo has tas peb. dlim ntawm txuj kevcai kws ua rua muaj txuj kev txhum hab txuj kev tuag lawm. 3Vaajtswv ua tau yaam kws txuj Kevcai tsi muaj peevxwm ua tau, vim yog tuabneeg saab nqajtawv tsi muajzug. Vaajtswv khaiv Nwg tug Tub lug yug ua tuabneeg muaj rojntshaa zoo ib yaam le peb cov kws yog tuabneeg txhum, kuas Nwg txhaj theej tau tuabneeg lub txim. 4Vaajtswv ua le ntawd, kuas peb cov kws tsi ua lub neej lawvle saab nqajtawv, tabsis ua lub neej lawvle Vaaj Ntsujplig, txhaj yuav ua tau lawvle txuj kev ncaajnceeg ntawm txuj Kevcai tej lug qha kuas puvntoob.
5Cov kws ua lub neej lawvle saab nqajtawv, cov ntawd yeej xaavntsoov rua tej kws saab nqajtawv ntshaw. Tabsis cov kws ua lub neej lawvle Vaaj Ntsujplig, cov ntawd yeej xaavntsoov rua tej kws Vaaj Ntsujplig lub sab ntshaw. 6Tug kws ca saab nqajtawv ua tug tswj nwg, thaus kawg nwg yuav raug kev pluj kev tuag, tabsis tug kws ca Vaaj Ntsujplig ua tug tswj nwg, thaus kawg nwg yuav tau txujsa hab kev thaajyeeb. 7Cov tuabneeg kws ca saab nqajtawv ua tug tswj puab, cov ntawd ua yeebncuab rua Vaajtswv; ruaqhov puab tsi ua lawvle Vaajtswv txuj kevcai, qhov tseeb tag, puab yeej coj tsi tau lawvle txuj kevcai ntawd. 8Cov kws ua lawvle saab nqajtawv, cov ntawd yeej ua tsi tau hum Vaajtswv sab.
9Yog Vaajtswv tug Ntsujplig nyob huv mej lawm tag, mej yeej yuav tsi ua mej lub neej lawvle saab nqajtawv qha rua mej, tabsis mej yuav ua lawvle Vaaj Ntsujplig qha rua mej. Tug kws tsi muaj Khetos tug Ntsujplig, tug ntawd yeej tsi yog Khetos tug. 10Tabsis yog Khetos nyob huv mej lawm, txawm yog mej lub cev yuav txawj tuag vim txuj kev txhum, los mej tug ntsujplig yuav tsi tuag#8:10: mej tug ntsujplig yuav tsi tuag; lossis Vaaj Ntsujplig yog mej txujsa. vim Vaajtswv suav has tas mej yog tuabneeg ncaajnceeg lawm. 11Yog Vaajtswv tug Ntsujplig kws tsaa Yexus sawv huv qhovtuag rovqaab lug, nyob rua huv mej lawm, tes tug kws tsaa Khetos sawv huv qhovtuag rovqaab lug ntawd, yuav pub rua mej lub cev kws txawj tuag kuas muaj sa, kws yog lug ntawm Nwg tug Ntsujplig kws tub nyob rua huv mej lawm. #1Klt 3:16
12Yogle ntawd cov kwvtij, peb muaj ib teg dlejnum kws yuavtsum tau ua, tabsis tsi yog yuav ua lawvle saab nqajtawv xaav kuas peb ua. 13Yog mej ua mej lub neej lawvle saab nqajtawv, mej yeej yuav tuag; tabsis yog mej ua mej lub neej lawvle Vaaj Ntsujplig, mej yuav tua tau tej dlejnum ntawm saab nqajtawv kuas tuag moog, hab mej yuav cajsa. 14Cov kws ca Vaajtswv tug Ntsujplig ua tug coj, cov ntawd yog Vaajtswv cov mivnyuas. 15Ruaqhov tug Ntsujplig kws Vaajtswv muab rua mej ntawd tsi yog tug kws muab mej ua qhev kuas mej txhawj mej ntshai, tabsis yog tug kws coj mej lug ua Vaajtswv le mivnyuas, hab lug ntawm Nwg lub fwjchim, mej muaj cuabkaav hu Vaajtswv has tas, “Anpas! Txiv!” #Kalat 4:5-7 #Malak 14:36; Kalat 4:6 16Vaajtswv tug Ntsujplig nrug rua peb tug ntsujplig ua timkhawv has tas peb yog Vaajtswv cov mivnyuas. 17Vim peb yog Vaajtswv cov mivnyuas lawm, peb yuav tau txais tej koobmoov kws Nwg npaaj tseg rua Nwg tsaav tuabneeg, hab peb yuav tau nrug Yexus Khetos txais tej kws Vaajtswv tau npaaj tseg rua Nwg lawm hab; ruaqhov yog peb tub nrug Khetos koom Nwg txuj kev txomnyem lawm, peb yeej yuav tau nrug Nwg koom Nwg tug tshwjchim kws ci ntsaa-ab hab.
Tug Tshwjchim Kws Ci Ntsaa-ab Yaav Tomntej
18Kuv suav has tas txuj kev txomnyem kws taamsim nuav peb raug yeej pev tsi tau tug tshwjchim ci ntsaa-ab kws Vaajtswv tseem yuav pub rua peb yaav tomntej nuav. 19Ibpuas tsaavyaam kws Vaajtswv tsim, yeej togntsoov nub kws Vaajtswv yuav qha txug Nwg cov mivnyuas. 20Txhua yaam kws Vaajtswv tsim puavleej raug Nwg foom phem, tsi yog tej ntawd xaiv txuj kev puamtsuaj ntawd, tabsis yog Vaajtswv yeej pumzoo ca tej ntawd raug kev puamtsuaj. Txawm le ntawd los tseem muaj kev casab #Chiv 3:17-19 21has tas, muaj ib nub twg ibpuas tsaavyaam kws Vaajtswv tsim, yuav dlim ntawm txuj kev puamtsuaj kws txawj lwj moog, hab yuav tau nrug Vaajtswv cov mivnyuas txais txuj kev ywjpheej kws zoo kawg nkaus.
22Peb paub tas txij thaus u lug txug najnub nua, ibpuas tsaavyaam kws Vaajtswv tsim ntsaaj ntsoogqeeg nrug txuj kev mob, ib yaam le tug quaspuj kws mob plaab yuav yug mivnyuas. 23Tsi yog ibpuas tsaavyaam kws Vaajtswv tsim txhaj ntsaaj ntsoogqeeg xwb, peb cov kws tau txais Vaaj Ntsujplig kws yog thawj yaam khoomplig kws Vaajtswv pub rua peb lawm, los peb tseem ntsaaj ntsoogqeeg togntsoov nub kws Vaajtswv yuav coj peb lug ua Nwg cov mivnyuas hab#8:23: Tej phoo ntawv qub kws xuas teg sau, tsi muaj coj peb lug ua Nwg cov mivnyuas hab. txhwv hlo peb lub cev kuas dlim. #2Klt 5:2-4 24Tub yog vim peb casab le ntawd, peb txhaj dlim; tabsis yog peb tub pum yaam kws peb casab rua lawm, tes qhov ntawd tsi yog txuj kev casab lawm. Leejtwg tseem yuav casab rua tej kws nwg tub pum lawm? 25Tabsis yog peb casab rua tej kws peb qhovmuag tsi pum, mas peb yeej yuav ua sabntev tog xwb.
26Ib yaam nkaus le ntawd, thaus peb tsaugmuas Vaaj Ntsujplig lug paab peb. Ruaqhov peb tsi paub tas peb yuav thov yaam twg, tabsis Vaaj Ntsujplig yog tug thov Vaajtswv paab peb ntawm lub suab ntsaaj lawg kws tsi muaj leejtwg yuav pav tau. 27Vaajtswv tug kws pum moog rua huv peb lub sab, yeej paub txug Vaaj Ntsujplig tej kev xaav; ruaqhov tej kws Vaaj Ntsujplig thov paab rua Vaajtswv cov tuabneeg, tej ntawd yeej lawvle Vaajtswv lub sab nyam.
28Peb paub tas Vaajtswv siv txhua yaam kws tshwmsim lug ua yaam zoo pub rua cov kws hlub Nwg,#8:28: txhua yaam kws tshwmsim lug ua yaam zoo pub rua cov kws hlub Nwg; tej phoo ntawv qub kws xuas teg sau, muaj txhua yaam yog ua qhov zoo rua cov kws hlub Vaajtswv. cov ntawd yog cov kws Nwg tau hu lug lawvle Nwg lub homphaj. 29Cov kws Vaajtswv tub xub xaiv ca lawm, Nwg muab tshwj rua ibcaag kuas puab peemtsheej zoole Nwg tug Tub, sub Leejtub txhaj yog tug tij nyob huv cov ntseeg. 30Cov kws Vaajtswv muab tshwj rua ibcaag lawm, Nwg hu puab lug; cov kws Nwg hu lug lawm, Nwg suav has tas puab yog cov kws ncaajnceeg; cov kws Nwg suav has tas ncaajnceeg lawm, Nwg pub Nwg tug tshwjchim kws ci ntsaa-ab rua puab.
Vaajtswv Txuj Kev Hlub Nyob Huv Yexus Khetos
31Yogle ntawd, peb yuav has lecaag txug tej nuav? Yog Vaajtswv tuaj peb tog lawm, leejtwg tseem yuav tawmtsaam tau peb? 32Vaajtswv yeej tsi cawm Nwg tug Tub, tabsis Nwg muab Nwg tug Tub lug theej peb suavdlawg lub txhoj! Nwg tub pub tau Nwg tug Tub, es Nwg tseem yuav muab tsi tau txhua yaam pub dlawb rua peb hab nua lov? 33Leejtwg tseem yuav komtxim tau rua cov tuabneeg kws Vaajtswv xaiv lawm? Vaajtswv tugkheej tub suav has tas puab tsi muaj txim lawm! 34Leejtwg tseem yuav rautxim tau rua puab? Yuav tsi yog Yexus Khetos! Nwg tub tuag, hab tshaaj qhov ntawd, Nwg tub sawv huv qhovtuag rov lug muaj txujsa hab nyob ntawm Vaajtswv saab xis thov Vaajtswv pub rua peb.
35Leejtwg tseem yuav cais tau peb tawm ntawm Khetos txuj kev hlub hab? Teebmeem puas cais tau, lossis kev nyuajsab, kev tsimtxom, kev tshaib nqhes, kev tsi muaj khaubdluag naav, kev txhawj-ntshai, lossis kev pluj kev tuag puas cais tau? 36Lawvle Vaajtswv Txujlug has tas,
“Vim yog Koj es peb txhaj najnub ntsib kev tuag;
luas suav has tas peb zoole tug yaaj kws yuav raug caab moog tua.” #Nnkauj 44:22
37Tabsis txawm yogle ntawd los, Khetos tug kws hlub peb, tub paab peb kovyeej txhua yaam ntawd huv tuabsi lawm! 38Ruaqhov kuv paub tseeb has tas yeej tsi muaj ib yaam dlaabtsi kws yuav cais tau peb tawm ntawm Vaajtswv txuj kev hlub le: txawm yog kev tuag lossis kev muaj sa nyob, cov timtswv lossis cov kws muaj fwjchim kaav sau nruabntug, nwgnuav lossis yaav tomntej, 39sau nruabntug lossis huv nruab tivtxwv, yeej tsi muaj ib yaam kws yog Vaajtswv tsim es yuav muaj peevxwm muab peb cais tau tawm ntawm Vaajtswv txuj kev hlub kws nyob rua huv Yexus Khetos tug kws yog peb tug Tswv hlo le.
© 2022 United Bible Societies. All rights reserved.