Loos 7
7
Lug Pevtxwv Lug Ntawm Kev Sisyuav
1Cov kwvtij, casab has tas mej yuav totaub txug qhov kws kuv tseem yuav has nuav, ruaqhov mej suavdlawg puavleej paub txug txuj kevcai. Kevcai tsuas kaav tug tuabneeg kws thaus tseem muaj sa ua neej nyob xwb. 2Pevxaam has tas, tug quaspuj kws yuav quasyawg lawm, lawvle txuj kevcai, yog tug quasyawg tseem muaj sa nyob nwg yuavtsum ua neej nrug nwg tug quasyawg ntawd moog le; tabsis yog tug quasyawg tuag lawm, tes nwg dlim ntawm txuj kevcai sisyuav ntawd lawm. 3Yog tas nwg tug quasyawg tseem nyob, es nwg cale moog nrug lwmtug txivneej nyob lawm, suavdlawg yuav has tas nwg dleev hluasnraug; tabsis yog nwg tug quasyawg tuag lawm, txawm yog nwg moog yuav quasyawg tshab los yeej tsi txhum kevcai, hab tsi yog nwg dleev hluasnraug lawm.
4Cov kwvtij, ib yaam nkaus le ntawd, yog has ntawm txuj kevcai tes mej tub tuag lawm, ruaqhov mej yog ib feem ntawm Khetos lub cev lawm. Nwgnuav mej yog Khetos tug kws Vaajtswv tau tsaa sawv huv qhovtuag rovqaab lug tug lawm, kuas peb txhaj yuav tawgpaaj txitxiv pub rua Vaajtswv. 5Thaus peb tseem ua peb lub neej lawvle tuabneeg nplajteb ua, txuj kevcai pheej najnub tshoov peb lub sab kuas moog ua txhum, kuas thaus kawg peb raug kev pluj kev tuag. 6Tabsis nwgnuav peb tub dlim ntawm txuj kevcai lawm, ruaqhov peb tub tuag rua txuj kevcai kws txeev muab peb khi ca ntawd lawm. Nwgnuav peb tsi ua dlejnum lawvle txuj qub kevcai kws tau muab sau tseg ca lawm, tabsis peb ua lawvle txuj kevcai tshab kws Vaaj Ntsujplig qha.
Kevcai Hab Kev Txhum
7Yogle ntawd, peb yuav has lecaag? Peb yuav has tas txuj kevcai yog kev txhum nua lov? Tsi yog le ntawd! Tub yog muaj txuj kevcai, es kuv txhaj paub tas kev txhum yog dlaabtsi. Yog txuj kevcai tsi tau has tas, “Tsi xob ntshaw luas tug,” tes kuv yeej yuav tsi paub tas kev ntshaw luas tug yog lecaag. #Tsiv 20:17; 2Kev 5:21 8Tabsis txuj kev txhum tau muab tej nqai kevcai ua haukev tshoov kuv sab kuas kuv ntshaw txhua yaam. Yog tsi muaj txuj kevcai, tes txuj kev txhum yeej tuag lawm. 9Yaav taag lug kuv ua kuv lub neej tsi muaj txuj kevcai kaav kuv, tabsis thaus muaj tej nqai kevcai ntawd lawm, kev txhum cale tshwm tuaj, 10hab kuv txhajle tuag. Lub homphaj ntawm tej nqai kevcai yog ua kuas tuabneeg tau txujsa, tabsis nwg coj kev pluj kev tuag lug rua kuv. 11Kev txhum tau muab tej nqai kevcai ua haukev lug dlaag-ntxag kuv hab tua kuv povtseg. #Chiv 3:13
12Yogle ntawd, txuj Kevcai yeej dlawbhuv, hab tej nqai kevcai los yeej dlawbhuv, yeej ncaajnceeg hab zoo lawm. 13Tabsis puas yog txuj Kevcai kws zoo ntawd ua rua kuv raug kev pluj kev tuag? Tsi yog le ntawd! Kev txhum yog qhov kws tua kuv; kev txhum siv yaam kws zoo lug ua rua kuv raug kev pluj kev tuag, kuas suavdlawg txhaj paub tas txuj kev txhum zoo lecaag. Yogle ntawd, lug ntawm tej nqai kevcai ntawd, suavdlawg txhaj pum tas txuj kev txhum phem kawg nkaus le.
Kev Sis Tawmtsaam Huv Lub Sab
14Peb paub tas txuj Kevcai yog has txug saab ntsujplig; tabsis kuv yog tuabneeg nqajtawv, kuv txhaj raug muab muag ua kev txhum qhev. 15Kuv tsi totaub tej kws kuv ua; ruaqhov tej kws kuv xaav ua, kuv ho tsi ua, tabsis tej kws kuv ntxub, kuv ho ua. #Kalat 5:17 16Yog kuv ua tej kws kuv tsi xaav ua, qhov ntawd qha rua kuv paub tas txuj Kevcai yeej zoo tag. 17Yogle ntawd, kuv tsi yog tug kws ua, tabsis txuj kev txhum kws nyob huv kuv yog tug ua. 18Kuv paub tas ntawm saab nqajtawv, tes yeej tsi muaj ib qhov zoo nyob rua huv kuv le. Kuv yeej muaj lub sab xaav ua qhov zoo, tabsis kuv ua tsi tau. 19Qhov zoo kws kuv xaav ua, kuv ho tsi ua, tabsis qhov phem kws kuv tsi xaav ua, kuv ho ua. 20Yog kuv ua tej kws kuv tsi xaav ua, tej ntawd yeej tsi yog kuv ua, tabsis txuj kev txhum kws nyob huv kuv yog tug ua.
21Yogle ntawd, kuv pum tas txuj kevcai ua dlejnum zoole nuav: thaus kuv xaav ua qhov zoo, kuv pheej xaiv ua qhov phem. 22Huv kuv lub sab yeej xaav ua lawvle Vaajtswv txuj kevcai xwb, 23tabsis kuv pum tas muaj dlua ib txuj kevcai kws taabtom ua dlejnum nyob rua huv kuv lub cev; txuj kevcai ntawd pheej tawmtsaam txuj kevcai kws nyob huv kuv lub sab, hab pheej yuam kuv moog ua txuj kev txhum kws nyob huv kuv lub cev le qhev. 24Uacaag kuv yuav nyuajsab ualuaj le lau? Leejtwg txhaj yuav cawm tau kuv dlim ntawm lub cev kws taabtom coj moog rua txuj kev pluj kev tuag nuav? 25Ua Vaajtswv tsaug, kws peb tug Tswv Yexus Khetos tau cawm kuv dlim!
Yogle ntawd, kuv lub neej tes zoole nuav: kuv lub sab yog ua Vaajtswv txuj kevcai le qhev, tabsis kuv lub cev ntawm saab nqajtawv yog ua qhev rua txuj kev txhum le kevcai.
© 2022 United Bible Societies. All rights reserved.