Loos 6
6
Tuag Rua Kev Txhum Tabsis Nrug Khetos Koom Ib Txujsa
1Yogle ntawd, peb yuav has lecaag? Peb yuav has tas ca peb rausab ntso ua txhum kuas Vaajtswv txuj moovhlub hajyam luj ntxiv nua lov? 2Tsi yog le ntawd! Peb tub tuag rua txuj kev txhum lawm, peb yuav ua lecaag ua neej nyob rua huv txuj kev txhum moog ntxiv? 3Mej tsi paub tas peb txhua tug kws tau ua kevcai rausdlej rua huv Yexus Khetos lawm, yog peb ua kevcai rausdlej rua huv Nwg txuj kev tuag nua lov? 4Yogle ntawd, peb txhaj raug muab log nrug Nwg hab koom Nwg txuj kev tuag lug ntawm qhov kws peb ua kevcai rausdlej, sub thaus Leejtxiv tsaa Khetos sawv huv qhovtuag rovqaab lug, lug ntawm Nwg tug tshwjchim, peb txhaj yuav muaj dlua lub neej tshab hab. #Kaulx 2:12
5Peb tau koomxeeb nrug Nwg txuj kev tuag lecaag, peb yuav koomxeeb nrug Nwg sawv huv qhovtuag rov lug muaj txujsa ib yaam le ntawd hab. 6Peb paub tas peb tug tuabneeg qub tub raug muab ntsa nrug Khetos rua sau Nwg tug ntoo khaublig lawm, kuas lub cev kws txawj ua kev txhum puamtsuaj moog, sub peb txhaj tsi tau ua txuj kev txhum qhev ntxiv. 7Ruaqhov tug tuabneeg kws tuag lawm, nwg tub dlim ntawm txuj kev txhum lub fwjchim lawm.
8Yog peb tuag nrug Khetos, peb ntseeg tas peb yuav muaj txujsa nrug Nwg nyob uake hab. 9Peb paub tas Vaajtswv tub tsaa Khetos sawv huv qhovtuag rovqaab lug hab Nwg yuav tsi tuag le lawm; txuj kev tuag yuav tsi muaj fwjchim kaav Nwg ntxiv lawm. 10Qhov kws Nwg tuag, Nwg tsuas tuag tuabzag rua txuj kev txhum xwb; nwgnuav Nwg muaj sa nyob, yog Nwg nyob pub rua Vaajtswv. 11Ib yaam le ntawd, mej yuavtsum suav has tas mej tub tuag rua txuj kev txhum hab tub muaj txujsa rua ntawm Vaajtswv nyob rua huv Yexus Khetos lawm.
12Yogle ntawd, tsi xob ca txuj kev txhum kaav mej lub cev kws txawj tuag ntxiv lawm, sub mej txhaj yuav tsi moog ua lawvle mej lub sab nyam. 13Tsi xob pub ib feem ntawm mej lub cev rua kev txhum coj moog siv ua phem ua qas. Tabsis cale muab mej lub cev pub rua Vaajtswv zoole cov tuabneeg kws tub sawv huv qhovtuag rovqaab lug lawm, hab cale muab hlo mej lub cev pub rua Vaajtswv siv ua qhov ncaajnceeg. 14Txuj kev txhum yuav tsi ua tug kaav mej lawm; ruaqhov mej tsi yog nyob huvqaab txuj kevcai, tabsis yog nyob huvqaab Vaajtswv txuj moovhlub lawm.
Ua Kev Ncaajnceeg Qhev
15Yogle ntawd, peb yuav ua lecaag? Peb yuav cale ua txhum vim peb tsi nyob huvqaab txuj kevcai, tabsis nyob huvqaab Vaajtswv txuj moovhlub lov? Tsi yog le ntawd! 16Mej tub paub lawm has tas thaus mej txaussab hlo noog ib tug twg lug, tes yog mej ua tug kws mej noog nwg lug ntawd qhev. Yog mej ua txuj kev txhum qhev, thaus kawg mej yuav raug kev pluj kev tuag. Yog mej ua txuj kev noog Vaajtswv lug qhev, thaus kawg mej yuav yog tuabneeg ncaajnceeg. 17Tabsis ua Vaajtswv tsaug! Txawm yog yaav taag lug mej ua txuj kev txhum qhev, los nwgnuav mej kubsab lug ua lawvle tej lug tseeb kws mej tau nov lawm. 18Vaajtswv tub tso mej dlim ntawm txuj kev txhum hab mej tub peemtsheej lug ua txuj kev ncaajnceeg qhev lawm.
19(Kuv siv tej lug kws tuabneeg najnub has xwb, ruaqhov nyuaj rua mej totaub.) Yaav taag lug, mej muab mej lub cev moog ua txuj kev txhum hab kev phem kev qas qhev lecaag lawm, nwgnuav mej yuavtsum muab mej lub cev moog ua qhov ncaajnceeg qhev ib yaam le ntawd kuas mej muaj lub neej kws dlawbhuv.
20Thaus mej tseem ua txuj kev txhum qhev, txuj kev ncaajnceeg yeej tsi kaav mej le. 21Tej kws mej ua taag lug lawm, es nwgnuav ua rua mej txaajmuag, muaj qaabhau dlaabtsi? Tej ntawd, thaus kawg yog kev pluj kev tuag xwb! 22Tabsis nwgnuav Vaajtswv tub tso mej dlim ntawm txuj kev txhum lug ua Nwg cov qhev lawm. Qhov kws mej tau yog txuj kev raug ntxuav kuas dlawbhuv, thaus kawg yog txujsa ntev dlhawv moog ibtxhis. 23Ruaqhov nqezug ntawm txuj kev txhum yog kev pluj kev tuag, tabsis Vaajtswv qhov khoomplig kws pub dlawb yog txujsa ntev dlhawv moog ibtxhis kws nyob rua huv Yexus Khetos kws yog peb tug Tswv.
© 2022 United Bible Societies. All rights reserved.