Loos 5
5
Tug Kws Vaajtswv Suav Has Tas Ncaajnceeg
1Nwgnuav, lug ntawm txuj kev ntseeg, Vaajtswv suav has tas peb yog tuabneeg ncaajnceeg; peb muaj#5:1: peb muaj; tej phoo ntawv qub kws xuas teg sau, muaj ca peb muaj. kev sis raugzoo nrug Vaajtswv yog lug ntawm peb tug Tswv Yexus Khetos. 2Lug ntawm txuj kev ntseeg, Nwg tau coj peb lug ua neej nyob rua huv Vaajtswv txuj moovhlub. Yogle ntawd, peb txhaj zoosab#5:2: peb txhaj zoosab; lossis peb cale zoosab. hab casab has tas peb yuav tau koom nrug Vaajtswv tug tshwjchim kws ci ntsaa-ab! 3Tsi taag le ntawd xwb, peb tseem zoosab#5:3: peb tseem zoosab; lossis peb cale zoosab. rua peb tej kev txomnyem, ruaqhov peb paub tas kev txomnyem ua rua muaj kev ua taug sabntev tiv, 4kev ua taug sabntev tiv ua rua muaj kev ua hum Vaajtswv sab, hab kev ua hum Vaajtswv sab ua rua muaj kev casab. 5Txuj kev casab nuav tsi ua rua peb taag kev casab, ruaqhov Vaajtswv tau laub Nwg txuj kev hlub lug rua peb lug ntawm qhov kws Nwg tau pub Vaaj Ntsujplig tug dlawbhuv lug nyob rua huv peb lub sab.
6Thaus kws peb tseem paab tsi tau peb tugkheej, Khetos tau lug tuag txhwv cov kws yog tuabneeg txhum lawv nraim le lub sijhawm kws Vaajtswv tau teem tseg lawm. 7Yeej tsi laam muaj ib tug twg kws yuav txaussab tuag theej tug tuabneeg kws ncaajnceeg le, tabsis yog tuag theej tug tuabneeg zoo nua, tejzag kuj yuav muaj qeeleej txaussab tuag hab. 8Tabsis Vaajtswv tau qha Nwg txuj kev hlub rua peb le nuav: thaus peb tseem yog tuabneeg txhum, Khetos tub tuag theej peb lawm!
9Lug ntawm Nwg cov ntshaav,#5:9: Lug ntawm Nwg cov ntshaav; lossis Lug ntawm Nwg txuj kev tuag. nwgnuav peb txhaj ua tau tuabneeg ncaajnceeg; tshaaj qhov ntawd ntxiv, Nwg tseem yuav cawm kuas peb dlim ntawm Vaajtswv txuj kev chim hab! 10Thaus u peb yog Vaajtswv le yeebncuab, tabsis lug ntawm Nwg tug Tub txuj kev tuag, Nwg tau coj peb lug ua Nwg le phoojywg lawm. Qhov kws nwgnuav peb yog Vaajtswv le phoojywg lawm, peb tseem yuav dlim peb lub txim hab, vim Khetos tub sawv huv qhovtuag lug lawm. 11Tsi taag le ntawd xwb; peb zoosab heev rua Vaajtswv lug ntawm peb tug Tswv Yexus Khetos, tug kws tau coj peb lug ua Vaajtswv le phoojywg.
Adaas Hab Khetos
12Kev txhum tau nkaag lug rua huv lub nplajteb nuav lug ntawm ib tug tuabneeg, hab qhov kev txhum ntawd tau coj txuj kev tuag nrug nwg lug. Yogle ntawd, txuj kev tuag txhajle nthuav moog thoobplawg rua txhua tsaav tuabneeg kws nyob huv nplajteb nuav ruaqhov suavdlawg tau ua txhum taag huv tuabsi. #Chiv 3:6 13Uantej kws Vaajtswv muab txuj Kevcai rua Mauxes, tub muaj kev txhum nyob rua huv lub nplajteb nuav lawm. Tabsis thaus ntawd tseem tsi tau suav has tas yog kev txhum vim tseem tsi tau muaj txuj kevcai. 14Txawm le ntawd los, txij thaus Adaas tam lug txug Mauxes tam, kev tuag yeej tswj txhua tug tuabneeg huv tuabsi, txawm yog cov kws ua txhum tsi thooj le Adaas tug kws tsi noog Vaajtswv lug ua los, suavdlawg puavleej tuag huv tuabsi.
Adaas yog ib tug qauv txug tug kws tseem yuav lug. 15Tabsis obtug zoo tsi sisthooj, ruaqhov qhov khoomplig kws Vaajtswv pub dlawb rua peb ntawd tsi zoole Adaas txuj kev txhum. Yeej muaj tseeb has tas vim Adaas ua txhum, es coob leej txhaj tuag. Tabsis Vaajtswv txuj moovhlub tseem luj tshaaj qhov ntawd, Vaajtswv txhaj muab Nwg qhov khoomplig kws yog txuj moovhlub lug ntawm ib tug tuabneeg, kws yog Yexus Khetos, lug paab suavdlawg. 16Vaajtswv qhov khoomplig tsi zoole qhov kws ib tug tuabneeg tau ua kev txhum. Tomqaab ib tug ua txhum, tes txawm muaj kev txavtxim hab raug rautxim; tabsis tomqaab kws muaj kev txhum ntau heev lawm, tes txawm muaj qhov khoomplig kws yog txuj kev zaamtxim. 17Yog tas ib tug ua txhum, es kev tuag cale tswj taagnrho suavdlawg vim yog tuabtug ntawd. Qhov zoo tshaaj ntawd, yog lug ntawm qhov kws ib tug tuabneeg, kws yog Yexus Khetos, tau ua tav, txhua tug kws tau txais Vaajtswv txuj moovhlub nplua-mag hab nrug Nwg sis raugzoo, yuav muaj txujsa lug ntawm Khetos.
18Vim tuabqhov kev txhum xwb ua rua suavdlawg raug txim, tuabyaam nkaus le ntawd, vim tuab teg dlejnum kws ncaajnceeg xwb tso tau suavdlawg dlim hab pub tau txujsa rua suavdlawg. 19Vim tuabtug tsi noog Vaajtswv lug xwb ua rua suavdlawg poob kev txhum huv tuabsi, tuabyaam nkaus le ntawd, vim tuabtug noog Vaajtswv lug xwb ua rua suavdlawg tau lug ua tuabneeg ncaajnceeg huv tuabsi.
20Thaus muaj txuj Kevcai, suavdlawg hajyam ua txhum ntxiv; tabsis qhovtwg kws muaj kev txhum luj zujzug, Vaajtswv txuj moovhlub hajyam muaj ntau ntxiv nyob rua qhov ntawd. 21Yogle ntawd, txuj kev txhum ua rua muaj kev pluj kev tuag lecaag, Vaajtswv txuj moovhlub ua rua muaj txuj kev ncaajnceeg, hab coj peb moog tau txujsa ntev dlhawv lug ntawm Yexus Khetos kws yog peb tug Tswv ib yaam le ntawd.
© 2022 United Bible Societies. All rights reserved.