1 Kauleethaus 6
6
Cov Ntseeg Ua Plaub Rua Cov Ntseeg
1Thaus mej ib leeg muaj plaubntug rua ib leeg, mej tseem muajplhus coj moog rua cov tuabneeg kws tsi ntseeg ua cov tu hab lov? Uacaag tsi coj moog rua cov ntseeg tu xwb? 2Mej tsi paub tas cov ntseeg yuav ua cov txavtxim rua tuabneeg nplajteb nua lov? Yog mej tub yuav txavtxim rua tuabneeg nplajteb, mej txawm tsi muaj peevxwm tu tej nyuas plaub miv-miv nuav le hab lov? 3Mej tsi paub tas peb tub yog cov kws yuav txavtxim rua cov timtswv nua lov? Yogle ntawd, tsimnyog peb yuavtsum muaj peevxwm tu tau tej nyuas plaubntug kws najnub muaj nuav ntau npaug!
4Thaus mej muaj plaubntug le has lug nuav, mej txawm yuav cale tsaa ib cov tuabneeg kws pawg ntseeg tub tsi fwm le lug txavtxim nua lov? 5Tsimnyog mej yuavtsum paub txaajmuag! Mej txawm tsi muaj ib tug txawjntse kws yuav has tau tej plaubntug kws cov ntseeg ua le lov? 6Uacaag cov ntseeg ib leeg tseem kom ib leeg moog rua huv tsev tu plaub, es ho tseem ca cov tsi ntseeg ua cov tu plaub hab?
7Tseeb tag, qhov kws mej pheej sis ua plaub ntawd qha tau has tas mej yeej tsi coj lub neej zoole tug ntseeg Vaajtswv hlo le. Mej ua tug swb tsi tau le lov? Uacaag mej tsi ca luas ntxo mej xwb? 8Mej tub yog tuab cov ntseeg xwb los mej ib leeg tseem ua phem rua ib leeg, hab ib leeg ntxo ib leeg!
9Mej tsi paub tas cov tuabneeg kws ua phem yuav tsi muaj feem nyob rua huv Vaajtswv lub Tebchaws nua lov? Mej tsi xob xaav yuamkev; cov tuabneeg kws nyam ua kev nkauj kev nraug, pe mlom, dleev luas quaspuj luas quasyawg, cov txivndlav, txivneej dleev txivneej, 10cov ua tubsaab, ntshaw luas tug, quavcawv, haslug chob lwmtug hab ntxo lwmtug, yuav tsi muaj feem moog nyob rua huv Vaajtswv lub Tebchaws le. 11Yaav taag lug mej cov muaj qeeleej zoo nkaus le ntawd. Tabsis mej lub txim tub raug muab ntxuav lawm; mej tub dlawbhuv lawm; mej tub tau lug nrug Vaajtswv sis raugzoo lug ntawm Tswv Yexus Khetos lub npe hab ntawm Vaajtswv tug Ntsujplig lawm.
Siv Mej Lub Cev Ua Rua Vaajtswv Tau Ntsejmuag
12Qeeleej yuav has tas, “Kuv yeej muaj cai ua tau txhua yaam.” Kuj yog le ntawd hab ntaag; tabsis tsi yog txhua yaam ntawd yuav muajnqes huv tuabsi. Txawm yog “Kuv yeej muaj cai ua tau txhua yaam,” los kuv yuav tsi ca ib yaam twg kws kuv ua ntawd yuam tau kuv ua nwg qhev. #1Klt 10:22 13Muaj dlua lwmtug yuav has tas, “Zaub-mov yog npaaj lug rua lub plaab, hab lub plaab yog npaaj lug ntim zaub-mov.” Yog lawm, tabsis Vaajtswv yuav ua kuas ob yaam ntawd puamtsuaj taag huv tuabsi. Lub cev tsi yog ca siv rua kev nkauj kev nraug, tabsis yog ca siv rua tug Tswv; hab tug Tswv yog tug kws yug lub cev ntawd. 14Vaajtswv tub tsaa tug Tswv sawv huv qhovtuag rovqaab lug lawm, Vaajtswv lub fwjchim yuav tsaa peb sawv rovqaab lug ib yaam nkaus hab.
15Mej tsi paub lov has tas mej lub cev muaj feem koomxeeb nrug rua Khetos? Yogle ntawd, kuv puas yuav muaj cuabkaav muab ib feem ntawm Khetos lub cev moog koomxeeb nrug rua ib tug namndlav? Yeej tsi tau hlo le! 16Mej tsi paub tas tug tuabneeg kws koomxeeb nrug rua ib tug namndlav, nwg yeej nrug tug namndlav ntawd koom ib lub cev lawm nua lov? Vaajtswv Txujlug tau has tas, “Obtug yuav koom ua ib lub cev.” #Chiv 2:24 17Tabsis tug kws nrug tug Tswv koom uake, tug ntawd yeej yog ib tug nrug tug Tswv.
18Mej yuavtsum tsiv tawm ntawm txuj kev nkauj kev nraug. Txhua yaam kev txhum kws tuabneeg ua, yog kev txhum rua saabnrau ntawm nwg lub cev; tabsis tug kws ua kev nkauj kev nraug yog nwg ua txhum rua nwg lub cev. 19Mej tsi paub tas mej lub cev yog Vaaj Ntsujplig tug Dlawbhuv lub tuamtsev nua lov? Tug Ntsujplig ntawd nyob rua huv mej hab yog tug kws Vaajtswv muab pub rua mej. Mej lub cev tsi yog mej le tabsis yog Vaajtswv le; #1Klt 3:16; 2Klt 6:16 20ruaqhov Nwg tau txhwv mej lug ntawm ib tug nqe kws kim kawg le. Yogle ntawd, mej cale siv mej lub cev ua rua Vaajtswv tau ntsejmuag.
© 2022 United Bible Societies. All rights reserved.