1 Kauleethaus 5
5
Kev Nkauj Kev Nraug Huv Pawg Ntseeg
1Tau nov xuv has tas muaj kev txhum kev nkauj kev nraug nyob rua huv mej; qhov kev txhum ntawd txawm yog cov tsi ntseeg los luas tub tsi muaj le ntawd. Qhov ntawd yogle nuav: muaj ib tug txivneej cale yuav nwg txiv tug nam tshab lug ua nwg quaspuj! 2Mej tseem muajplhus khaav hab lov? Tub tsimnyog mej quajntsuag, hab muab tug kws ua txhum ntawd rhu tawm huv mej moog. 3Txawm yog ntawm saab nqajtawv kuv nyob dleb mej los kuv lub sab yeej nrugnraim mej nyob. Yog tas taamsim nuav kuv nrug mej nyob, 4ntshe kuv tub tuav peb tug Tswv Yexus lub npe rautxim rua tug kws ua txhum ntawd lawm. Thaus mej tuaj saablaaj uake, kuv lub sab yeej nrug mej, hab lug ntawm peb tug Tswv Yexus lub fwjchim kws nyob nrug peb, 5mej cale muab tug txivneej ntawd cob rua Xataas ua kuas nwg lub cev nqajtawv puamtsuaj moog, sub nwg tug ntsujplig txhaj yuav dlim tau rua Nub kws tug Tswv rov lug.
6Mej txuj kev khaavtheeb tsi yog ib yaam kws zoo hlo le! Mej tsi paub tas ib qhov nyuas keeb miv-miv xwb, ua rua taagnrho lub ncuav su tuaj nua lov? #Kalat 5:9 7Mej yuavtsum muab tej keeb qub kws yog kev txhum tso povtseg sub mej txhaj yuav dlawbhuv tag-tag. Yog mej ua le ntawd, mej txhaj yuav zoole lub ncuav tshab kws tsi muaj keeb xyaw hlo le, kws taamsim nuav mej zoole ntawd ntaag. Ruaqhov Khetos tug kws yog peb tug mivnyuas yaaj, kws raug luas muab tua ua kevcai Hlaa Dlhau, tub tuag theej peb lub txhoj lawm. #Tsiv 12:5 8Yogle ntawd, ca peb lug ua kevcai Hlaa Dlhau, ca tsi xob muab cov ncuav kws muaj tej qub keeb kws yog kev txhum hab kev phem kev qas lug ua, tabsis muab cov ncuav tsi xyaw keeb kws yog txuj kev ncaajnceeg hab kev tseeb lug ua xwb. #Tsiv 13:7; 2Kev 16:3
9Kuv tub sau ntawv tuaj rua mej lawm, kuas mej tsi xob moog koom nrug cov tuabneeg kws nyam ua kev nkauj kev nraug. 10Qhov ntawd, tsi yog kuv has txug cov tuabneeg tsi ntseeg kws nyam ua kev nkauj kev nraug lossis cov kws ntshaw luas tug lossis cov kws ua tubsaab lossis cov kws pe mlom. Yog yuav txwv tsi pub mej nrug cov tuabneeg ntawd nyob uake, mas yuavtsum yog mej tawm kag huv lub nplajteb nuav moog xwb. 11Tabsis qhov kws kuv sau tuaj rua mej nuav, mas yog qha kuas mej tsi xob moog koom nrug tug tuabneeg kws nwg has tas nwg yog tug ntseeg, tabsis nwg tseem nyam ua kev nkauj kev nraug lossis ntshaw luas tug lossis pe mlom lossis haslug chob lwmtug lossis quavcawv lossis ua tubsaab. Txawm yog yuav nyob nrug nwg noj mov uake xwb los mej tsi xob koom hlo le.
12Tsi yog kuv le dlejnum kws yuav moog txavtxim rua cov tuabneeg saabnrau. Tabsis yog mej le dlejnum kws yuav tau txavtxim rua cov tuabneeg saabhuv, puas yog le ntawd? 13Vaajtswv yog tug kws yuav txavtxim rua cov kws nyob saabnrau. Ruaqhov Vaajtswv Txujlug has tas, “Cale muab tug kws ua phem ntawd rhu tawm huv mej moog.” #2Kev 13:5; 17:7
© 2022 United Bible Societies. All rights reserved.