1 Kauleethaus 7
7
Tej Lug Nug Txug Kev Sisyuav
1Zagnua, has txug tej kws mej tau sau ntawv tuaj nug kuv.
Ib tug txivneej kws tsi yuav quaspuj hlo le kuj yog ib qhov zoo.#7:1: Ib tug txivneej kws tsi yuav quaspuj hlo le kuj yog ib qhov zoo; lossis Mej has tas ib tug txivneej kws tsi yuav quaspuj hlo le kuj yog ib qhov zoo. 2Tabsis vim muaj kev nkauj kev nraug ntau heev, yogle ntawd txhua tug txivneej nyag yuavtsum muaj nyag ib tug quaspuj, hab txhua tug quaspuj nyag yuavtsum muaj nyag ib tug quasyawg. 3Tug quasyawg yuavtsum muab nwg tugkheej rua nwg tug quaspuj, hab tug quaspuj los yuavtsum muab nwg tugkheej rua nwg tug quasyawg. 4Tug quaspuj tsi yog tug tswv rua nwg lub cev, tabsis nwg tug quasyawg yog tug tswv; ib yaam nkaus le ntawd, tug quasyawg tsi yog tug tswv rua nwg lub cev, tabsis nwg tug quaspuj yog tug tswv. 5Meb tsi xob cais chaw pw uantej kws meb tsi tau has hum. Yog yuav cais, ca cais mo puav kuas meb muaj sijhawm thov Vaajtswv xwb; tomqaab ntawd, meb yuavtsum rov lug pw uake. Qhov ntawd meb txhaj yuav tsi qaug rua Xataas txuj kev simsab vim meb tswj tsi tau meb lub sab.
6Qhov kuv has le nuav tsuas yog kuv xaav tsocai xwb, tsi yog kuv yuav yuam. 7Tseeb tag, kuv xaav kuas txhua tug ua tau le kuv; tabsis nyag tau nyag ib qhov koobmoov lug ntawm Vaajtswv, ib tug tau yaam nuav, ib tug ho tau yaam tod.
8Zagnua, kuv has rua cov kws tseem tsi tau sisyuav hab cov pujntsuag has tas, yog puab nyob ib leeg ib yaam le kuv es tsi xob sisyuav le los kuj yog ib qhov kws zoo. 9Tabsis yog puab tswj tsi tau puab lub sab, puab cale sisyuav. Vim tas qhov sisyuav ntawd yuav zoo dlua qhov kws txuj kev ntshaw pheej hlawv puab lub sab kub quaslug.
10Kuv has ib lus rua cov kws tub sisyuav lawm, tej lug nuav tsi yog kuv has, tabsis yog tug Tswv has, tug quaspuj yuavtsum tsi xob tso nwg tug quasyawg tseg; 11tabsis yog nwg muab nwg tug quasyawg tsotseg, nwg yuavtsum tsi xob moog yuav dlua quasyawg tshab, yog nwg xaav yuav, tes kuas nwg cale rovqaab lug yuav nwg tug quasyawg qub xwb; hab tug quasyawg los yuavtsum tsi xob muab nwg tug quaspuj nrauj. #Math 5:32; 19:9; Malak 10:11-12; Lukas 16:18
12Dlua le cov, kuv has le nuav (has le kuv has, tsi yog tug Tswv has): yog muaj ib tug txivneej ntseeg kws nwg tug quaspuj tsi ntseeg, tabsis tug quaspuj ntawd yeej txaussab nrug nwg nyob, nwg yuavtsum tsi xob muab tug quaspuj ntawd nrauj. 13Hab yog muaj ib tug quaspuj ntseeg kws nwg tug quasyawg tsi ntseeg, tabsis tug quasyawg ntawd yeej txaussab nrug nwg nyob, nwg yuavtsum tsi xob muab tug quasyawg ntawd nrauj. 14Ruaqhov tug quasyawg kws tsi ntseeg ntawd tub raug Vaajtswv ntxuav lug ntawm nwg tug quaspuj, hab tug quaspuj kws tsi ntseeg ntawd tub raug Vaajtswv ntxuav lug ntawm nwg tug quasyawg kws ntseeg lawm. Yog tsi yogle ntawd, mej cov mivnyuas yuav tsi dlawbhuv, tabsis qhov tseeb yogle nuav, mej cov mivnyuas yeej dlawbhuv.
15Tabsis yog tas tug kws tsi ntseeg ho xaav tawm ntawm tug ntseeg moog, los ca nwg tawm moog. Yog tej qhov zoole nuav, tsi cheemtsum yuav muab obtug khi ca uake, ruaqhov Vaajtswv yeej hu mej lug ua lub neej kuas nyob rua huv kev thaajyeeb. 16Koj tug kws yog quaspuj, koj paub tau lecaag has tas koj yuav cawm tau koj tug quasyawg? Lossis koj tug kws yog quasyawg, koj paub tau lecaag has tas koj yuav cawm tau koj tug quaspuj?
Ua Lub Neej Lawvle Vaajtswv Tau Hu Koj
17Txawm lecaag los xij, txhua tug nyag yuavtsum ua nyag lub neej lawvle qhov kws tug Tswv tau muab rua nwg, hab lawvle lub neej thaus Vaajtswv tau hu nwg lug. Nuav yog txuj kevcai kws kuv qha nyob rua txhua pawg ntseeg. 18Yog leejtwg tau ua kevcai txav uantej kws Vaajtswv hu nwg lug ntseeg, nwg tsi xob laam muab tej cosplav kws qha txug txuj kevcai txav ntawd rhu moog; yog Vaajtswv hu leejtwg kws ho tsi tau ua kevcai txav, tsi taag nwg yuav ua kevcai txav le lawm. 19Txawm yuav ua kevcai txav hab tsi ua los yeej tsi tseemceeb dlaabtsi; qhov tseemceeb tshaajplawg yog qhov kws coj lawvle Vaajtswv Txujlug.
20Txhua tug nyag yuavtsum ua nyag lub neej lawvle thaus Vaajtswv hu nwg lug ntseeg. 21Thaus Vaajtswv hu koj ntawd, koj puas tseem yog ib tug qhev? Koj tsi xob nyuajsab txug qhov ntawd, tabsis yog koj muaj kev tawm tau lug nyob ywjpheej, koj cale tawm.#7:21: tabsis yog koj muaj kev tawm tau lug nyob ywjpheej, koj cale tawm; lossis tabsis yog koj muaj kev tawm tau lug nyob ywjpheej, cale xaiv yuav qhov kws yuav ua rua koj tau zoo nyob tshaajplawg xwb, txawm koj tseem yog ib tug qhev los xij. 22Tug tubqhe kws tug Tswv hu nwg, tug ntawd tau txais kev ywjpheej nyob rua huv tug Tswv; ib yaam nkaus le ntawd, tug kws muaj kev ywjpheej thaus Khetos hu nwg lug, nwg yog Khetos tug qhev. 23Vaajtswv tau txhwv mej lug ntawm ib tug nqe kws kim kawg le; yogle ntawd mej tsi xob moog ua tuabneeg nplajteb qhev. 24Cov kwvtij, mej txhua tug yuavtsum nrug Vaajtswv sis raugzoo ib yaam le thaus kws Vaajtswv hu mej lug ntseeg.
Tej Lug Nug Txug Cov Tsi Tau Muaj Txwjnkawm Hab Cov Pujntsuag Yawmntsuag
25Zagnua, has txug ntawm cov tsi tau muaj txwjnkawm: tej nuav tsi yog tug Tswv kuas kuv has, tabsis kuv has lawvle kuv txuj kev xaav, kws yog ib tug kws tau txais tug Tswv txuj kev taabncuab kws lwmtug casab tau rua kuv.
26Vim najnub nua muaj kev ntxhuvsab heev, kuv txhaj xaav tas ca mej nyag nyob nyag le taamsim nuav ntshe yuav zoo dlua. 27Koj puas tau muaj quaspuj? Yog koj muaj lawm, tsi xob nrhav kev muab nwg tsotseg. Yog koj tsi tau muaj quaspuj, koj tsi xob nrhav yuav quaspuj. 28Tabsis yog koj yuav quaspuj lawm los yeej tsi txhum dlaabtsi; hab yog tug nkaujxwb yuav quasyawg, los yeej tsi txhum dlaabtsi. Tabsis kuv tsi xaav kuas mej muaj kev nyuajsab le cov kws tub sisyuav lawm.
29Cov kwvtij, qhov kws kuv has yog le nuav: vim lub sijhawm tshuav tsi ntau lawm, txij nuav moog cov kws tub muaj quaspuj lawm, cale ua lub neej zoole puab tsi tau muaj; 30cov kws quajntsuag, cale ua le kws tsi muaj kev quajntsuag; cov kws muaj kev zoosab, cale ua le kws tsi muaj kev zoosab; cov kws muaj nyaj yuav tau qhov txhua chaw, cale ua le kws tej ntawd tsi yog puab tug; 31cov kws siv tej khoom nyob huv lub nplajteb nuav, cale ua le kws nwg yeej tsi tau siv. Ruaqhov lub nplajteb taamsim nuav, taabtom pluj zujzug moog lawm.
32Kuv xaav kuas mej dlim ntawm tej kev nyuajsab. Tug kws tsi muaj quaspuj, nwg kubsab lug rua tug Tswv tegnum, ruaqhov nwg xaav ua kuas hum tug Tswv lub sab nyam. 33Tabsis tug kws muaj quaspuj lawm, nwg rausab ntso khwv noj khwv haus huv lub nplajteb nuav, ruaqhov nwg xaav ua kuas hum nwg tug quaspuj lub sab nyam; 34yogle ntawd, nwg txuj kev ntshaw txhaj raug faib moog rua ob txujkev. Tug quaspuj kws tsi tau muaj quasyawg lossis tug nkaujxwb, nwg kubsab lug ua tug Tswv tegnum, vim nwg xaav muab nwg lub cev hab lub sab fij rua tug Tswv; tabsis tug quaspuj kws yuav quasyawg lawm, nwg rausab ntso khwv noj khwv haus huv lub nplajteb nuav, ruaqhov nwg xaav ua kuas hum nwg tug quasyawg lub sab nyam.
35Kuv has le nuav, tsi yog kuv txwv mej, tabsis yog kuv xaav paab mej. Kuv xaav kuas mej ua qhov kws yog hab ua qhov kws tsimnyog ua, kws yog kubsab lug ua tug Tswv tegnum tsi xob ua tuabneeg ywjfaab ywjfwj.
36Yog tug tub hab tug ntxhais twg kws tub sisqhab lawm, tabsis tug tub pum tas nwg tugkheej coj tsi tshua tug rua tug ntxhais ntawd, hab yog nwg txuj kev hlub muajzug hwv lawm es nwg xaav tas obtug yuavtsum sisyuav xwb, tes ca nwg yuav lawvle nwg txuj kev ntshaw.#7:36: Yog tug tub … txuj kev ntshaw; lossis Yog tug ntxhais leejtxiv pum tas tug tub coj tsi tshua tug rua tug ntxhais ntawd, hab tug ntxhais ntawd yeej muaj noobnyoog txaus lawm, tes leejtxiv yuav tau ca nwg tug ntxhais yuav quasyawg lawvle nwg txuj kev ntshaw. Qhov ntawd yeej tsi txhum le. 37Tabsis yog nwg txavtxim sab has tas nwg yuav tsi yuav quaspuj,#7:37: tsi yuav quaspuj; lossis tsi ca nwg tug ntxhais moog yuav quasyawg. kws yeej tsi yog leejtwg yuam nwg; yog nwg tswj tau nwg lub sab hab ua tau lawvle nwg xaav, has tas nwg yuav tsi yuav tug hluasnkauj#7:37: tug hluasnkauj; lossis ca nwg yuav quasyawg. ntawd, kuj yog nwg ua tau zoo lawm. 38Yogle ntawd, tug kws yuav tug hluasnkauj ntawd#7:38: yuav tug hluasnkauj ntawd; lossis ca nwg tug ntxhais yuav quasyawg., nwg ua tau zoo lawm, tabsis tug kws tsi yuav#7:38: tsi yuav; lossis tsi ca tug ntxhais moog yuav quasyawg. tseem hajyam ua tau zoo dlua.
39Tug quaspuj kws muaj quasyawg, yog nwg tug quasyawg tseem ua neej nyob nwg yuavtsum nrug nwg tug quasyawg ntawd ua neej moog le. Tabsis yog nwg tug quasyawg tuag lawm, tes nwg muaj cai moog yuav dlua lwmtug lawvle nwg lub sab nyam, tabsis tug quasyawg ntawd yuavtsum yog ib tug kws ntseeg Vaajtswv. 40Kuv xaav tas yog nwg nyob taug ib leeg le ntawd moog, mas yuav kaajsab dlua. Tej lug ntawd yog kuv qhov kev xaav, tabsis kuv yeej xaav tas kuv muaj Vaajtswv tug Ntsujplig nyob rua huv kuv hab.
© 2022 United Bible Societies. All rights reserved.