O waamulha 19
19
Mwaha wa Nlawi ni namitheko awe nthiyana
1Yeyo ikatema iyo attu o Uisraeli vaari aya ahiri ni mwene, ahokhalha Nlawi mmoka aakhalha thoko nlheto utayi, umiakoni Efraimu. Yoyo ntu uyo ahonkusha nthiyana mmoka o Ubethlehemu iwani i Nayuda ukhalha namitheko awe. 2Nansho namitheko nthiyana uyo ahonthunalhelha Nlawi uyo, nkanhiya ni uhokolhia uwannyawe wa athumwanawe Ubethlehemu uwo, nkaakhalha wowo mieri micheshe. 3Nihuku nimoka owannyawe ayo ahothama ni urwaa umwaaviani, athananaka wiira amuulhumane rata ni wiira anhokolhiane uwannyaya. Paahi yoyo nlhopwana uyo ahorwaa vamoka ni namitheko awe ni iphuta piilhi. Paahi nthiyana ulhe nkaarweha mpaani wa athumwanawe, ni ahokohi ayo vaamwoonilhe awe nkayampochera wo untapelhelha. 4Ahokohi ayo ahaapochera Nlawi uyo rata, ni uyo ahokhalha wowo wo mahuku mararu, nkayaalhia, nkaawuria ni urupa vamoka ni nthiyana uyo wowo. 5Nihuku no necheshe, ahonkwa wichishuru, nkaattukacha chittu wiira ahokholhiache, nansho athumwanawe nthiyana uyo nkeera, “Nlhiyeeke yolhia vakani thoko, mpatteke machiri, yamalhaka nthameke nrweeke.”
6Paahi yayo attu eelhi ayo ahokhalhacha, nkayaalhia ni uwuria vamoka. Yamalheke ahokohi aya ayo nkayeerelha wiira, “Chonte nrupeke va ulha uhiyu ulha tho, mpuheke.”
7Nlawi ulhe veemenlhe awe wiira athame arwee, ahokohi ayo nkaamwiirelha wiira hithame, ni uyo ahokhalha wo uhithama. 8Nihuku no nethanu, yoyo ntu uyo ahonkwa wichishuru, athananaka uthama. Nansho athumwanawe nthiyana ulhe nkayaamwiirelha wiira, “Nlhieke yoolhia wiira mpatteke machiri, nlhiteke mpaka uchechilho, vavawo nthameke nrweeke.” Paahi eelhi ayo onkhaye nkayaalhia vamoka.
9Ni Nlawi uyo, namitheko awe nthiyana ni namitheko awe nkina ulhe vonkwilhe aya wiira athame arwaache, ahokohi awe ayo ahomwiirelha Nlawi uyo wiira, “Vano woonaka uheelha, nlhieke yolhia, nrupeke vava. Meelho wichishu munkweke mapikoosha, nchokholheke nkwaha inyu wo uhokolhia uwaninyu.”
10Nansho yoyo ntu uyo nkaakhota urupa wowo yoyo uhiyu uyo. Paahi ahothama ni urwaa, nkaaphiya vakhiviru ni iwani ya Ayebusi yaani Uyerusalemu. Aathamme ni iphuta chawe piilhi chaathanlhiye tayari vamithanani waya, vamoka ni namitheko awe nthiyana ulhe. 11Vaari aya anatamenrie iwani yo Uyebusi, waari unelhilhe, paahi namitheko ulhe nkeerelha owannyawe awe ayo wiira, “Vano nambaya niphiyelhe ilha iwani ya Ayebusi ilha, nirupelheke mwommo uhiyu ulha.”
12Owannyawe ayo nkaakhulha wo wiira, “Khaninorukunuwa ni ukelha iwani yo alheto ahiri attu o Uisraeli. Nirweeke mpaka Ugibea. 13Nngwee naatamerieke vavawo vakittu vawo, narupelheke wowo Ugibea uwo ama Uraama.”
14Paahi nkayaarwacha mpaka nchuwa nkanaatipheelha vaari aya vakhiviru ni iwani yo Ugibea, iri phi iwani yo attu o nikosho ni Nabenyamini. 15Nkayaakelhacha vawani vawo wiira arupelhe wowo uhiyu uyo. Nansho, vaakenlhe aya vawani vawo ahorwaa nkayaakhalha vakittu vaari ipuwa voowoonia, kwaani khaawo ntu aapochenre unupani wawe.
16Vaari aya wowo, ahowa ntu mmoka o wuulhuvalha aakhuma umatani wawe. Yoyo ntu uyo ari nnenchi o ilhapo yo umiakoni yo Efraimu, aakhalha Ugibea thoko nlheto. Anenchi o iwani yo Ugibea iyo ari attu o nikosho ni Nabenyamini. 17Yoyo ntu uyo vaawenhe awe ni umwoona ntu ri munkwahani nakhalhe va ipuwa voonene vawo, ahokoha, “Mwaatti nnokhumacha vayi, nnokhelha uyi?”
18Ni ayo nkaamwaakhulha eeraka, “Ninokhuma Ubethlehemu ilhapo i Nayuda, ninokelha vakittu wo utayi umiakoni Efraimu, wowo phi anokhalha aka. Ni vaa khaawo ntu nipochenre unupani wawe. 19Nansho inakhalhaka chiicho, hi anamitheko inyu va, nihokusha manyashi o ulhiha iphuta chihu chi. Tho, nihanaa nkatte ni idivai, chechiyo chinookithosha mii, nthiyana ulha, ni namitheko aka ulha. Khaniwukuwelhiye ni ittu iriyoothe.”
20Ntu o wulhuvalha uyo nkeerelha wiira, “Mpuha ukhalhe ni inyu mwaatti! Kinouvahani chittu chonkhaye chinothanana inyu. Nansho nhirupe uno voonene va.” 21Paahi ahaarweeha uwannyawe ni ulhiha iphuta chaya. Yayo alheto ayo ahokhuchacha mieto chaya, nkayaalhia ni uwuria.
22Vaari aya awuriaka vawo, manyaalhopwana o mirima cho uhilhoka o iwani iyo ahowaacha nkayaarukureriya inupa iyo ni uhodisha vankhorani. Nkayeerelha anene inupa ayo wiira, “Munkumihe vathe uno nlhopwana uyo wiilhe uwaninyu uyo, ninthelhakache.”
23Nansho anene inupa ayo ahokhuma vathe, nkayeerelha wiira, “Nhiire chiicho ashilhoko aka, kinoulhelhani wiira nhiwonye chommo. Ulha nlheto aka, paahi nhimpangelhe ittu yo uholhoka iyo. 24Kihanaa mwaamwanaka mwanthiyana hinathupha mooro, ni tho ahaawo namitheko nthiyana a nlheto aka. Nkihiyerereke etu kaakumihache vathe, mwaakusheke yayo ni waapangelha thoko chinothanana inyu, nansho ulha ntu ulha nhipangelhe ittu yo wuulhiha muru iyo.” 25Nansho manyaalhopwana ayo khayeewelhenlhe. Paahi Nlawi ulhe ahonkusha namitheko awe nthiyana ulhe nkankumiha ni waavaha vathe uwo. Ni ayo nkayankusha ni unrupana uhiyu woothe mpaka wichishu. Vaatameria aya usha, nkayanhiyacha arwee.
26Wichishu, nthiyana ulhe ahowa mpaka vankhorani wo inupa yaari aya owannyawe, nkaawulhuwa vathi vankhorani vawo ni ukhalha vavawo mpaka wichishu. 27Owannyawe ayo vonkwilhe aya wichishu, ahohulha nkhora wo inupa, nkayaakhuma vathe wiira achokholhe nkwaha aya. Wo uthuthuwelha nkayamphwanya namitheko nthiyana aya narumpe vathi vankhorani, miono chawe chinavarenlhe nipoto no nkhora. 28Nkaamwiirelha, “Mweemelheke nngwee.” Nansho khaakhunlhe ittu. Nkayanthesha nkayaamweesha vachulhu iphuta aya ni unrwaana mpaka uwannyawe. 29Vaaphilhe awe uwannyawe ahokusha mwaalho ni untupulhacha namitheko nthiyana ulhe ikipande khumi ni piilhi. Yamalheke nkaarweha ikipande chiyo ilhapo yonkhaye ya attu o Uisraeli. 30Kila ntu oonilhe ittu yeyo iyo aheera, “Ittu thoko yelha khinakhumelhelha wala woonia toka nihuku attu o Uisraeli vaakhumilhe aya ilhapo yo Umisri nne mpaka ilhelho nna. Nikhalhe, nuupuwelheke, nivahaneke nlhove no uphanga.”
The Bible Version in Makua @The Word for The World International and Makua Language translators. All rights reserved.