O waamulha 20
20
Attu o Uisraeli anoowiichesha tayari waatakana ikhoto
1Attu onkhaye o Uisraeli ukhuma Urdani mpaka Ubeersheba, vamoka ni attu o ilhapo yo Ugileadi, iwani yonkhaye ahokumaana Umizpa, umihoolho wa Apwiiya Nlhuku. 2Aholhelhi onkhaye o makosho attu o Uisraeli ahokhalha umihoolho wa attu a Nlhuku. Waalhakelhiya wa manyaasikari onkhaye weeta ni mieto avanre ikerero, ari ilaki ncheshe. 3Paahi attu o nikosho ni Nabenyamini, ahopatta nttenga wo wiira attu akina o ilhapo ya attu o Uisraeli alhe ari anathkumanne Umizpa uwo.
Paahi attu o Uisraeli yahonkoha nlhopwana Nlawi ulhe wiira, “Nnihimerieke, wowo uwonya uwo waapangenlhe chani?” 4Nlawi nlhopwana, owannyawe namitheko nthiyana ulhe ahaakhulha eeraka wiira, “Mii ni namitheko aka nthiyana ulhe nahopiya iwani yo Ugibea, iwani yo attu o nikosho ni Nabenyamini wiira narupelhe wowo uhiyu uyo. 5Nansho attu o iwani yo Ugibea ahowa uhiyu nkayaarukureria inupa kaarumpe aka, athananaka ukiiva, nkayanruparupiha nthiyana aka uyo wo uhittuna mpaka nkayaamwiiva. 6Mii kahokusha ntembo awe, nkakaatupulhacha ikipande ni urweeha u makosho onkhaye a attu o Uisraeli, ukhalhawaya ahopanga ittu yo urushiha ni yo uhilhoka u Uisraeli. 7Vano mwaatti attu o Uisraeli, nkohanacheke, ni mwamalhaka mwaamulheke.”
8Attu onkhaye vamoka nkayeemelhacha ni wiira, “Khaawo ntu riyoothe munlhokoni mwihu nohalha uhokolhia unihemani wawe ama uwannyawe. 9Cho, phi nohalha ihu uphanga wo attu ao iwani Ugibea. Ninowoopa ikhura yo waavia iphiro yo waakelhelha. 10Ninowaathanlha attu elufu imoka wo kila attu khumi. Yayo anookhalha ni ntheko wo waawiihera yoolhia ashikhunanaya vanovara aya ntheko wo waatarusha attu o iwani yo Ugibea wi ilhapo i Nabenyamini, wo uwonya waya ni uhilhoka upannge aya wa attu o Uisraeli.” 11Paahi etu, manyaalhopwana onkhaye o Uisraeli ahokumaana vamoka wo nrima mmoka upwaha attu no iwani ya Ugibea.
12Attu o makosho attu o Uisraeli kayaruma attu mpaka kila vakittu o nikosho ni Nabenyamini, yeerachaka wiira, “Chani phi uwonya waani ulha upangilhiye mmilhokoni winyu ulha? 13Vanova nnivaheke attu ayo yohilhoka o ilhapo ya Ugibea wiira neeve nu urimeelhiha uwonya ulha ukhuma Uisraeli.” Nansho attu o nikosho ni Nabenyamini khayewelhenlhe ashilhoko aya, attu o Uisraeli. 14Paahi wahokumaaniya Ugibea uwo, attu o ukhuma kila iwani, wiira aatakanne ni attu o Uisraeli. 15Attu o nikosho ni Nabenyamini ahokumaana ukhuma iwani aya manyaasikari maelufu makhumi meelhi ni maelufu sita, o wooria uvarelha ikerero, ni attu o iwani yo ugibea aathukumanne vamoka ayo ari attu imia saba vaathanlhiye aya. 16Munlhokoni mwa attu aathanlhiye ayo ahokhalha attu imia saba anoovarelha ikerero moono wo wiimonono, kila mmoka ahooria uwonya nlhuku wo manati ni vamuruni wo uhikufia. 17Attu o makosho makina a Aisraeli, ahokumaana ni waathanlha attu maelufu imia ncheshe anooria uvara ikerero. Attu onkhaye ari o wooria waatakana ikhoto.
Ikhoto ni attu o nikosho ni Nabenyamini
18Attu o Uisraeli ahorwaa vakittu wo ulhapelha Nlhuku Ubetheli, wowo athananaka uchuwelha nikosho ninohalha uholhelha urwaa uchokholha waatakana ni attu o nikosho ni Nabenyamini.
Apwiiya Nlhuku ahoromolha nikosho ni Nayuda wiira nichokholheke urwaa uwaatakanani ikhoto.
19Paahi attu o Uisraeli nkayaarwacha wichishu, nkayeeshacha nipuro naya vakiviru ni iwani yo Ugibea. 20Attu Uisraeli ahokhuma urwaa waatakana ni attu o nikosho ni Nabenyamini vakhiviru ni Ugibea. 21Attu o nikosho ni Nabenyamini nkayaakhuma vachereshere iwani yo Ugibea nkayaatakana ni attu o Uisraeli, nkayeevakacha attu o Uisraeli maelufu makhumi meelhi ni elufu piilhi, nenno nihuku nno. 22Nansho attu o Uisraeli ahovara nrima, nkayeechesha rata tho wo ikhoto, vakittu veecheshilhe aya tayari nkwaha wo upachera valhe. 23Paahi attu o Uisraeli ahorwaa vachulhu, nkayonlhelha Apwiiya nlhuku mpaka uchechilho. Yamalheke nkayaalhepelha Apwiiya Nlhuku yeeraka,
“Chani nirweeke tho waatakana ni ashilhoko ihu o nikosho ni Nabenyamini?”
Apwiiya Nlhuku nkayaakulha yeeraka wiira, “Eiyo, nrwaacheke mwaatakaneke ni ayo.”
Paahi mphingo wa attu o Uisraeli wahokeliya nrima, nkayeesha manyaasikari aya tayari toko chenre aya mpacho. 24Nihuku no nayeelhi attu o Uisraeli nkayaatameriya waatakana ni attu o nikosho ni Nabenyamini. 25Nenno nihuku no nayelhi nno attu o nikosho ni Nabenyamini ahokhuma Ugibea ni waakelhelha attu o Uisraeli, nkayeevakacha attu o Uisraeli maelufu khumi ni maelufu nane. 26Attu onkhaye o Uisraeli nkayaarwacha Ubetheli. Nkayaakhalha wowo umihoolho wa Apwiiya Nlhuku yonlhaka ni uttuka mpaka uchechilho, ni waakumihera Apwiiya Nlhuku isadaka cho upahiya vamooroni ni isadaka cho uwiiha mpuha. 27Attu o Uisraeli nkayaalhepelha Apwiiya Nlhuku wiira aavahe nlhove. Yeyo ikatema iyo Nsanduku no Malhehano na Apwiiya Nlhuku naari wowo Ubetheli uwo. 28Nafiniasi anaaya Naeleazari, anaaya Naharuni arii ni ntheko wo uphanga umihoolho waya. Attu o Uisraeli nkayaakhoha Apwiiya Nlhuku wiira, “Chani nirweeke tho waatakana ni ashilhoko ihu, attu o nikosho ni Nabenyamini?”
Apwiiya Nlhuku nkayeerelha wiira, “Nrweeke mwaatakaneke. Meelho kinowaakottolhacha.”
29Paahi attu o Uisraeli nkayeeshacha attu univithoni urukureriya iwani yo Ugibea. 30Attu o Uisraeli nkayaarwaa waatakana ni attu o nikosho ni Nabenyamini nihuku no neraru. Nkayeechesha tayari uweha iwani yo Ugibea thoko chaapangilhe aya mpacho. 31Yamalheke attu o nikosho ni Nabenyamini vaakhumilhe aya vawani uchokholha waatakana ni attu o Uisraeli, ahopurulhiya ukhuma vachereshere iwani. Yahokhumelha tho thoko chaapangilhe aya mpacho nkayeeva attu o israeli akina ari iphiro yulhupalhe inokelhelha iwani yo Ubetheli ni Ugibea, mpaka uthakoni. Yaheeva attu o Uisraeli khumi mararu. 32Attu o nikosho ni Nabenyamini nkayoopuwelha wiira, “Nihaata thoko ikatema chivinre.”
Nansho attu o Uisraeli nkeera, “Nittaweke etu, wiira naapurulhelhe utayi ni iwani mpaka uri iphiro yuulhupalhe.” 33Paahi etu attu o Uisraeli onkhaye ahothamacha vakittu waya ni ukhalha tho Ubaaltamari. Ashikhunanaya eevithilhe ayo ahothamacha wo waakuvia vakittu veevithilhe aya vawo ni urwaa mpata uneelha nchuwa wo iwani ya Ugibea. 34Manyaasikari o machiri aathanlhiye ukhuma makosho onkhaye a attu o Uisraeli nkayaawacha vavawo umihoolho yo iwani o Ugibea. Ikhoto yo nihuku nno yahokhalha yo uviha mooro. Nansho attu o ilhapo i Nabenyamini khayaachuwenlhe wiira urimeelha waya waari vakhiviru. 35Apwiiya Nlhuku nkayaakottolha attu o nikosho ni Nabenyamini umihoolho wa attu o Uisraeli. Attu o Uisraeli nkayeevakacha attu o nikosho ni Nabenyamini ilaki piilhi ni maelufu nthanu ni imia imoka. Yayo onkhaye eeviye ayo ari manyaasikari o wooria uvarelha ikerero. 36Paahi attu o nikosho ni Nabenyamini nkayoona wiira ahokottolhiya.
Chenre aya attu o Uisraeli wo ukottolha
Attu o Uisraeli nkayaahokolhia utulhi thoko anaattawa attu o nikosho ni Nabenyamini, kwaani yaari aakhulhuvelhaka ashikunanaya ari aneevinthe ukelhelha iwani yo Ugibea. 37Yayo attu ayo ahottawa wo waakuvia uthama ni ukelhelha iwani yo Ugibea ni weevakacha attu onkhaye yaariwo wo uphanga. 38Yaari aneewananne ni attu o Uisraeli akina iphiro yo nthonyero mmoka. Yeewananne wiira attu eevithilhe alhe vanohalha aya woona mwiishi mwinchi uwelhaka nchulhu ukhuma vawani, 39paahi akellhelheke iwani iyo. Yeyo ikatema iyo attu o nikosho ni Nabenyamini ari tayari aneevakachilhe attu makhumi mararu o ilhapo ya attu o Uisraeli ni uwerelha wiira, “Nihaakottolha thoko mpacho vawo.”
40Nansho wo nthonyero no nipoto no mwiishi nne vachokhonlhe aya ukhumelha iwani, attu o nikosho ni Nabenyamini vaawenhe aya utulhi, nkayaathikina woona wiira iwani aya yaari inapahiye mooro. 41Paahi attu o Uisraeli ahorukunuwa, ni attu o nikosho ni Nabenyamini nkayaakelhiya ni ittu yo ushangiha kwaani vano ahoona wiira urimeelha waya uhaatameria. 42Paahi ahorukunuwacha nkayaatawa attu o Uisraeli ni ukelha uthakwani, nansho ikhoto nkayaaphwanya, nkayaakhalha variyari yo miphingo piilhi cha attu o Uisraeli, ni manyaasikari aathamme ahorimeelhihachiya. 43Attu o Uisraeli ahaarukureria attu o ilhapo i Nabenyamini mipatta chonkhaye ni woomolha, ni wanyikhalhacha mpaka mpata unosha nchuwa wo Ugibea, ni weevakacha attu enchi. 44Nenno nihuku nno attu maelufu khumi ni maelufu nane o nikosho ni Nabenyamini, onkhaye manyaasikari aheevakachiya. 45Yamalheke attu o nikosho ni Nabenyamini akina ahorukunuwa, nkayaattawa arwaachaka uthakoni mpaka umwalhani Urimoni. Attu akina maelufu nthanu aheeviya urii iphiro yulhupalhe vaari aya attawaka. Attu o Uisraeli nkayaathepa waatwarelhelha wo machiri attu o nikosho ni Nabenyamini mpaka iwani yo Ugibea nkayeevakacha attu maelufu meelhi. 46Attu onkhaye o nikosho ni Nabenyamini yeeviye nenno nihuku nno arii maelufu khumi ni meelhi ni maelufu nthanu, manyaasikari o uchuwelha uvarelha ikerero rata.
47Nansho manyaalhopwana imia sita o nikosho ni Nabenyamini aholhapuwa ni uttawelha uthakoni mpaka urii mwalha wo Urimini, nkayaakhalha wowo wo mieri micheshe. 48Yamalheke attu o Uisraeli ahaarukunuwelha attu akina o nikosho ni Nabenyamini, nkayeevakacha onkhaye: Manyaalhopwana, manyaathiyana ni achishana ni ashinama. Ni iwani yonkhaye yaaphwanyilhe aya wowo nkayaarimeelhihiya wo upahiya mooro.
The Bible Version in Makua @The Word for The World International and Makua Language translators. All rights reserved.