O waamulha 18
18
Mwaha u Namika ni attu o nikosho ni Unadani
1Yayo mahuku ayo khaariwo mwene o ilhapo yo attu o Uisraeli. Paahi attu o nikosho ni Unadani naari naaviaka vakittu waya wo ukhalha mwommo, ukhalhawaya mpaka ikatema ilha, yaari ahinameelhiya vakittu waya ashinene mmilhokoni mwo makosho a attu o Uisraeli. 2Paahi, attu o nikosho ni Unadani ahonthanlha mmunlhokoni mwaya attu o machiri, nkayaaruma ukhuma Ueshtaoli uwo ni Uasora wiira arwaache yahotelhe ilhapo. Paahi attu ayo nkayaaphiya ilhapo yo miako cho Efraimu, uwani wa Namika, nkayaakhalhacha wowo. 3Vaari aya uwani u Namika, ahochuwelhacha nlhove na mmirawo Nlawi ulhe. Nkayanrukunuwelha ni ukoha, “Mpani owiihilheni uno? Nnopanga ntheko waani vaa?”
4Yoyo nkaakhulha eeraka, “Namika ahopanga ittu ni mii, ahokivaha ntheko ni mii kihokhalha opochera ishaani aya.”
5Ni ayo nkayaamwiirelha wiira, “Chonte nnikoherere wa Apwiiya Nlhuku yakhalhaka nkwaha ihu ulha unookhalha woombone.”
6Opochera ishaani ulhe nkeelha wiira, “Nrwaacheke wo mpuha. Apwiiya Nlhuku anowinkelhani munkwahani mwinyu.”
7Paahi attu athanu ayo kayaarwacha Ulaishi. yaahona attu aakhanlhe wowo, ni yongomme aya wo mpuha thoko valhe attu o ilhapo yo Usidoni. Yaari attu o maalha shiriri o uhikhalhe ni nipesha ni kawuukulhiye vakittu variyoothe velhaponi, vaari aya utayi ni attu o Usidoni, ni kayarina ni ntheko uriyoothe ni attu akina.
8Paahi yayo attu o uhotelha ayo ahohokolhiacha wa ashilhoko aya Usora ni Ueshtaoli uwo, ni ayo nkayaakoha yiiraka wiira, “Nnoniwiihera nttenga waani?” 9Yayo manyaattu ayo nkeera, “Munkwacheke nngwee nikelhelhe iwani iyo. Nihoona iwani iyo iri yo ichaayira. Chani nnookhalhacha vava wo uhipanga ittu iriyoothe ilhe? Nhicherewe urwaa mwakhalhelhe iwani iyo. 10Mwaphiyaka wowo nnokowaaphwanya attu ahiri ni mirima cho nipampa. Yeyo iwani iyo yuulhupalhe, kinowukulhelhiya ittu iriyoothe ilhe, ni Nlhuku homalha ukottolhelha.”
11Paahi attu imia sita o nikosho ni Unadani avaraka ikerero chaya cho ikhoto ahorwaa ukhuma Usora ni Ueshtaoli, 12nkayaarwacha weesha nipuro naya Ukiriathyearimu uwo, wi iwani i Nayuda. Paahi wo chiichammo etu phi nlhatu vavawo vakittu vawo mpata uneelha nchuwa Ukiriathyearimu vaheehaniya aya Mahanedani maana aya nipuro ni Unadani mpaka lhelho nna. 13Ukhuma wowo nkayaarwacha iwani yo miako yo Efraimu, nkayaaphiyacha vawani wa Namika
14Yalhe attu athanu yaarwelhe uhotelhani iwani ya Laishi alhe nkayeerelha alhoko aya wiira, “Chani nhochuwelha wiira inupa imoka yo chechiyo, ihaawo ikizibau ni isinyago yo uthulhushiya? Paahi muupuwelheke ittu yo uphanga.” 15Paahi yalhe attu o uhotelha alhe nkayaarwacha unupani wa Namika, nkayaakelhacha mpaani ni ukoha chittu cha mmirawo Nlawi ulhe. 16Yeyo ikatema iyo attu imia sita o nikosho ni Unadani yaari ni ikerero chaya cho ikhoto alhe yaari anemenlhe vankhorani. 17Ni attu athanu aarwelhe uhotelhani iwani alhe ahokelhacha mpaani, nkayakusha isinyago ya nlhuku yo uthulhushiya ilhe, ikizibau ni isinyago ulhapelhiya. Yeyo ikatema opochera ishaani alhe ari aneemenlhe vankhorani vamoka ni attu imia sita ari ni ikerero alhe.
18Paahi voonne aya attu o uhotelha alhe ahokelhacha vawani Namika ahokusha isinyago yo uhemiya, ni nrupa, isinyago ni isinyago yo uthulhushiya ilhe, nkayaakoha, “Noopangani?”
19Ni ayo nkayeeracha, “Mmaalhe. Nhuulhumache ittu iriyoothe. Mmweeke vamoka ni hii va, nkhalheke opochera ishaani ihu ni thoko athumwanihu. Ama nnoona chani? Chani nnoona wiira inoolhoka ukhalha opochera ishaani a ntu mmoka, ama ukhalha opochera ishaani o attu nikosho nimoka no attu o Uisraeli?” 20Opochera ishaani uyo ahoteelhiya nrima chinene, nkaakusha nrupa ulhe, isinyago yo uthimichiya ilhe, ni ilhe isinyago ya nlhuku yo uthulhushiya, nkaatwaraana ni ayo.
21Paahi nkaachokholha nkwaha aya, uno aholhelhiyaka ni achishana aya, ni mihuwo ni mihakhu chaya. 22Vaaphilhe aya utayi ni iwani i Namika, attu yaatamanne ni Namika aheehanachiya, nkaatwara attu o nikosho ni Unadani ni waaphiyelha. 23Yamalheke nkayaakhuwelhacha, ni attu o nikosho ni Unadani ahorukunuwacha, nkayaankoha Namika yiiraka wiira, “Nnohuvani mpaka nkamwanitwara vamoka ni nkutiro wonkhaye ulha?”
24Namika nkayaakhulha yeeraka wiira, “Mwaatti nhokusha milhuku chaka chaakooroshilhe aka, nhaakusha ni opochera ishaani aka nkamwaakihiya wo uhikhalhe ni ittu iriyoothe ilhe. Nnooria chani etu ukihoha wiira kinohuvani?”
25Attu o nikosho ni Unadani nkayereeracha, “Nambaya nhinyakulhe, ukhalhawaya mwaahireke chiicho, akhunanihu akina enchi anoorushiya, anowooria ukelhelha, ni inyu nkamwaarimeelha vamoka ni ashilhoko inyu.” 26Namika voonne aya wiira ahopwahiya machiri, ahorukunuwa nkayaahokholhia uwaani, ni attu o nikosho ni Unadani nkayaarwacha.
27Yayo attu o nikosho ni Unadani ayo yahokushacha chittu chaakoronshe aya Namika chilhe, nkankusha ni opochera ishaani ampangenlhiya aya namitheko aya ulhe. Paahi nkayarwaa ni waakelhelha attu o ilhapo yo Ulaishi nkayeevakacha attu aya aakhalhacha mwommo wo mpuha ayo, ni urimeelhiha iwani iyo. 28Ni mena kaakhanlhe ni ntu o wookholha ukhalhawaya yaari utayi ni iwani yo Usidoni, tho, khayaari ni unlhoko ni attu o iwani chikina. Yeyo iwani iyo yaari nikoote no Ubethrehobu. Attu o nikosho ni Unadani nkayathekacha tho iwani iyo, nkayaakhalhacha wowo. 29Nkayaavaha nchina nikina iwani iyo, nkayeehana Dani, utwaarana ni nchina na apwiiya aya ari anayaa Naisraeli. Nansho yeyo iwani iyo mpacho vawo yeehaniya Ulaishi. 30Yamalheke, attu o nikosho ni Unadani aheemeshacha isinyago yo uhemiya ilhe, ni Nayonathani, anaaya Nagershomu anaaya ashinna Musa, nkayaakhalha opochera ishaani aya. Ayari aya ni ayo ahokhalha opochera ishaani o nikosho ni Unadani mpaka attu o iwani iyo vaarwehiye aya ulhetoni. 31Ikatema yonkhaye Nihema na Nlhuku vaari aya Ushilo uwo, attu o nikosho ni Unadani ahothimicha isinyago yo uhemiya yaakoroshilhe aya Namika.
The Bible Version in Makua @The Word for The World International and Makua Language translators. All rights reserved.